ខេត្តព្រះវិហារៈ សត្វក្របី ១ហ្វូង របស់ប្រជាពលរដ្ឋ សរុបមានចំនួន ១៨ក្បាល បានជាប់ផុងនៅក្នុងប្រឡាយទឹកភក់យ៉ាងជ្រៅ អស់រយៈពេល៣ថ្ងៃ ពុំអាចឡើងរួច និងត្រូវបានអាជ្ញាធរស្រុកឆែប ខេត្តព្រះវិហារ ដឹកនាំកម្លាំងគណៈបញ្ជាការឯកភាពស្រុក ចុះអន្តរាគមន៍ជួយសង្គ្រោះ។
លោកឃិត សុធារ៉ា អភិបាលស្រុកឆែប ខេត្តព្រះវិហារ បានបញ្ជាក់ប្រាប់នៅព្រឹកថ្ងៃទី០២ ខែមេសា ឆ្នាំ២០២៥ថា ការឈានទៅ ជួយសង្គ្រោះហ្វូងសត្វក្របីទាំងនេះ គឺក្រោយពីលោកបានទទួលព័ត៌មានពីប្រជាពលរដ្ឋនៅព្រលប់ថ្ងៃទី០១ ខែមេសា ឆ្នាំ២០២៥ថា នៅចំណុចការដ្ឋានទី៣ ខាងកើតស្នាក់ការឧទ្យានតេជោសែន ឫស្សីត្រឹប ក្នុងភូមិសាស្ត្រឃុំឆែបពីរ ឃើញសត្វក្របីមួយហ្វូង ជាប់ផុងក្នុងភក់ប្រឡាយទឹក មិនអាចឡើងរួច និងឃើញងាប់អស់ ៣ក្បាល។
លោកអភិបាលស្រុកឆែប បានបញ្ជាក់ទៀតថា បន្ទាប់ពីទទួលបានព័ត៌មាននេះភ្លាម លោកក៏បានណែនាំទៅលោកកៅ រីម អភិបាលរងស្រុក ដើម្បីដឹកនាំកម្លាំងគណៈបញ្ជាការឯកភាពស្រុក ចុះទៅជួយអន្តរាគមន៍សង្គ្រោះហ្វូង សត្វក្របីនោះទាំងយប់ ប៉ុន្តែដោយសារស្ថានភាព ប្រឡាយទឹកភក់ជ្រៅ មិនអាចប្រើកម្លាំងមនុស្សដើម្បីទាញ ឬក៏ប្រើគ្រឿងចក្រអេស្កាវ៉ាទ័របានទេ លោកក៏បានណែនាំឱ្យជួលរថយន្តស្ទួច ដើម្បីធ្វើការស្ទួចសត្វក្របី ចេញពីភក់។
លោកឃិត សុធារ៉ា បានបញ្ជាក់ថា ជាលទ្ធផល សង្គ្រោះបានសត្វក្របី ចំនួន ១៥ក្បាល និងសត្វក្របី ៣ក្បាលទៀតងាប់។ តាមការសន្និដ្ឋាន ហ្វូងសត្វក្របីទាំងនេះ បានធ្លាក់ចូលប្រឡាយទឹកភក់ ប្រហែល ៣ថ្ងៃហើយ ដូចនេះបើមិនសង្គ្រោះបានទាន់ពេលវេលាទេ សត្វក្របី ទាំងនោះ អាចនឹងបាត់បង់ជីវិតទាំងអស់។ លោកបានអំពាវនាវដល់ប្រជាកសិករដែលមានសត្វចិញ្ចឹម សូមថែក្សាការពារសត្វចិញ្ចឹមរបស់ខ្លួនឱ្យបានល្អ ចៀសវាងមានការបាត់បង់ដោយប្រការផ្សេងៗ៕
