ភ្នំពេញ ៖ គ្រឹះស្ថានអង្គរ បានប្រកាសឱ្យដឹងថា ក្នុងរយៈពេល ៨ខែ ឆ្នាំ២០២៥នេះ កម្ពុជា រកចំណូលបានជាង ៣១លានដុល្លារ ពីការលក់សំបុត្រចូលទស្សនារមណីយដ្ឋានអង្គរ។
គ្រឹះស្ថានអង្គរ បានបញ្ជាក់ថា រយៈពេល ៨ខែ ឆ្នាំ២០២៥ នេះ ការលក់សំបុត្រចូលទស្សនារមណីយដ្ឋានអង្គរ ប្រាសាទកោះកេរ ទទួលបានចំណូលសរុប ៣១ ០៦៨ ៧៤៣ដុល្លារ ពីភ្ញៀវទេសចរបរទេស ចំនួន៦៦៩ ៦១៩នាក់ កើនឡើង ២,៧២ភាគរយ។
គ្រឹះស្ថានអង្គរ បានឱ្យដឹងទៀតថា ក្នុងរយៈពេល ៨ខែ ឆ្នាំ២០២៥ នេះ មានភ្ញៀវទេសចរបរទេស ១៣ ៧៧៩នាក់ បានចូលទស្សនាប្រាសាទកោះកេរ ដោយទទួលបានចំណូល ២០៦ ៦៨៥ដុល្លារ។
បន្ថែមពីនេះ ក្នុងរយៈពេល ៨ខែនេះ ការលក់សំបុត្រនៅប្រាសាទបេងមាលា ទទួលបានចំណូល ១០១ ៨៥០ ដុល្លារ ពីភ្ញៀវចំនួន ១០ ០៨០នាក់។ ការលក់សំបុត្រនៅភ្នំក្បាលស្ពាន ទទួលបានចំណូល ៤ ០៥០ដុល្លារ ពីភ្ញៀវចំនួន ៨១០នាក់ និងចំណូលពីការលក់សំបុត្រទូក មានចំនួន ៤២៣ ៩២៦ដុល្លារ។
សូមជម្រាបថា រយៈពេល ៨ខែ ឆ្នាំ២០២៥នេះ គ្រឹះស្ថានអង្គរ ឧបត្ថម្ភមូលនិធិគន្ធបុប្ផាកម្ពុជា ចំនួន ១ ៣៣៩ ២៣៨ដុល្លារ៕