ខេត្តសៀមរាប ៖ ផ្ទះមួយខ្នង ត្រូវបានអគ្គិភ័យឆាបឆេះយ៉ាងសន្ធោសន្ធៅ បំផ្លាញអស់ទាំងស្រុង ខណៈដែលបុរសជាម្ចាស់ផ្ទះរវល់ចេញទៅរកត្រី ចំណែកស្ត្រីជាប្រពន្ធ ចេញទៅអង្គុយលេងផ្ទះអ្នកជិតខាង ស្រាប់តែកើមានហេតុការណ៍អគ្គិភ័យឡើងតែម្តង បង្កឱ្យមានការភ្ញាក់ផ្អើលដល់អ្នកជិតខាង រាយការណ៍សុំអន្តរាគមន៍ពីសមត្ថ កិច្ច ចុះជួយអន្តរាគមន៍បាញ់ទឹកពន្លត់ភ្លាមៗ មិនឱ្យរាលដល់ផ្ទះប្រជាពលរដ្ឋផ្សេងទៀត។
ហេតុការណ៍អគ្គិភ័យនេះ បានកើតឡើងកាលពីម៉ោង៨យប់ ថ្ងៃទី១៥ ខែមករា ឆ្នាំ២០២៥ នៅត្រង់ចំណុចជើង ភ្នំក្រោម ភូមិ២ សង្កាត់ចុងឃ្នៀស ក្រុងសៀមរាប។
ផ្ទះដែលរងការឆាបឆេះ សង់ពីឈើប្រក់ស័ង្កសី មានទំហំ៧ម៉ែត្រ គុណនឹង ៩ម៉ែត្រ មានម្ចាស់ឈ្មោះផៃ វាសនា ហៅខ្នា មុខរបរនេសាទ មានប្រពន្ធ និងកូន៣នាក់ ក្នុងបន្ទុក។
តាមប្រភពប្រជាពលរដ្ឋនៅក្បែរកន្លែងកើតហេតុ បានឱ្យដឹងថា ក្នុងដើមខែមករា នេះ ក្នុងភូមិខាងលើ កើតមានអគ្គិភ័យ ឆេះផ្ទះចំនួន ២ករណីហើយ លើកទី១ នៅវេលាម៉ោង៧យប់ ថ្ងៃទី០១ ខែមករា ឆ្នាំ២០២៥ អគ្គិភ័យឆេះផ្ទះ ម្ចាស់ឈ្មោះចាន់ សុផាណា និងប្រពន្ធឈ្មោះជិន លីណា ដើមហេតុដោយសារប្តីស្រវឹងស្រា ដុតផ្ទះខ្លួនឯង។ លុះមកដល់វេលាម៉ោង៨យប់ ថ្ងៃទី១៥ ខែមករា ឆ្នាំ២០២៥នេះ មានអគ្គិភ័យឆេះផ្ទះឈើមួយខ្នង គ្រាដែលម្ចាស់ផ្ទះមិននៅ ដែលពលរដ្ឋសង្ស័យមកពីឆ្លងចរន្តអគ្គិសនី ឆេះពីលើដើមឈើ រាលចូលដល់ផ្ទះ បង្កឱ្យភ្ញាក់ផ្អើលអ្នកស្រុក សមត្ថកិច្ចពន្លត់អគ្គិភ័យ ជួយអន្តរាគមន៍។
ប្រភពដដែល បន្តថា មុនកើតហេតុ ម្ចាស់ផ្ទះជាប្តីបានចេញទៅរាយមងរកត្រីនៅឯបឹង ចំណែកស្ត្រីជាប្រពន្ធ បានចេញទៅអង្គុយលេង នៅផ្ទះញាតិក្បែរខាង រីឯកូន៣នាក់ បានចេញទៅដេកលេងនៅផ្ទះជីដូនក្នុងភូមិនោះដែរ ពោលផ្ទះពុំមានអ្នកនៅឡើយ ស្រាប់តែនៅម៉ោងកើត ហេតុ ឃើញភ្លើងឆេះពីលើដើមឈើ រាលចូលដល់ផ្ទះ ផ្អើលដល់ប្រជាពលរដ្ឋជួយដងទឹកជះ តែមិនឈ្នះ ព្រោះផ្ទះឈើ ភ្លើងឆេះលឿន ស្របពេលដែលអាកាសធាតុ ស្ងួត ធ្លាក់ខ្យល់ផង។
សមត្ថកិច្ច បានបញ្ជាក់ថា គ្រោះអគ្គិភ័យខាងលើ បានបង្កឱ្យខូចខាតផ្ទះ អស់១ខ្នងទាំងស្រុង មូលហេតុផ្តើមចេញពីឆ្លងចរន្តអគ្គិសនី៕