ខេត្តសៀមរាប ៖ អាជ្ញាធរអប្សរា បានបញ្ចប់ការងារជួសជុលបណ្ណាល័យខាងជើង នៅជ្រុងអាគ្នេយ៍ នៃប្រាសាទបាគង។
លោកសារាយ គឹមហួល ប្រធានអភិរក្សតំបន់រលួស ឱ្យដឹងថា បណ្ណាល័យខាងជើង ជ្រុងអាគ្នេយ៍ របស់ប្រា សាទបាគង រងការខូចខាតខ្លាំង នៅខឿន មានផ្នែកខ្លះឥដ្ឋបានពុកផុយ។ ជាពិសេសនៅផ្នែកដំបូល ឥដ្ឋមានសភាពពុកផុយខ្លាំង។ នៅតាមជ្រុងនីមួយៗ នៃជញ្ជាំងបណ្ណាល័យ បានប្រេះហែក ដែលបណ្តាលមកពីសំណង់មានអាយុកាលជាង១ពាន់ឆ្នាំ បញ្ហាទឹក និងរុក្ខជាតិ ទាមទារការជួសជុលពង្រឹង ទប់ស្កាត់ការខូចខាតជាបន្ត ទៀត។ អ្នកជំនាញ បញ្ជាក់ថា នេះជាដំណាក់កាលទី៣ នៃការជួសជុលបញ្ចប់តួបណ្ណាល័យនៅជ្រុងអាគ្នេយ៍ ជ្រុងខាងត្បូង និងខាងកើត។
ដើម្បីសង្គ្រោះបណ្ណាល័យនេះ ឱ្យមានភាពរឹងមាំ ក្រុមការងារបានរើឥដ្ឋផ្នែកខ្លះដែលពុកផុយ ចុះលេខបញ្ជីឥដ្ឋ និងរើឥដ្ឋនោះម្តងមួយដុំៗ ទៅតាមបច្ចេកទេស ដើម្បីសម្អាតកំណកដី ឫសស្មៅ និងឫសរុក្ខជាតិ រៀបពង្រឹងឥដ្ឋនៅទីតាំងដើមឡើងវិញ និងជួសជុលបិទទីតាំងដែលមាន ទឹកហូរជ្រាបចូលក្នុងប្រាសាទ រួមទាំងជម្រកសត្វ ល្អិតផង។
ក្រោយពីបញ្ចប់ការជួសជុលរចនាសម្ព័ន្ធទាំងមូលរបស់បណ្ណាល័យខាងជើងជ្រុងអាគ្នេយ៍ នៃប្រាសាទបាគង នៅដំណាក់កាលទី៣ តួបណ្ណាល័យ ទទួលបានភាពរឹងមាំឡើងវិញ មិនតែប៉ុណ្ណោះ ក្រុមការងារនៅតែបន្តការថែទាំ អភិរក្ស តាមដានជាប្រចាំ ដូចជាការសម្អាតស្មៅ ឫរុក្ខជាតិ និងទឹកដក់តាមប្រាសាទ៕
