ភ្នំពេញៈលោកគួច ខេវិន បានចាប់អារម្មណ៍ចំពោះប្រតិកម្មស្រោចលើលោកផែង វណ្ណៈ ពីមេបញ្ជាការកងរាជ អាវុធហត្ថ២៤ ខេត្តរាជធានី ថ្កោលទោសលោកវណ្ណៈ ដោយលោកខេវិន លើកឡើងថាប្រសិនបើ អ. ហ ស្រុះគ្នាបង្ក្រាបបទល្មើសព្រៃឈើឱ្យបានខ្លាំងក្លាយ៉ាងអីចឹង តាំងពីមុនកើតរឿង ម្លេះមិនដឹងជាល្អយ៉ាងណាទេ។ជាមួយគ្នានេះដែរលោកគួច ខេវិន បានលើកជាចម្ងល់ថា«អ្នកការពារខុស ឬអ្នកកាងត្រូវ ?»។
លោកគួច ខេវិន អ្នកផលិតកម្មវិធីជាន់ខ្ពស់ល្បីឈ្មោះម្នាក់បញ្ចេញសារនៅលើគណនីហ្វេសបុករបស់លោកនៅព្រឹកថ្ងៃទី២៩ ខែវិច្ឆិកា ថា«មន្ត្រីកងរាជអាវុធគ្រប់កន្លុកកន្លៀតកៀនកោះពាសពេញទិសទីនាំគ្នីនាំគ្នាចេញញត្តិថ្កោលទោស លោកផែង វណ្ណៈ ដែលប៉ប៉ាច់ប៉ប៉ោច បោចទាញ រំលើកបើកកកាយរឿងមន្ត្រី អ. ហ ម្នាក់នៅខេត្តក្រចេះដែលគេថានាំឱ្យប៉ៈពាល់ដល់កិត្តយសនិងសេចក្តីថ្លៃថ្នូរ របស់ អ .ហ ពេញម៉ាប្រទេស ទាំងដែលលោកផែង វណ្ណៈ បានសុំទោស ចំពោះលោកពូ ហើយក៏ដោយ ។ គួរឱ្យកោតសរសើរដែលកង អ. ហ ស្រុះគ្នាភ្លូកទឹកភ្លូកដី ចេញមកការពារនូវកិត្យានុកូលភាពរបស់ខ្លួនយ៉ាងគគ្រឹកគគ្រេងយ៉ាងដូច្នេះ គឺពិតជាខ្លាំងក្លាមែន មិនសរសើរមិនបាន តែបើស្រុះគ្នាបង្ក្រាបបទល្មើសព្រៃឈើឱ្យបានខ្លាំងក្លាយ៉ាងអីចឹង តាំងពីមុនកើតរឿង ម្លេះមិនដឹងជាល្អយ៉ាងណាទៀតទៅហ្ន? ប៉ុន្តែមហាជនពេញម៉ាប្រទេសដែរ ចេះចាំមើលរឿងរ៉ាវដែលមិនមានចំ ណងជើងហ្នឹងវាវិវឌ្ព្យន៍ ទៅជាអាម៉េចទៀត? ចម្ងល់ត្រង់ថាអ្នកការពារខុស ឬអ្នកកាងត្រូវ ?ចំពោះរឿងបទ ល្មើសព្រៃឈើដ៏រ៉ាំរៃនេះ ? ដំរី ងាប់ យកកញ្ច្រែងរែងកន្ទក់មកបាំង ជិតឬអត់? ក្លិនខ្មោចដំរីស្អុយរលួយអសោចពេញភូមិ យកផាវមួយគ្រាប់មកដុត បន្លប់ក្លិនបានប្រយោជន៍ដែរហ្អត់? ហ្អើយ!!! ចាំមើលទៀតទៅ ?»។
គួរបញ្ជាក់ថាប្រតិកម្មរបស់លោកគួច ខេវិន នាពេលនេះកើតមានបន្ទាប់ពីលោកផែង វណ្ណៈ បានលើកឡើងពីការLive ផ្ទាល់កាលពីយប់ថ្ងៃទី២៦ ខែវិច្ឆិកា ឆ្នាំ ២០២៥ និយាយប៉ះពាល់ដល់ឧត្តមសេនីយ៍សាក់ សារាំង មេបញ្ជាការកងអាវុធហត្ថខេត្តក្រចេះ ហើយនៅរសៀលថ្ងៃទី២៧ ខែវិច្ឆិកា នាយឧត្តមសេនីយ៍ត្រីអេង ហ៊ី អ្នកនាំពាក្យកងរាជាអាវុធហត្ថលើផ្ទៃប្រទេសបានចេញញាត្តិថ្កោលទោស និងសុំឲ្យលោកផែង វណ្ណៈ ធ្វើការបកស្រាយ និងធ្វើការបង្ហាញភស្ដុតាងជាសាធារណៈចំពោះពាក្យសំដីដែលលោកបានផ្សព្វផ្សាយនិងការជេរប្រមាថលើកងរាជអាវុធហត្ថ។ភ្លាមៗនោះលោកផែង វណ្ណៈ បានបកស្រាយថារឿងលោកនិយាយនោះមិនមែនសំដៅដល់ស្ថាប័ន កងរាជអាវុធហត្ថលើផ្ទៃប្រទេសទេ ប៉ុន្ដែលោកផ្ដោតតែលើលោកសាក់ សារាំង ម្នាក់ប៉ុណ្ណោះ ដើម្បីស្វែងរកយុត្តិធ័មឲ្យលោកតាំង គីមសួរ ហើយបើបុគ្គលខាងលើថាលោកនិយាយមិនពិតអាចប្ដឹងលោកបាន ខណៈលោកហ៊ានប្រឈមមុខច្បាប់។ជាមួយគ្នានេះដែរលោកផែន វណ្ណៈ ក៍បានធ្វើការសុំទោសជាសា ធារណៈចំពោះឯកឧត្តម នាយឧត្តមសេនីយ៍សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសផងដែរ ចំពេលដែនមានប្រតិកម្មស្រោចចេញញាត្តិថ្កោលទោសលោកពីកងរាជអាវុធហត្ថគ្រប់ខេត្តក្រុង ។សម្រាប់លោកខេវិន ដែលជាអ្នកស្រលាញ់បរិស្ថានធម្មជាតិ ធនធានធម្មជាតិ និងធ្លាប់បណ្ដុះ-ដាំកូនឈើរាប់រយពាន់ដើមនៅតំបន់អេកូរទេសចរណ៍ធម្មជាតិជីផាក ខេត្តកោះកុង ព្រមទាំងបានទិញដីជាច្រើនហិកតា សម្រាប់ដាំកូនឈើនៅទីនោះដែរ ហាក់ភ្ញាក់ផ្អើលខ្លាំងចំពោះកងរាជ អាវុធហត្ថស្រុះគ្នាចេញញាត្តិថ្កោលទោលលើលោកផែឬង វណ្ណៈ នាពេលនេះ។សាររបស់លោកគួច ខេវិន ខាងលើត្រូវបានអ្នកលេងបណ្ដាញសង្គម លើកឡើងថាលោកចង់ឃើញកងរាជអាវុធហត្ថ ពួតដៃគ្នាធ្វើការការពារព្រៃឈើ ឲ្យដូចសម្រុកគ្នាថ្កោលទោសលើលោកផែង វណ្ណៈ នាពេលនេះ៕
