នាវាយក្សដឹកភ្ញៀវ១ពាន់នាក់ ចូលចតនៅកំពង់ផែព្រះសីហនុ

ខេត្តព្រះសីហនុ ៖ នាវាទេសចរណ៍ ១គ្រឿង ឈ្មោះ AZAMARA សញ្ជាតិ MALTA ផ្ទុកអ្នកដំណើរចម្រុះ​ជាតិសាសន៍ សរុបចំនួន ១០០៤នាក់ ក្នុងនោះមានភ្ញៀវទេសចរ ៦១៦នាក់ និងនាវិក៣៨៨នាក់ (ស្រី ៦២ នាក់) មាន ៣៧ សញ្ជាតិ និងមានភ្ញៀវទេសចរ សរុបចំនួន ៦១៦នាក់ (ស្រី ៣១៣នាក់) មាន ២២សញ្ជាតិ។ ចំនួនសញ្ជាតិដែលមានភ្ញៀវច្រើនជាងគេ គឺសហរដ្ឋអាមេរិក (២១៤នាក់) អង់គ្លេស (១២៩នាក់) និងអូស្រ្តាលី (១៤៦នាក់) ។

នាវាទេសចរណ៍នេះ មានប្រវែងបណ្តោយ ១៨០,៤៥ម៉ែត្រ ទទឹង ២៨,៣០ម៉ែត្រ បានចូលចតនៅកំពង់ផែស្វយ័តក្រុងព្រះសីហនុ ថ្ងៃទី១ ខែមេសា ឆ្នាំ២០២៥ ក្នុងដំណើរទស្សនកិច្ចមកពីប្រទេសវៀតណាម ចូលមកប្រទេសកម្ពុជា និងបន្តដំណើរទៅប្រទេសថៃ នៅយប់ថ្ងៃដដែល។

ដោយឡែក នាវាចម្បាំងរបស់ប្រទេសជប៉ុន នឹងចូលមកដែនទឹកកម្ពុជា ក្នុងមូលដ្ឋានកងទ័ពជើងទឹករាម នៃខេត្តព្រះសីហនុ រយៈ ពេល៤ថ្ងៃ ចាប់ពីថ្ងៃទី១៩ ដល់ថ្ងៃទី២២ ខែមេសា ឆ្នាំ២០២៥។

នាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិ បានថ្លែងប្រាប់អ្នកសារព័ត៌មាន នៅថ្ងៃទី០១ ខែ​មេសា ឆ្នាំ២០២៥ ថា នាវាចម្បាំងរបស់ប្រទេសជប៉ុន នឹងចូលមកដែនទឹកកម្ពុជា ការមកដល់នេះ បាននាំឱ្យជប៉ុន នឹងក្លាយជាប្រទេសដំបូងបង្អស់ ដែលកម្ពុជាអនុញ្ញាត ឱ្យមាននាវាចូល “មូលដ្ឋានកងទ័ពរាម” ដែលត្រូវបានធ្វើទំនើបកម្មដោយកងទ័ពចិន។

ត្រង់ចំណុចនេះ នាយឧត្តមសេនីយ៍ ឈុំ សុជាតិ ធ្លាប់បានពន្យល់ប្រាប់សារព័ត៌មានថា ការដែលប្រទេសកម្ពុជា សម្រេចឱ្យនាវាចម្បាំង របស់ប្រទេសជប៉ុន ចូលចតមុនគេ អាចដោយសារជប៉ុន បានដាក់សំណើមករាជរដ្ឋាភិ​បាលកម្ពុជា បានមុនគេ។

គួរបញ្ជាក់ថា កន្លងទៅ រាជរដ្ឋាភិបាលកម្ពុជា គ្រោងនឹងរៀបចំសម្ពោធ “មូលដ្ឋានកងទ័ពជើងទឹករាម” នៅថ្ងៃទី២ ខែមេសា ឆ្នាំ២០២៥ ក្រោមអធិបតីភាពរបស់សម្តេច ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុ​ជា។ ប៉ុន្តែគម្រោងនេះ ត្រូវបានប្រកាសលើកពេលវិញ ដោយរហូតមកដល់ពេលនេះ នៅមិនទាន់ដឹងនៅឡើយថា តើការសម្ពោធ នឹងធ្វើឡើងនៅថ្ងៃណានៅឡើយ៕