អាកាសធាតុក្តៅហែង ទោះមានសុខភាពល្អយ៉ាងណាក៏អាចកើតខ្យល់គរបានដែរ ហើយអ្នកដែលខ្យល់គរអាចបាត់បង់ជីវិតបាន ប្រសិនមិនត្រូវបានសង្គ្រោះទាន់ពេល ជាពិសេស បើមានជំងឺប្រចាំកាយដូចជា សម្ពាធឈាម ខ្ពស់ ជំងឺបេះដូង ឬជំងឺទឹកនោមផ្អែម កាន់តែគ្រោះថ្នាក់ដល់បាត់បង់ជីវិត។
-អាការល្ហិតល្ហៃដោយកម្តៅថ្ងៃ និងអាការខ្យល់គ ៖
អាការទាំងពីរនេះមិនដូចគ្នាឡើយ។ អ្នកដែលល្ហិតល្ហៃដោយកម្តៅថ្ងៃ តែងបែកញើស ងងឹតមុខ រមួលពោះរកកល់ក្អួត ព្រោះបាត់បង់ជាតិទឹកច្រើន ពេក។ ប៉ុន្តែ ប្រសិនជាអាការខ្យល់គរ អ្នកជំងឺតែងក្តៅខ្លួនខ្លាំងរឿយៗ មិនចេញ ញើស តែស្រេកទឹក ឈឺក្បាល រមួលពោះរកក្អួត ដកដង្ហើមញាប់ និងអាចក្អួតចេញមកផងដែរ។ ប្រសិនបើឃើញដូចនេះ អាចធ្វើការសង្គ្រោះបឋមដោយ…
-ជំហានទី១ ៖ ប្រញាប់នាំអ្នកជំងឺចូលទៅរកម្លប់ បើជាកន្លែងដែលមានខ្យល់កាន់តែល្អ ឬអាចបើកកង្ហារជួយ។
-ជំហានទី២ ៖ បន្ធូរសម្លៀកបំពាក់អ្នកជំងឺឱ្យរលុង ដើម្បីស្រួលដកដង្ហើម។
-ជំហានទី៣ ៖ ជូតខ្លួនអ្នកជំងឺដោយក្រណាត់ជ្រលក់ទឹកធម្មតា មិនបាច់ត្រជាក់ពេកទេ ឬអាចប្រើទឹកធម្មតាស្រោចដៃជើងរបស់អ្នកជំងឺរឿយៗ រហូតដល់សីតុណ្ហភាពថយចុះ។
-ជំហានទី៤ ៖ ច្របាច់ ម៉ាស្សា តាមដៃជើងរឿយៗ ដើម្បីជំរុញឈាមឱ្យរត់ស្រួល។
-ជំហានទី៥ ៖ ឱ្យអ្នកជំងឺក្រេបទឹកម្តងបន្តិចៗញឹកញាប់។ ប៉ុន្តែ ប្រសិនធ្វើចំណុចទាំងអស់នេះហើយនៅមិនធូរស្រាលទេ ត្រូវប្រញាប់បញ្ជូនទៅមន្ទីរពេទ្យដែលនៅជិតបំផុត៕