ភ្នំពេញៈ ដើម្បីជាការអបអរសាទរដល់ទិវាពិភពលោកប្រយុទ្ធនឹងជំងឺអេដស៍ ឆ្នាំ២០២៥ អង្គការ AHF កម្ពុជានឹងរៀបចំព្រឹត្តិការណ៍នៅទីតាំងសួនច្បាវត្តបទុមវតីនៅរសៀលទី៣០ខែវិច្ឆិកា ឆ្នាំ២០២៥ បញ្ជាក់ច្បាស់ថា៖ការបញ្ចប់មេរោគអេដស៍/ជំងឺអេដស៍មិនទាន់បានចប់នៅឡើយទេ ជាក់ស្តែងដោយការឆ្លងថ្មីចំនួន១លាន៣សែនករណីកើតឡើងទូទាំងពិភពលោកជារៀងរាល់ឆ្នាំ។ ព្រឹត្តិការណ៍នេះនឹងលើកកម្ពស់ការយល់ដឹង ការបង្ការ ការធ្វើតេស្ត និងការថែទាំ ខណៈពេលដែលបង្ហាញពីការចូលរួមជាមួយអ្នកដែលរងផលប៉ះពាល់ដោយមេរោគអេដស៍/ជំងឺអេដស៍នៅក្នុងសហគមន៍ និងអ្នកពាក់ព័ន្ធសំខាន់ៗ។ ទិវាពិភពលោកប្រយុទ្ធនឹងជំងឺអេដស៍ ត្រូវបានប្រារព្ធជារៀងរាល់ឆ្នាំនៅថ្ងៃទី ១ខែធ្នូ។
ទោះបីជាមានវឌ្ឍនភាពជាច្រើនទសវត្សរ៍ក្នុងការប្រយុទ្ធនឹងមេរោគអេដស៍ក៏ដោយ ក៏មនុស្សប្រហែល៤០លាននាក់នៅទូទាំងពិភពលោកកំពុងរស់នៅជាមួយមេរោគអេដស៍នេះ ដោយជាងពាក់កណ្តាល ដែលជាអ្នករងផលប៉ះពាល់ជាស្ត្រី និងក្មេងស្រី ។
ការមាក់ងាយ និងការរើសអើងនៅតែបន្តរារាំងបុគ្គលជាច្រើនពីការទទួលបានការថែទាំចាំបាច់ ខណៈដែលប្រជាជនគោលដៅប្រឈមមុខនឹងឧបសគ្គជាចំបងចំពោះទទួលបានការថែទាំ និងការព្យាបាល។ ព្រឹត្តិការណ៍ទិវាពិភពលោកប្រយុទ្ធនឹងជំងឺអេដស៍នេះនឹងគូសបញ្ជាក់ពីបញ្ហាប្រឈមជាច្រើនដែលកំពុងបន្ត និងពង្រឹងសារៈសំខាន់ ដែលជាការងារចម្បងនៃការខិតខំប្រឹងប្រែងក្នុងការឆ្លើយតបមេរោគអេដស៍/ជំងឺអេដស៍ ក្នុងការងារសុខភាពសាធារណៈជាតិ និងសកលលោក។
ព្រឹត្តិការណ៍ទិវាអេដស៍ពិភពលោករបស់ AHF កម្ពុជា ដោយសហការជាមួយអាជ្ញាធរជាតិប្រយុទ្ធនឹងជំងឺអេដស៍ និងអង្គការដៃគូនឹងរួមមាន ការដង្ហែក្បួន ការសំដែងសិល្បៈ ការធ្វើតេស្ត រៀបចំឡើងនៅសួនច្បារវត្តបទុមវតី រាជធានីភ្នំពេញ។ ព្រឹត្តិការណ៍នេះមានអ្នកចូលរួមជាង ៣០០នាក់រួមមាន ស្ថាប័នរដ្ឋាភិបាល អង្គការមិនមែនរដ្ឋាភិបាល អាជ្ញាធរមូលដ្ឋាន សហគមន៍ អ៊ីមផស សិស្ស និស្សិត អ្នកសារព័តមានជាច្រើនស្ថាប័ននិងអ្នកពាក់ព័ន្ធផ្សេងទៀត។
