ភ្នំពេញ៖ហ្វេសបុកតារាចម្រៀងខាន់ ជេសម៍ បានបង្ហោះរូបលោកព្រាប សុវត្ថិ ចាប់អោបថើបខេមរៈ សិរីមន្ដ ដែលគេកម្រនឹងឃើញរូបភាពមួយនេះខ្លាំងណាស់ ។
តើជាការឱបថើបគ្នាដោយស្រលាញ់ពេញបេះដូងមែន ឬគ្រាន់តែDrama ?
អ្នកចូលទៅខមិនលើវីដេអូថតដោយលោកខាន់ ជេមស៍ នោះបានបញ្ចេញមតិផ្សេងៗគ្នាជុំវិញព្រាប សុវត្ថិ ចាប់ឱបថើបខេមរៈ សិរីមន្ដ អំឡុងពួកគេទៅទិញស្រូវពលរដ្ឋនៅខេត្តកំពង់ធំនោះ។ ហ្វេសបុកឈ្មោះSaron Roth ខមិន ថា«ពួកអាសម្ដែង »,ហ្វេសបុកឈ្មោះសាយ សំអុល ខមិនថា«បឺតមាត់ទៀត» ,ហ្វេសបុកឈ្មោះOun Ra ខមិនថា«ចង់ក្អួត» ,ហ្វេសបុកឈ្មោះKhmer Mchasrok ខមិនថា«ល្មមដល់ពេលចេះគិតហើយថាអ្នកណាជាមិត្ត ជាសត្រូវ » …។
យ៉ាងណាទោះជានៅលើបណ្ដាញសង្គមមានការបញ្ចេញមតិខ្លះមានទាំងពាក្យ អសុរសថាតារាទាំងពីរជាប្រុសដូចគ្នាមិនសមថើបគ្នាកណ្ដាលវាលស្រែដូចស្រីនិងប្រុសនាំឲ្យពួកគេព្រឺសំបុរ បាស់រោម ស្រីវ និងប៊ះសក់ច្រូងបែបនេះនោះស្រាប់តែ តារារួមអាជីពបានបង្ហាញការគាំទ្រចំពោះរូបភាពព្រាប សុវត្ថិ ចាប់ថើមខេមរៈ សិរីមន្ដ នោះថាជាសញ្ញាអ្នកសិល្បៈចេះស្រលាញ់គ្នាទៅវិញ។ចំណែកតារាចម្រៀងខេម វិញបានសរសេរសារភ្ជាប់ជាមួយរូបលោកជាមួយព្រាប សុវត្ថិ ,ខេមរៈ សិរីមន្ដ ,ខាន់ ជេមស៍ និងលោកឡេង ណាវ៉ាត្រា នោះថា«រយលានអត្ថន័យ» ដែលធ្វើឲ្យមានកាវែកញែកលើបហ្វេសបុកព្រោងព្រាតដោយខ្លះលើកឡើងថាគេមិនយល់ពីអត្ថន័យលោកខេម ចង់និយាយអ្វីនោះទេ ។
សូមបញ្ជាក់ថាព្រាប សុវត្ថិ ក៍ធ្លាប់ចាប់អោបខេមរៈ សិរីមន្ដ ម្ដងដែរអំឡុងពេលដែលលោកប៊ុនថៃ ចេញពីហង្សមាសចូលGalaxy ហើយធ្វើពិធីបង្ហាញខ្លួនកាលពីថ្ងៃទី១៣ ខែមករា ឆ្នាំ២០២៣ ប៉ុន្ដែពេលនោះមិនដល់ថ្នាក់ថើបច្រមុះទល់និងថ្ពាល់បែបនេះឡើយ ។ប៉ុន្ដែអ្នកជំនាញសិល្បៈបានលើកឡើងថាទង្វើរបស់ព្រាប សុវត្ថិ នាពេលនេះគឺលោកចង់បន្សាបចំពោះព័តមានថាលោកមិនត្រូវគ្នាជាមួយខេមរៈ សិរីមន្ដ នោះតែម្ដង ទើបបានជាថើបសិរីមន្ដ ឡើងកប់ច្រមុះបែបនេះ ។សកម្មភាពរបស់លោកសុវត្ថិ នាពេលនេះដែរគឺចំពេលដែលការសង្ស័យថាលោកនិងសិរីមន្ដ អាចផ្ទុះសង្រ្គាមជាលើកទី២ រឿងដណ្ដើមគ្នាធ្វើលេខ១នៅGalaxy នោះក៍មិនសូវឡើងកម្ដៅដូចមុនទៀតដែរ ព្រោះថាតាមរូបភាពនោះបញ្ជាក់ថាតារាទាំងពីរស្រលាញ់គ្នាសឹងតែលេបចូលក្នុងពោះរៀងៗខ្លួន។
គួររំលឹកថាព្រាប សុវត្ថិ និងខេមរៈ សិរីមន្ដ ធ្លាប់ប្រជែងនិងកាច់កុងគ្នាខ្លាំងមុនពេលពួកគេចូលGalaxy ពិសេសគឺជ្រកនៅហង្សមាសជាមួយគ្នា៣ឆ្នាំ(២០១៧-២០២០) ដែលពេលនោះហើយ«ភ្នំ១ ខ្លា២ » ធ្វើឲ្យថៅកែឈឺក្បាល ។ប៉ុន្ដែពេលមកបុកគ្នាលើកទី២នៅGalaxy នោះព្រាប សុវត្ថិ -ខេមរៈ សិរីមន្ដ ត្រូវបានអ្នកជំនាញសិល្បៈលោកនូ ស៊ឹប អះអាងថាពួកគេអាចជ្រកនៅទ្រនុំរួមគ្នាបាន ព្រោះសំខាន់នៅលើអ្នកគ្រប់គ្រងទេ ។តែមហាជនរងចាំមើលថាក្រោយព្រាប សុវត្ថិ ថើបខេមរៈ សិរីមន្ដ កណ្ដាលហ្វូងកសិករខេត្តកំពង់ធំមកលក់ស្រូវឲ្យបែបនេះ តើតារាទាំងពីរពិតជាស្រលាញ់គ្នាដោយស្មោះស័គ្រមែន ឬគ្រាន់តែសម្ដែង ខណៈដែលថ្មីៗនេះលោកថៃ ក៍បានចេញមុខឃោសនាឲ្យកូនប្រុសទី២លោកព្រាប សុវត្ថិ គឺសុវត្ថិ មុនីនាគ ប្ដូរឈ្មោះទៅជាN.John នោះពីបទចម្រៀងជាភាសារអង់គ្លេសរបស់គេដែលនឹងចេញនៅថ្ងៃទី២៨ខែ២ ហើយលោកសុវត្ថិ ក៍បានអរគុណទៅលោកថៃ ផងដែរ ៕
