ភ្នំពេញ ៖ ក្មេងទំនើង ១ក្រុមធំ មានគ្នាប្រមាណ៧០នាក់ ជិះម៉ូតូប្រមាណ ៥០គ្រឿង ប្រដាប់ដោយដុំថ្ម បំពង់ទីប និងដាវកាំបិត បានធ្វើសកម្មភាពដេញកាប់យុវជន ១ក្រុម ប្លន់ម៉ូតូ ១គ្រឿង បានសម្រេច លុះក្រោយមកត្រូវបានកម្លាំងជំនាញអាវុធហត្ថស្រាវជ្រាវឃាត់ខ្លួនបានជាបន្តបន្ទាប់ ចំនួន៥នាក់ នាំយកមកចាត់ការតាមច្បាប់។
ករណីដេញកាប់ប្លន់ម៉ូតូនេះ បានកើតឡើង កាលពីវេលាម៉ោងប្រមាណ២រំលងអធ្រាត្រ ឈានចូលថ្ងៃទី២៤ ខែសីហា ឆ្នាំ២០២៥ នៅចំណុចតូបលក់អីវ៉ាន់ ១កន្លែង តាមបណ្តោយមហាវិថីឈ្នះ-ឈ្នះ ខាងកើតវិមានឈ្នះ-ឈ្នះ ស្ថិតក្នុងភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ។
ជនសង្ស័យទាំង៥នាក់ ដែលត្រូវបានកម្លាំងជំនាញអាវុធហត្ថបង្ក្រាបបាន រួមមាន ទី១-ឈ្មោះលឹម ហេងលាភ ភេទប្រុស។ ទី២-ឈ្មោះឈ្មោះ ផេង វិច្ឆិកា ភេទប្រុស។ ទី៣-ឈ្មោះសល់ សុវណ្ណ ភេទប្រុស។ ទី៤-ឈ្មោះចំរើន បញ្ញា ភេទប្រុស និងទី៥-ឈ្មោះហ៊ុល វណ្ណៈសុផា ហៅង៉ោល ភេទប្រុស។
តាមប្រភពកងរាជអាវុធហត្ថរាជធានីភ្នំពេញ បានឱ្យដឹងថា កាលពីវេលាម៉ោងប្រមាណ ២រំលងអធ្រាត្រ ឈានចូលថ្ងៃទី២៤ ខែសីហា ឆ្នាំ២០២៥ ជនសង្ស័យ ១ក្រុមធំ មានបក្ខពួកប្រមាណ៦០-៧០នាក់ មធ្យោបាយម៉ូតូ ប្រ មាណ៥០គ្រឿង ប្រដាប់ដោយដំបងដែកទីប ដងឆត្រ ដំបងឫស្សី កាំបិតប៉័ងតោ និងដុំថ្ម ធ្វើសកម្មភាពកាប់ វាយនិងគប់ ប្លន់យកម៉ូតូ ចំនួន១គ្រឿង ម៉ាកស៊ុយស៊ូគី និច ពណ៌ស ឆ្នាំផលិត២០១៧ ពាក់ស្លាកលេខ ភ្នំពេញ 1GG-9108 ពីជនរងគ្រោះ និងមិត្តភក្តិ មានគ្នា៦នាក់ ដែលកំពុងអង្គុយនៅតូបលក់អីវ៉ាន់នៅចំណុចផ្លូវឈ្នះ-ឈ្នះ ខាងកើតវិមានឈ្នះ-ឈ្នះ ភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ។ នៅក្នុងសកម្មភាពខាងលើនេះ បានបណ្តាលឱ្យអ្នកខ្លះរងរបួស និងខូចខាតម៉ូតូមួយចំនួន រួចក៏នាំគ្នាជិះគេចខ្លួនបាត់តែម្តង។