ព្រឹត្តិការណ៏ ៖ AHF កម្ពុជាប្រារព្ធទិវាពិភពលោកប្រយុទ្ធនឹងជំងឺអេដស៍ ឆ្នាំ២០២៥ ក៍មានការចូលរួមពីគណៈ អធិបតីតាមក្រសួងនិងស្ថាប័ន្ដពាក់ព័ន្ធមានដូចជា ឯកឧត្តមបណ្ឌិត ឈឹម ឃិន ដារ៉េត ជាអគ្គលេខាធិការនៃអាជ្ញាធរជាតិប្រយុទ្ធនឹងជំងឺអេដស៍, លោកជំទាវ បណ្ឌិត សឿ សុជាតា អនុរដ្ឋលេខាធិការក្រសួងអប់រំ យុវជន និងកីឡា (MoEYS) ,សាស្ត្រាចារ្យជំនួយ អ៊ុក វិជ្ជា ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍ និងសើស្បែក និងកាមរោគ(NCHADS),លោកវេជ្ជបណ្ឌិត ចន ផាន់ណា ប្រធានគ្រប់គ្រងកម្មវិធីប្រចាំប្រទេសអង្គ ការមូលនិធិថែទាំសុខភាពអ្នកជំងឺអេដស៍កម្ពុជា(AHF) ,តំណាង រាជរដ្ឋាភិបាល អង្គការមិនមែនរដ្ឋាភិបាល អាជ្ញាធរមូលដ្ឋាន សិស្សនិស្សិត និងអ្នកស្វែងរកការគាំទ្រ បណ្តាញក្មេងស្រី អ្នកស្ម័គ្រចិត្ត និងអ្នករស់នៅជា មួយមេរោគអេដស៍ ចំនួនជាង៣០០នាក់រូបភាពសម្រាប់ផ្សព្វផ្សាយ៖ នឹងមានស្តង់សម្រាប់ធ្វើតេស្ត ស្រោមអនាម័យ និងសម្ភារៈផ្សព្វផ្សាយ នៅថ្ងៃនៃព្រឹត្តិការណ៍ ។
លោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ីរបស់ AHF បានមានប្រសាសន៍ថា “តំបន់អាស៊ីជាចំណុចសំខាន់ក្នុងការឆ្លើយតបទៅនឹងជំងឺអេដស៍។ ទោះបីជាមានវឌ្ឍនភាពកន្លងមកក៏ដោយ ការឆ្លងមេរោគអេដស៍កើនឡើងក្នុងចំណោមប្រជាជនគន្លឹះ បានបង្ហាញថាការប្រយុទ្ធនៅមិនទាន់ទៅដល់ការបញ្ចប់មេរោគអេដស៍នៅឡើយទេ”។ «រដ្ឋាភិបាលត្រូវតែប្តេជ្ញាចិត្តឡើងវិញក្នុងការផ្តល់អាទិភាពដល់ការបង្ការ ការធ្វើតេស្ត និងការព្យាបាលសម្រាប់ទាំងអស់គ្នា ដោយធានាថាគ្មានសហគមន៍ណាមួយត្រូវបានទុកចោលឡើយជាពិ សេសនៅក្នុងស្ថានភាពដែលគម្លាតថវិកាកំពុងលេចឡើងដោយសារតែការផ្លាស់ប្តូរ ភូមិសាស្ត្រសេដ្ឋកិច្ច។ ទិវាអេដស៍ពិភពលោកនេះរំលឹកយើងថា មេរោគអេដស៍/ជំងឺអេដស៍ មិនទាន់បញ្ចប់នៅឡើយទេ ហើយសកម្មភាពប្រកបដោយចីរភាពគឺមានសារៈសំខាន់ណាស់ដើម្បីបញ្ចប់ជំងឺអេដស៍នៅក្នុងតំបន់របស់យើង»។
