អារ៉ាប៊ីសាអ៊ូឌីត ៖ រដ្ឋមន្ត្រីការបរទេសសហរដ្ឋអាមេរិក និងរុស្ស៊ី បានជួបប្រជុំគ្នានៅប្រទេសអារ៉ាប៊ីសាអ៊ូឌីត ហើយឈានដល់កិច្ចព្រមព្រៀង ៣ចំណុច ដោយរៀបចំស្តារទំនាក់ទំនងការទូតឡើងវិញ និងបង្កើតក្រុមចរចាដើម្បីបញ្ចប់សង្គ្រាមនៅអ៊ុយក្រែន។
តាមប្រភពទីភ្នាក់ងារព័ត៌មានបរទេស បានរាយការណ៍ថា លោកស្រី ថាមមី ប៊្រូស (Tammy Bruce) អ្នកនាំពាក្យក្រសួងការបរទេសសហរដ្ឋអាមេរិក បានបង្ហើបថា សហរដ្ឋអាមេរិក និងរុស្ស៊ី បានព្រមព្រៀងគ្នាបង្កើតក្រុមចរចា ដើម្បីស្វែងរកមធ្យោបាយបញ្ចប់សង្គ្រាមនៅអ៊ុយក្រែន បន្ទាប់ពីរដ្ឋមន្ត្រីការបរទេសនៃគណបក្សទាំងពីរ បានចូលរួមក្នុងកិច្ចពិភាក្សាកម្រិតខ្ពស់ នៅទីក្រុងរីយ៉ាដ រាជធានីនៃប្រទេសអារ៉ាប៊ីសាអ៊ូឌីត នៅថ្ងៃអង្គារ ទី១៨ ខែកុម្ភៈ ឆ្នាំ២០២៥។
អ្នកស្រីប៊្រូស បាននិយាយថា តំណាងភាគីទាំងពីរ បានយល់ព្រមដោះស្រាយការរំខាន ក្នុងទំនាក់ទំនងទ្វេភាគីរបស់ខ្លួន ប៉ុន្តែមិនបានបញ្ជាក់ទេថា តើអ្វីជាការរំខាន?
មុននេះ រដ្ឋមន្ត្រីការបរទេសរុស្ស៊ី លោកសឺរហ្គេ ឡាវរ៉ូវ (Sergei Lavrov) បានបង្ហើបឱ្យដឹងថា គណៈប្រតិភូសហរដ្ឋអាមេរិក និងរុស្ស៊ី បានចុះកិច្ចព្រមព្រៀងចំនួន៣ បានសម្រេច នៅឯកិច្ចប្រជុំនៅទីក្រុងរីយ៉ាដ។ ចំណុចទីមួយ គឺការតែងតាំងឯកអគ្គរដ្ឋទូត ទៅវិញទៅមក ឱ្យបានឆាប់ តាមដែលអាចធ្វើទៅបាន ដើម្បីលុបបំបាត់ឧបសគ្គក្នុងបេសកកម្មការទូត។ ទី២ គឺចាប់ផ្តើមដំណើរការចរចាបញ្ចប់សង្គ្រាមនៅអ៊ុយក្រែន ដោយសហរដ្ឋអាមេរិក និងរុស្ស៊ី បង្កើតក្រុមគណៈប្រតិភូរៀងខ្លួន។ ទី៣ គឺបង្កើតលក្ខខណ្ឌដើម្បីចាប់ផ្តើមកិច្ចសហប្រតិបត្តិការរវាងប្រទេសទាំងពីរ ឲ្យមានការអភិវឌ្ឍពេញលេញ និងពង្រីកដល់វិស័យជាច្រើន។
លោក ឡាវរ៉ូវ បានថ្លែងក្នុងសន្និសីទកាសែតថា “នេះគឺជាការពិភាក្សាដ៏មានប្រយោជន៍។ យើងស្តាប់គ្នាទៅវិញទៅមក ហើយយើងស្តាប់គ្នាទៅវិញទៅមក។ បានថ្លែងក្នុងសន្និសីទកាសែត។ ខ្ញុំមានហេតុផលដើម្បីជឿរឿងនោះ។ ខាងអាមេរិក ឥឡូវយល់ពីជំហររបស់យើងកាន់តែល្អ»។
