ភ្នំពេញ ៖ លោកណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានបញ្ជាក់ឱ្យដឹងថា នៅក្នុងឆមាសទី១ ឆ្នាំ២០២៥ មានក្រុមហ៊ុននិងរោងចក្រ ចំនួន៥២ ត្រូវបានក្រសួងបរិស្ថាន ផាកពិន័យ បញ្ជាឱ្យកែប្រែ និងខ្លះទៀតត្រូវបានផ្អាកដំណើរការទាំងស្រុងតែម្តង ក្រោយរកឃើញក្រុមហ៊ុនទាំងនោះ បញ្ចេញសំណល់ធ្វើឱ្យប៉ះពាល់ដល់បរិស្ថាន។
ថ្លែងប្រាប់ក្រុមអ្នកសារព័ត៌មាន កាលពីព្រឹកថ្ងៃទី២៧ ខែសីហា ឆ្នាំ២០២៥ លោកបណ្ឌិត អ៊ាង សុផល្លែត បានឱ្យដឹងថា “ក្រុមហ៊ុនចំនួន ៥២ ត្រូវបានក្រសួងផាកពិន័យ ហើយក្រុមហ៊ុនខ្លះដែលបំពុលខ្លាំង យើងបានឱ្យគាត់សងសំណង់ សម្អាតទឹកឲ្យស្អាតវិញធ្ងន់តែម្តង អត់លើក លែងទេ ឱ្យធ្ងន់ជាទីបំផុត ដើម្បីឱ្យក្រុមហ៊ុនដទៃទៀតកុំធ្វើតាម តែធ្វើតាមផាក ឱ្យបង់សំណងឱ្យធ្ងន់”។
បើតាមរដ្ឋមន្ក្រីក្រសួងបរិស្ថាន បានបញ្ជាក់ថា ការផាកពិន័យ គឺដើម្បីកុំឱ្យធ្វើខុសទៅទៀត ដែលនាំឲ្យទឹកស្អាត មិនស្អាតទេ សុខភាពប្រជាជនរងគ្រោះ។ ឧទាហរណ៍ បើទឹកបំពុលតែ ១លីត្រ ចូលទឹកស្អាត ប្រជាជនប៉ុន្មាននាក់ទៅដែលឈឺ ព្យាបាលជំងឺអស់ប៉ុន្មាន? ហើយបើបាត់បង់ជីវិត ជីវិតថ្លៃជាងអ្វីៗទាំងអស់ គ្មានអ្វីទិញបានទេ។
សូមជម្រាបថា មកទល់ពេលនេះ មន្ត្រីជំនាញនៃក្រសួងបរិស្ថាន បានរកឃើញរោងចក្រ សហគ្រាស ៥២កន្លែង បានបញ្ចេញសំណល់រាវមានជាតិពុល ប៉ះពាល់ប្រភពទឹកសាធារណៈ។ រោងចក្រល្មើសទាំងនោះ ត្រូវបានក្រសួងបរិស្ថាន ចាត់វិធានការតាម “ក្រមបរិស្ថាន និងធនធានធម្មជាតិ” ដូចជា ពិន័យអន្តរការណ៍ ផ្អាកផលិតកម្ម និងតម្រូវឱ្យរោងចក្ររៀបចំអាងប្រព្រឹត្តកម្មសំណល់រាវ តាមស្តង់ដារ មុននឹងឱ្យដំណើរការវិញជាដើម៕