ភ្នំពេញ ៖ ជនដៃដល់ជាឃាតករចិត្តកំណាចដែលធ្វើសកម្មភាពចាក់សម្លាប់ស្ត្រីម្នាក់ នៅក្នុងបន្ទប់ទឹក នៃសណ្ឋា គារណាហ្គា១ កាលពីឆ្នាំ២០២៣ នោះ ត្រូវកម្លាំងនាយកដ្ឋាននគរបាលព្រហ្មទណ្ឌស្រាវជ្រាវឃាត់ខ្លួនបាន ក្រោយពីព្យាយាមរត់គេចខ្លួនអស់រយៈពេលជាង២ឆ្នាំ។
ប្រតិបត្តិការចាប់ខ្លួនជាឃាតករនេះ បានធ្វើឡើង កាលពីថ្ងៃទី២៨ ខែសីហា ឆ្នាំ២០២៥ នៅចំណុចភូមិព្រែកស៊ឹង សង្កាត់សំពៅពួន ក្រុងសំពៅពូន ខេត្តកណ្តាល។
ជនត្រូវចោទជាឃាតករ ដែលត្រូវសមត្ថកិច្ចចាប់ឃាត់ខ្លួន មានឈ្មោះសេង ពៅ ភេទប្រុស អាយុ២៥ឆ្នាំ ស្នាក់នៅបន្ទប់ជួល ផ្លូវលេខ១៩៧៤ សង្កាត់ភ្នំពេញថ្មី ខណ្ឌសែនសុខ។ ចំណែកស្ត្រីរងគ្រោះ មានឈ្មោះអ៊ឹង ជុងហ្គិច អាយុ៣៧ឆ្នាំ ប្រកបរបរជាអ្នករកស៊ីទទួលបញ្ចាំ នៅក្នុងកាស៊ីណូណាហ្គាវើលដ៍។
តាមប្រភពសមត្ថកិច្ច បានឱ្យដឹងថា ដោយអនុវត្តតាមបទរបស់នាយឧត្តមសេនីយ៍ ស ថេត អគ្គស្នងការនគរ បាលជាតិ និងលោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ្ប នៅថ្ងៃទី២៨ ខែសីហា ឆ្នាំ២០២៥នេះ លោកឧត្តមសេនីយ៍ត្រី ខេង ម៉េងឈាង អនុប្រធាននាយកដ្ឋាន បានដឹកនាំកម្លាំងជំនាញ សហ ការជាមួយស្នងការដ្ឋាននគរបាលខេត្តកណ្តាល ចាប់ខ្លួនជនដៃដល់ម្នាក់ ពាក់ព័ន្ធករណីឃាតកម្មសម្លាប់ស្ត្រីម្នាក់ នៅបន្ទប់ទឹកនៃសណ្ឋាគារណាហ្គា១ កាលពីឆ្នាំ២០២៣។
ប្រភពដដែល បន្តថា ការចាប់ខ្លួននេះ ធ្វើឡើងដោយអនុវត្តតាមដីកាបង្គាប់ឱ្យចាប់ខ្លួន-ឃុំខ្លួន លេខ១២០២ (ឆ.១) ដ.ច.ន/២៤ ចុះថ្ងៃទី១ ខែសីហា ឆ្នាំ២០២៤ របស់លោកហម ម៉េងសែ ប្រធានក្រុមប្រឹក្សាជំនុំជម្រះ នៃសាលាដំបូងរាជធានីភ្នំពេញ លើឈ្មោះសេង ពៅ ភេទប្រុស អាយុ២៥ឆ្នាំ ជនជាតិខ្មែរ អាសយដ្ឋានបន្ទប់ជួល ផ្លូវលេខ១៩៧៤ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ពីបទ “ឃាតកម្ម និងលួចមានស្ថានទម្ងន់ ទោសដោយសារការប្រព្រឹត្តិអំពើហិង្សា”។
ជនដៃដល់ត្រូវបានចាប់ខ្លួននៅចំណុចភូមិព្រែកស៊ឹង សង្កាត់សំពៅពួន ក្រុងសំពៅពូន ខេត្តកណ្តាល។ បច្ចុប្បន្នបានបញ្ជូនមកកាន់នាយកដ្ឋាននគរបាលព្រហ្មទណ្ឌ ដើម្បីចាត់ការបន្តតាមនីតិវិធី។
គួររំឭកថា ស្ត្រីរងគ្រោះឈ្មោះអ៊ឹង ជុងហ្គិច ត្រូវឃាតករចាក់សម្លាប់ កាលពីម៉ោង១០យប់ ថ្ងៃទី១៦ ខែមករា ឆ្នាំ២០២៣ នៅក្នុងបន្ទប់ទឹក ជាន់ទី១ អគារណាហ្គាវើលដ៍១ ស្ថិតក្នុងសង្កាត់ទន្លេបាសាក់ ខណ្ឌចម្ការមន ។ ករណីនេះ ត្រូវបានសង្ស័យថា ជាករណីប្លន់ទ្រព្យសម្បត្តិ ប្រមាណជាង ៦០ម៉ឺនដុល្លារ ខណៈដែលក្រុមគ្រួសារអះអាងថា ក្រោយពីប្រទះឃើញសព ទ្រព្យសម្បត្តិ លុយកាក់ និងគ្រឿងអលង្ការនៅលើខ្លួនសព ត្រូវបានបាត់បង់អស់ គ្រាន់តែមិនទាន់អាចកំណត់ច្បាស់នៅឡើយថា មានចំនួនប៉ុន្មានឱ្យប្រាកដ៕