ភ្នំពេញ ៖ ម៉ូតូមួយគ្រឿង ខណៈដែលម្ចាស់ចតទុកដាក់ចាក់សោកត្រឹមត្រូវនៅក្រោម រវល់តែឡើងផ្សារដែកលើដំបូល ត្រូវបានជនសង្ស័យធ្វើសកម្មភាព កាច់សោកជិះយកទៅបាត់ ឌឺម្ចាស់ខណៈនៅលើដំបូល ឃើញហើយ បានត្រឹមស្រែក ចុះមិនទាន់ ជិះទៅបាត់ដោយសុវត្តិភាព កាលពីវេលាម៉ោង៨និង៥០នាទីព្រឹក ថ្ងៃទី០៤ ខែមេសា ឆ្នាំ២០១៧ ស្ថិតនៅការដ្ឋានសំណង់ ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ ។
ជនរងគ្រោះ ឈ្មោះ ប៊ុយ ក្រឹម ភេទប្រុស អាយុ២៩ឆ្នាំ មុខរបរជាងផ្សារដែក ស្នាក់នៅផ្ទះជួលភូមិព្រែកហូរលិច សង្កាត់ព្រែកហូរ ក្រុងតាខ្មៅ ខេត្តកណ្តាល មានស្រុកកំណើតភូមិអំពៅព្រៃ ឃុំចំបក់ ស្រុកស្វាយជ្រុំ ខេត្តស្វាយរៀង ។ ចំណែកម៉ូតូ ជនសង្ស័យលួចយកទៅបាត់ ម៉ាក ហុងដា សេ១២៥ សេរី២០១១ ពណ៌ខ្មៅ ពាក់ស្លាកលេខ ស្វាយរៀង 1D- 8619 ។
តាមការរៀបរាប់ពីបុរសរងគ្រោះបានឲ្យដឹងថា បន្ទាប់ពីមកធ្វើការងារ ត្រង់ការដ្ឋានខាងលើ ម៉ូតូបានចតទុកដាក់ មុខសំណង់ រាល់ថ្ងៃ ពេលល្ងាចទើបវិលត្រឡប់ទៅផ្ទះជួលវិញ លុះនៅព្រឹកថ្ងៃកើតហេតុ ម៉ូតូចតទុកដូចសព្វដងជាមួយម៉ូតូ កម្មករផ្សេងទៀត ហើយរវល់តែឡើងផ្សារដែកលើដំបូលផ្ទះ ស្រាប់តែនៅម៉ោងខាងលើ ជនសង្ស័យមកកាច់សោកម៉ូតូ ឃើញដែរ តែខ្លួននៅលើដំបូលផ្ទះ បានត្រឹមស្រែក អត់មានមនុស្សក្បែរខាង ទម្រាំចុះមកដល់ដី ជនសង្ស័យ បបោលទៅបាត់ដោយសុវត្តិភាព ។
ក្រោយកើតហេតុជនរងគ្រោះ បានត្រឹមរត់ទៅប្តឹង នគរបាលប៉ុស្តិ៍ចោមចៅ ឲ្យជួយប្រាសស្រាវជ្រាវ តាមស្វែងរកនិងកំណត់មុខសញ្ញា ៕