នៅពេលត្រូវសួរអំពីលទ្ធភាពរបស់សហភាពអឺរ៉ុប ឬអង្គការណាតូ កងរក្សាសន្តិភាព អាចនឹងត្រូវដាក់ពង្រាយនៅអ៊ុយក្រែន ឬទេ? លោក ឡាវរ៉ូ មិនបានលើកឡើងអំពីការចូលរួមរបស់អ៊ុយក្រែន ក្នុងការចរចានាពេលអនាគតនោះទេ។
លោកម៉ារកួ រូប៊ីអូ (Marco Rubio) រដ្ឋមន្ត្រីការបរទេសសហរដ្ឋអាមេរិក បានថ្លែងបន្ទាប់ពីកិច្ចប្រជុំនោះថា គោលបំណងនៃកិច្ចប្រជុំថ្ងៃនេះ គឺដើម្បីតាមដានលទ្ធផលនៃការសន្ទនាតាមទូរស័ព្ទ រវាងប្រធានាធិបតីសហរដ្ឋអាមេរិក លោកដូណាល់ ត្រាំ (Donald Trump) និងប្រធានាធិបតីរុស្ស៊ី លោកវ៉្លាឌីមៀរ ពូទីន (Vladimir Putin) កាលពីសប្តាហ៍មុន នឹងបើកផ្លូវទំនាក់ទំនងនៃប្រទេសទាំងពីរឡើងវិញ។
លោក រូប៊ីអូ បាននិយាយផងដែរថា លោកជឿថា រុស្ស៊ី មានឆន្ទៈក្នុងការចាប់ផ្តើមការចូលរួមយ៉ាងពេញទំហឹងនៅក្នុងដំណើរការដើម្បីបញ្ចប់សង្រ្គាមនៅអ៊ុយក្រែន និងស្តារទំនាក់ទំនងសហរដ្ឋអាមេរិក ជាមួយរុស្ស៊ី។ ឯកអគ្គរដ្ឋទូត នឹងត្រូវតែងតាំងរវាងប្រទេសទាំង២ ដើម្បីបេសកកម្មការទូតដែលអាចដំណើរការធម្មតា។
ចំណែកបញ្ហាអ៊ុយក្រែន មិនចូលរួមកិច្ចប្រជុំនេះ លោក រូប៊ីអូ បញ្ជាក់ថា គ្មាននរណាម្នាក់ត្រូវបានទុកចោលទេ អាមេរិក នឹងចូលរួមជាមួយអ៊ុយក្រែន និង EU ក្នុងការចរចា ហើយភាគីទាំងអស់ដែលពាក់ព័ន្ធនឹងជម្លោះ ត្រូវតែយល់ព្រម ជាមួយនឹងកិច្ចព្រមព្រៀងដែលត្រូវតែទទួលយកដោយពួកគេ។
ចំពោះការដាក់ទណ្ឌកម្មលើរុស្ស៊ី លោករដ្ឋមន្ត្រីការបរទេសសហរដ្ឋអាមេរិក បាននិយាយថាចាំបាច់ត្រូវមានសម្បទានពីគ្រប់ភាគី ដើម្បីឈានដល់ការបញ្ចប់ជម្លោះ ហើយសហភាពអឺរ៉ុបនឹងត្រូវចូលមកតុចរចា នៅពេលណាមួយ ព្រោះពួកគេក៏មានទណ្ឌកម្មប្រឆាំងនឹងរុស្ស៊ី ដែរ។លោក រូប៊ីអូ ក៏បានសង្កត់ធ្ងន់ថា កិច្ចប្រជុំថ្ងៃនេះ ជាជំហានដំបូងក្នុងដំណើរដ៏វែងឆ្ងាយនិងលំបាក ដើម្បីបញ្ចប់សង្រ្គាមនៅអ៊ុយក្រែន៕