ភ្នំពេញ៖យុវជន២នាក់ ត្រូវបានកម្លាំងអត្តរាគមន៍ខណ្ឌសែនសុខចាប់ឃាត់ខ្លួនដោយជាប់ពាក់ព័ន្ធរក្សាទុកអាវុធខុសច្បាប់តាមខ្លួន(ដាវសាមម៉ូរ៉ៃ)។ឃាត់ខ្លួនកាលពីម៉ោង០០និង៣០នាទីរំលងអាធ្រាត្យឈានចូលថ្ងៃទី៣០មិនា២០១៧នៅចំណុចផ្លូវបេតុងភូមិរោងចក្រសង្កាត់ភ្នំពេញថ្មីខណ្ឌសែនសុខ។
ជនសង្ស័យទី១ឈ្មោះស៊ឹម យ័ន្តស័ក្ត អាយុ១៨ឆ្នាំមុខរបរកម្មករលាងរថយន្តស្នាក់ក្នុង យានដ្ឋានយីហោគឹមសួរផ្លូវ១៩៨៦ភូមិភ្នំពេញថ្មីសង្កាត់ភ្នំពេញថ្មីខណ្ឌសែនសុខ។ ទី២ឈ្មោះ សុខ ចាន់រ៉ុម អាយុ១៨ឆ្នាំមុខរបរកម្មករលាងរថយន្តស្នាក់ក្នុងយានដ្ឋានយីហោគឹមសួរផ្លូវ១៩៨៦ ភូមិភ្នំពេញថ្មីសង្កាត់ភ្នំពេញថ្មីខណ្ឌសែនសុខ។
សមត្ថកិច្ចបានប្រាប់ថាមុនឃាត់ខ្លួនយុវជនខាងលើខណះដែលកម្លាំងអត្តរាគមន៍ខណ្ឌធ្វើការល្បាតក្នុងមូលដ្ឋានបានជួបយុវជនខាងលើកំពុងជិះម៉ូតូមួយគ្រឿងម៉ាកឌ្រឹមសង់សេ១២៥ពណ៌
ខ្មៅសេរី២០០៦ពាក់ស្លាកលេខភ្នំពេញ1R-4832 ដោយមានការសង្ស័យកម្លាំងសមត្ថកិច្ចបានហៅ អោយឈប់ធ្វើការត្រួតពិនិត្យលើដងខ្លួនយុវជនខាងលើឃើញដាវសាំម៉ូរ៉ៃមួយដើមលាក់ទុកក្នុងដៃអាវផ្នែកខាងស្តាំឈ្មោះ ស៊ឹម យ័ន្តស័ក្ត ភ្លាមនោះកម្លាំងសមត្ថកិច្ចធ្វើការដកហូតនិងឃាតមខ្លួន យុវជនទាំង២នាក់តែម្តងហើយយកមកធ្វើការសាកសួរ។
នៅចំពោះមុខសមត្ថកិច្ចយុវជនខាងលើបានសារភាពថាដាវសាមម៉ូរ៉ៃនេះពិតជារបស់ខ្លួនមែនដោយសៀតតាមដៃអាវដើរលេងពេលយប់និងទុកការពារខ្លួនប៉ុណ្ណោះ។
បច្ចុប្បន្នយុវជនខាងលើត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខរងចាំបញ្ជូនទៅសាលាដំបូងរាជធានីភ្នំពេញពេលក្រោយ៕