លោកវេជ្ជបណ្ឌិត ចន ផាន់ណា ប្រធានគ្រប់គ្រងកម្មវិធី AHF ប្រចាំប្រទេសបានមានប្រសាសន៍ថាៈ«យើងមិនអាចបញ្ចប់មេរោគអេដស៍/ជំងឺអេដស៍ដោយមិនបានបញ្ឈប់ការឆ្លងមេរោគអេដស៍ថ្មី ដោយគ្មានស្រោមអនាម័យនោះទេ»។ «ស្រោមអនាម័យមានប្រសិទ្ធភាព ហើយវាមានតម្លៃសមរម្យ ប៉ុន្តែជារឿយៗវាត្រូវបានគេមើលរំលង។ យើងស្វែងរកការគាំទ្រសម្រាប់ការទទួលបានស្រោមអនាម័យដោយឥតគិតថ្លៃ ឬដោយតម្លៃសមរម្យ និងការប្រើប្រាស់ត្រឹមត្រូវ ពីព្រោះបើគ្មានស្រោមអនាម័យទេ មនុស្សមិនអាចការពារសុខភាពរបស់ពួកគេបានទេ ហើយយើងនឹងមិនអាចប្រយុទ្ធនឹងមេរោគអេដស៍នៅក្នុងប្រទេស និងទូទាំងពិភពលោកបានទេ»។
ឯកឧត្តមបណ្ឌិត ឈឹម ឃិនដារ៉េត ជាអគ្គលេខាធិការនៃអាជ្ញាធរជាតិប្រយុទ្ធនឹងជំងឺអេដស៍ បានមាន ប្រសាស ន៍ថាសម្រាប់ប្រទេសកម្ពុជាអ្នកផ្ទុកមេរោគអេដស៍ប្រមាណ៧៦០០០នាក់ ឆ្លងថ្មី១២០០០នាក់នៅឆ្នាំ២០២៤ ស្លាប់១០០០នាក់ ប៉ុន្ដែបើធៀបទៅនិងពិភពលោកគឺប្រទេសកម្ពុជាទទួលជោគជ័យខ្ពស់ក្នុងការប្រយុទ្ធប្រឆាំងជំងឺអេដស៍។ឯកឧត្តមថានៅលើពិភពលោកមនុស្សជិត១០លាននាក់មិនទាន់ទទួលបានសេវ៉ាព្យាបាលនៅឡើយ ប៉ុន្ដែនៅប្រទេសកម្ពុជាការថែទាំ អ្នកផ្ទុកមេរោគអេដស៍គឺ១០០% ព្រោះយើងមានលទ្ធភាពគ្រប់គ្រាន់ក្នុងការផ្ដល់សេវ៉ាមាន៧៤កន្លែងគ្រប់គ្រាន់ ព្យាបាលដោយឥតគិតប្រាក់។ការឆ្លងអេដស៍យុវវ័យមានកម្រិតខ្ពស់អាយុពី១៥ ទៅ២៤ឆ្នាំមានរហូតដល់ទៅ៤៤% ។ឯកឧត្តមបញ្ជាក់ថាយុវវ័យជាអ្នកបន្ដវេនក្នុងការសម្រេចបាននូវចក្ខវិស័យរបស់រាជរដ្ឋាភិបាល ដែលប្រែក្លាយប្រទេសកម្ពុជាឲ្យក្លាយទៅជាប្រទេសដែលមានចំណូលខ្ពស់នៅឆ្នាំ២០៥០ ហេតុនេះដើម្បីសម្រេចចក្ខុវិស័យនេះយើងត្រូវការមូលធនមនុស្សគឺយុវវ័យ ។មូលធនមនុស្សប្រកបដោយគុណ ភាពខ្ពស់ទី១៖ ត្រូវតែមានចំណេះដឹង ការអប់រំ និងទី២៖ ត្រូវមានសុខភាពល្អ ។
អង្គការមូលនិធិថែទាំសុខភាពអ្នកជំងឺអេដស៍(AHF)គឺជាអង្គការមិនរកប្រាក់កម្រៃជាសាកលដែលផ្តល់សេវាមិនគិតពីលទ្ធភាពនៃការបង់ប្រាក់និងការតស៊ូមតិដល់មនុស្សជាង២.៧លាននាក់ក្នុងប្រទេសចំនួន៥០ នៅទូទាំងពិភពលោកក្នុងទ្វីបអាហ្រ្វិក អាមេរិក តំបន់អាស៊ីប៉ាស៊ីហ្វិក និងអឺរ៉ុប។ បច្ចុប្បន្ន(AHF)ជាអ្នកផ្តល់សេវាថែទាំសុខភាពនៅលើពិភពលោក ពីមេរោគអេដស៍/ជំងឺ អេដស៍ដ៏ធំបំផុត ដែលមិនស្វែងរកប្រាក់ចំណេញ៕
