ខេត្តសៀមរាប ៖ យុវជនជាបេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ១រូប ប្រឹងទន្ទេញមេរៀនប្រឡង ដល់យប់ជ្រៅពេក លុះទៀបភ្លឺ ក្រោកងូតទឹក រៀបចំខ្លួនចេញទៅប្រឡង ស្រាប់តែងងឹតមុខដួល បោកក្បាលសន្លប់ ត្រូវបានក្រុមគ្រួសារដឹកបញ្ជូនទៅសម្រាកនៅមន្ទីរពេទ្យឯកជន បានធូរស្រាលបន្តិច ក៏សុំពេទ្យចេញទៅប្រឡងបន្ត តែនៅឈឺក្បាលមិនឈប់ និងត្រូវបានគ្រូពេទ្យប្រចាំមណ្ឌល ពិនិត្យឃើញថា មិនអាចប្រឡងបាន ក៏បញ្ជូនត្រឡប់ទៅកាន់មន្ទីរេពេទ្យវិញ ដើម្បីព្យាបាលបន្ត។
ហេតុការណ៍គ្រោះថ្នាក់ ដួលបោកក្បាលសន្លប់នេះ បានកើតឡើងកាលពីវេលាម៉ោង ៥និង២០នាទី ទៀបភ្លឺ ថ្ងៃទី២៩ ខែសីហា ឆ្នាំ២០២៥ នៅចំណុចបន្ទប់ជួល មួយកន្លែង ក្នុងក្រុងសៀមរាប។
យុវជនរងគ្រោះ មានឈ្មោះដូង ពនេអព្យា ភេទប្រុស ជាបេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) មណ្ឌលប្រឡង ១០មករា ១៩៧៩ ក្នុងក្រុងសៀមរាប បន្ទប់លេខ២៩ លេខតុ៧១៤។
តាមប្រភពព័តមានពីអង្គភាពប្រឆាំងអំពើពុករលួយ បានឱ្យដឹងថា កាលពីវេលាម៉ោង ៧និង៣០នាទីព្រឹក ថ្ងៃទី២៩ ខែសីហា ឆ្នាំ២០២៥ បេក្ខជនឈ្មោះដូង ពនេអព្យា ភេទប្រុស បន្ទប់លេខ២៩ លេខតុ៧១៤ ត្រូវបានបញ្ជូនតាមរថយន្តសង្គ្រោះ មកមណ្ឌលប្រឡង ក្នុងស្ថានភាពធ្ងន់ធ្ងរ បាត់បង់ស្មារតី។
តាមការផ្តល់ព័ត៌មានពីអាណាព្យាបាល បានឱ្យដឹងថា កាលពីយប់មិញ (យប់ថ្ងៃទី២៨ ខែសីហា ឆ្នាំ២០២៥) បេក្ខជន ដូង ពនេអព្យា បានដួលប៉ះទង្គិចក្បាល នៅកន្លែងស្នាក់នៅ ហើយបានចូលសម្រាកនៅមន្ទីរពេទ្យឯកជនមួយ នៅក្នុងខេត្តសៀមរាប។ លុះព្រឹកឡើង អាណា ព្យាបាល បានទាក់ទងមកមណ្ឌល សុំការអនុញ្ញាតដើម្បីឱ្យបេក្ខជនចូលប្រឡង តែក្រោយពីបញ្ជូនមកមណ្ឌលប្រឡង គ្រូពេទ្យប្រចាំមណ្ឌល បានពិនិត្យឃើញថា បេក្ខជនមិនអាចប្រឡងបានទេ ហើយត្រូវបានបញ្ជូនទៅមន្ទីរពេទ្យបង្អែកខេត្តសៀមរាប ដើម្បីបន្តការព្យាបាល។
តាមប្រភពបុរសជាឪពុករបស់យុវជនខាងលើ បានឱ្យដឹងថា កូនរបស់គាត់ ងងឹតមុខ ដួលសន្លប់ នៅវេលាម៉ោង៥និង២០នាទីព្រឹក ថ្ងៃទី២៩ ខែសីហា ឆ្នាំ២០២៥ នៅក្បែរបន្ទប់ទឹក ផ្ទះជួល ១កន្លែង ខណៈពេលដែលរៀបចំប្តូរសម្លៀកបំពាក់ទៅប្រឡង ថ្ងៃទី២ នៅមណ្ឌលប្រឡង ១០មករា ១៩៧៩ ក្នុងក្រុងសៀមរាប។ អាការនេះ ប្រហែលជាកូនគាត់ប្រឹងទន្ទេញមេរៀនដល់យប់ជ្រៅពេក។ បន្ទាប់ពីមានហេតុការណ៍នេះកើតឡើង ក្រុមគ្រូ ពេទ្យសង្គ្រោះបន្ទាន់ និងគណៈកម្មការរៀបចំការប្រឡង បានចាត់ចែងឱ្យបេក្ខជនរូបនេះ ប្រឡងជាលក្ខណៈពិសេសរហូតដល់២ដង តែដោយបេក្ខជននេះ នៅតែឈឺក្បាល ទើបក្រុមការងារសម្រេចបញ្ជូនមកសង្គ្រោះបន្ទាន់ ជាលើកទី២ នៅមន្ទីរពេទ្យបង្អែកសៀមរាប បន្តទៀត។
បុរសជាឪពុក បានបង្ហោះសរសេរក្នុងទំព័របណ្តាញសង្គម ហ្វេសប៊ុក របស់ខ្លួន នៅថ្ងៃទី២៩ ខែសីហា ឆ្នាំ២០២៥ ប់ថា “រយៈពេល ១២ឆ្នាំ (ពីថ្នាក់ទី១ ដល់ទី១២) លទ្ធផលសិក្សា កូនប៉ាបានល្អប្រសើរ ជាប្រចាំ ហើយថែមទាំងធ្លាប់សច្ចានឹងប៉ាម៉ាក់ថា កូននឹងប្រឡងបាក់ឌុប យកនិទ្ទេសល្អ ឱ្យបាន។ ថ្ងៃទី១ នៃការប្រឡង កូនធ្វើបានល្អ តែថ្ងៃទី២ រឿងនឹកស្មានមិនដល់ បានកើតឡើងចំពោះកូនប៉ា។ សុំឱ្យកូនឆាប់ជា សំណាងល្អក្នុងជីវិត ហើយសង្ឃឹមថា ឱកាសប្រឡងឆ្នាំក្រោយ នឹងគ្មានឧបសគ្គអ្វីមករារាំងយើងទៀតឡើយ…”៕