ខេត្តបាត់ដំបង ៖ វីរកងទ័ពជួរមុខ មួយរូប គឺលោកវរសេនីយ៍ទោ ឡាក់ រស្មី មេបញ្ជាការវរសេនាតូចកាំភ្លើងធំ ចំណុះកងពលធំអន្តរាគមន៍លេខ៣ ឈរជើងនៅប្រាសាទព្រះវិហារ បានទទួលមរណភាព ដោយសារផ្សែងពុលរបស់ទាហានសៀម។
តាមប្រភពរដ្ឋបាលខេត្តបាត់ដំបង បានឱ្យដឹងកាលពីយប់ថ្ងៃទី២៨ ខែសីហា ឆ្នាំ២០២៥ ថា កាលពីរសៀលថ្ងៃទី២៨ ខែសីហា ឆ្នាំ២០២៥ ប្រតិភូរដ្ឋបាលខេត្តបាត់ដំបង និងប្រតិភូសាខាកាកបាទក្រហមកម្ពុជា ខេត្តបាត់ដំបង ដឹកនាំដោយលោកសុខ លូ អភិបាលខេត្ត និងជាប្រធានគណៈកម្មាធិការសាខាខេត្ត និងសហការី បាននាំយកសារលិខិតរំលែកមរណទុក្ខដ៏ក្រៀមក្រំ ជូនក្រុមគ្រួសារសព ព្រោះការបាត់បង់លោកវរសេនីយ៍ទោ ឡាក់ រស្មី មេបញ្ជាការវរសេនាតូចកាំភ្លើងធំ ចំណុះកងពលធំអន្តរាគមន៍លេខ៣ ឈរជើងនៅប្រាសាទព្រះវិហារ បានទទួលមរណភាព កាលពីថ្ងៃទី២៦ ខែសីហា ឆ្នាំ២០២៥ ក្នុងជន្មាយុ៥៣ឆ្នាំ ដោយសារផ្សែងពុលរបស់ទាហានសៀម។
ការពលីជីវិតរបស់លោកវរសេនីយ៍ទោ ឡាក់ រស្មី គឺជាការបាត់បង់នូវកូនស្វាមី ឪពុក ដែលប្រកបដោយសង្គហ ធម៌ដ៏ឧត្តុង្គឧត្តមចំពោះឪពុកម្តាយ ភរិយា និងជាការបាត់បង់ឪពុកប្រកបដោយព្រហ្មវិហារធម៌ចំពោះកូនៗ ហើយក៏ជាការបាត់បង់នាយទាហានស្នេហាជាតិ ដ៏បរិសុទ្ធ ដែលបានលះបង់អស់ពីកម្លាំងកាយ បញ្ញាស្មារតី និងបានធ្វើពលីកម្មគ្រប់បែបយ៉ាង ដើម្បីបុព្វហេតុជាតិ សាសនា ព្រះមហាក្សត្រ នៅគ្រប់កាលៈទេសៈ សំដៅរួមចំណែកយ៉ាងមោះមុត នៅក្នុងបុព្វហេតុការពារអធិបតេយ្យ និងបូរណភាពទឹកដី ដើម្បីសេចក្តីសុខក្សេមក្សាន្តរបស់ប្រជាជនកម្ពុជា នៃយើង។
ជាមួយគ្នានេះ សាខាកាកបាទក្រហមកម្ពុជាខេត្ត ក៏បាននាំយកគ្រឿងឧបភោគ បរិភោគ និងថវិកាមួយចំនួន ចូលបុណ្យសពលោកវរសេនីយ៍ទោ ឡាក់ រស្មី ផងដែរ៕