បន្ទាប់ពីមានហេតុការណ៍កើតឡើង កម្លាំងអាវុធហត្ថរាជធានីភ្នំពេញ ដែលប្រចាំការការពារនៅវិមានឈ្នះ-ឈ្នះ បានធ្វើអន្តរាគមន៍ភ្លាមៗ ដោយឃាត់ខ្លួនបានជនសង្ស័យម្នាក់ ឈ្មោះលឹម ហេងលាភ ភេទប្រុស ប្រគល់ជូនកម្លាំងជំនាញ មូលដ្ឋានអាវុធហត្ថខណ្ឌជ្រោយចង្វា ដើម្បីចាត់ការបន្តតាមនីតិវិធី ។
ក្រោយពេលសាកសួរជនសង្ស័យឈ្មោះលឹម ហេងលាភ រួចមក កម្លាំងជំនាញអាវុធហត្ថខណ្ឌជ្រោយចង្វា បានសហការជាមួយកម្លាំងជំនាញការិយាល័យព្រហ្មទណ្ឌ កងរាជអាវុធហត្ថរាជធានីភ្នំពេញ និងកម្លាំងជំនាញអាវុធ ហត្ថខណ្ឌពោធិ៍សែនជ័យ បន្តការស្រាវជ្រាវរហូតកំណត់មុខសញ្ញាបាន ឈានដល់ការឃាត់ខ្លួនជនសង្ស័យជាបក្ខពួកម្នាក់ទៀត ឈ្មោះផេង វិច្ឆិកា ភេទប្រុស នៅចំណុចបន្ទប់ជួលលេខ៣០ ភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ នៅវេលាម៉ោង១២ និង២០នាទីថ្ងៃត្រង់ ថ្ងៃទី២៤ ខែសីហា ឆ្នាំ២០២៥។
បន្ទាប់មក កម្លាំងជំនាញបានបន្តពន្លាតដែនសមត្ថកិច្ច សហការជាមួយកម្លាំងជំនាញ កម្លាំងជំនាញអាវុធហត្ថ ក្រុងអរិយក្សត្រ ខេត្តកណ្តាល ឃាត់ខ្លួនជនសង្ស័យ ចំនួន២នាក់ទៀត ឈ្មោះ សល់ សុវណ្ណ និងឈ្មោះចំរើន បញ្ញា នៅចំណុចផ្លូវលំ ភូមិតាស្គរ សង្កាត់សារិកាកែវ ក្រុងអរិយក្សត្រ ខេត្តកណ្តាល។ រហូតដល់វេលាម៉ោងប្រមាណ ៥និង៣០ល្ងាចថ្ងៃដដែល សមត្ថកិច្ចជំនាញបន្តសហការជាមួយនិងកម្លាំងជំនាញអាវុធហត្ថ ខណ្ឌដូនពេញ ធ្វើការឃាត់ខ្លួនជនសង្ស័យម្នាក់ទៀត ឈ្មោះហ៊ុល វណ្ណៈសុផា ហៅង៉ោល នៅចំណុច ផ្លូវ១០៣កែង១១០ សង្កាត់ផ្សារចាស់ ខណ្ឌដូនពេញ។
ចំពោះវត្ថុតាងចាប់យក រួមមាន ម៉ូតូ ១គ្រឿង ម៉ាកហុងដា ឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ 1JX-8982 បំពង់ទីប ១ដើម្ប ដុំថ្ម៥ដុំ រួមនិងសម្ភារមួយចំនួនទៀត។
ជនសង្ស័យទាំង៥នាក់ខាងលើ រួមនិងវត្ថុតាង ត្រូវបានកម្លាំងជំនាញការិយាល័យព្រហ្មទណ្ឌ នៃកងរាជអាវុធហត្ថរាជធានីភ្នំពេញ កសាងសំណុំរឿង បញ្ជូនទៅតុលាការ ដើម្បីចាត់ការតាមនីតិវិធី។ ដោយឡែកបក្ខពួកដែលកំពុងរត់គេចខ្លួន សមត្ថកិច្ចជំនាញអាវុធហត្ថរាជធានីភ្នំពេញ កំពុងស្រាវជ្រាវឃាត់ខ្លួនបន្ត ដើម្បីនាំយកមកផ្តន្ទាទោសតាមច្បាប់៕