ខេត្តកំពង់ស្ពឺៈ ស្ត្រីជាភរិយាវីរកងទ័ពម្នាក់ដែលកំពុងឈរជើងនៅសមរភូមិជួរមុខ បានកើតមានអាការគាំងបេះដូងស្លាប់ គ្រាដែលប្តីកំពុងបំពេញបេសកកម្មការពារបូរណភាពទឹកដី នៅតំបន់សមរភូមិប្រាសាទតាមាន់។ហេតុការណ៍ដ៏សោកសង្រេងនេះ បានកើតឡើងកាលពីថ្ងៃទី២៨ ខែសីហា ឆ្នាំ២០២៥ នៅចំណុចភូមិដកពរ ឃុំវល្លិស ស្រុកសំរោងទង ខេត្តកំពង់ស្ពឺ។
ស្ត្រីរងគ្រោះដែលគាំងបេះដូងស្លាប់ មានឈ្មោះទូច ចិន្តា អាយុ៣២ឆ្នាំ មានលំនៅក្នុងភូមិដកពរ ឃុំវល្លិស ស្រុកសំរោងទង ខេត្តកំពង់ស្ពឺ និងមានស្វាមីជាវីរកងទ័ពជួរមុខ ឈ្មោះលោកអនុសេនីយ៍ទោ សំ ស៊ីណា មានតួនាទីជានាយក្រុមកាំភ្លើងធំ ប្រចាំការនៅទិសទី៣ ប្រាសាទតាមាន់ ខេត្តឧត្តរមានជ័យ។
តាមប្រភពព័ត៌មាន បានឱ្យដឹងថា លោកអនុសេនីយ៍ទោ សំ ស៊ីណា និងភរិយា ឈ្មោះទូច ចិន្តា បានរួមរស់ជាប្តីប្រពន្ធ និងបង្កើតបានកូនប្រុសម្នាក់ ទើបនឹងអាយុ៦ឆ្នាំប៉ុណ្ណោះ។ លុះមកដល់ថ្ងៃទី២៨ ខែសីហា ឆ្នាំ២០២៥ ខណៈដែលស្វាមីកំពុងជាប់បេសកកម្មការពារបូរណភាព ទឹកដី ពីសត្រូវចោរសៀមឈ្លានពាន នៅតំបន់សមរ ភូមិប្រាសាទតាមាន់ ខេត្តឧត្តរមានជ័យ ស្រាប់តែស្ត្រីជាប្រពន្ធ ឈ្មោះទូច ចិន្តា បានកើតមានអាការជំងឺគាំងបេះដូង បណ្តាលឱ្យស្លាប់ចោលស្វាមី និងកូនប្រុសអាយុ៦ឆ្នាំ។
សពស្ត្រីជាភរិយាវីរកងទ័ពខាងលើ ត្រូវបានក្រុមគ្រួសាររៀបចំធ្វើបុណ្យតាមប្រពៃណី នៅភូមិដកពរ ឃុំវល្លិស ស្រុកសំរោងទង ខេត្តកំពង់ស្ពឺ៕