ភ្នំពេញ ៖ នៅថ្ងៃទី៣ ខែមេសា ឆ្នាំ២០២៥ មន្ត្រីសម្រុះសម្រួលដោះស្រាយវិវាទនៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ បានសម្រុះសម្រួលផ្សះផ្សាបញ្ចប់ដោយជោគជ័យនូវវិវាទពាក់ព័ន្ធនឹងមរតក របស់ប្រជា ពលរដ្ឋ រស់នៅស្រុកស្រីសន្ធរ ខេត្តកំពង់ចាម។
តាមប្រភពមន្ត្រីជំនាញ កន្លងមកគូភាគីដែលត្រូវជាបងប្អូនបង្កើតនឹងគ្នា បានធ្វើការស្វែងរកដំណោះស្រាយ ប៉ុន្តែមិនទទួលបានជោគជ័យ ទើបនៅអំឡុងខែមករា ឆ្នាំ២០២៥ ករណីវិវាទនេះ ត្រូវបានភាគីម្ខាងដាក់ពាក្យមកអាជ្ញាធរជាតិដោះស្រាយវិវាទ ក្រៅប្រព័ន្ធតុលាការ ដើម្បីស្នើសុំសម្រុះសម្រួលដោះស្រាយបញ្ចប់វិវាទដោយសន្តិវិធី។
អាជ្ញាធរជាតិដោះស្រាយវិវាទក្រៅប្រព័ន្ធតុលាការ បានពិនិត្យ សិក្សាស្រាវជ្រាវដោយយកចិត្តទុកដាក់ និងដោះ ស្រាយបញ្ចប់វិវាទនេះ ដោយផ្អែកលើឆន្ទៈព្រមព្រៀងរបស់គូភាគី និងដោយឆាប់រហ័ស។
ជាលទ្ធផល នៅថ្ងៃទី៣ ខែមេសា ឆ្នាំ២០២៥ គូភាគីវិវាទ បានសម្រេចសះជាជាមួយគ្នា ហើយបានផ្តិតមេដៃលើកំណត់ហេតុ ព្រមព្រៀងបញ្ចប់វិវាទ ដែលតាមច្បាប់ កំណត់ហេតុនេះមានតម្លៃអនុវត្តដូចសាលក្រមស្ថាពររបស់តុលាការ៕