ភ្នំពេញ ៖ បុរសម្នាក់ ខណៈដែលមានជំងឺប្រចាំកាយ «ខ្មែរយើងហៅថាឆ្កួតជ្រូក» ដើរទៅចុះបេះផ្កាឈូកទុកសម្រាប់ថ្វាយទេវតាឆ្នាំថ្មី ជាអនិច្ចារ្យជម្ងឺរើធ្វើទុក លង់ទឹកស្លាប់បាត់ជីវិត អស់១យប់ រហូតដល់បងប្អូនញាតិក្នុងភូមិជួយដើរស្វែងរកទើបប្រទះឃើញសាកសពអណ្តែតក្នុងទឹកត្រពាំងឈូក បង្កឲ្យភ្ញាក់ផ្អើលកាលពីវេលាម៉ោង៩និង៣០នាទីព្រឹកថ្ងៃទី១៤ ខែមេសា ឆ្នាំ២០១៧ ស្ថិតនៅក្នុងត្រពាំឈូក ខាងក្រោយរោចក្រ ក្នុងភូមិភ្លើងឆេះរទេះលិច សង្កាត់ភ្លើងឆេះរទេះ ខណ្ឌពោធិសែនជ័យ ។
ជនរងគ្រោះមានឈ្មោះ អ៊ុំ សុមឿន ភេទប្រុស អាយុ៣៦ឆ្នាំ មុខរបរកសិករ មានជម្ងឺប្រចាំកាយ ឆ្កួតជ្រូក មានប្រពន្ធឈ្មោះ ស្រី ម៉ៅ អាយុ៣៣ឆ្នាំ មុខរបរ កម្មកររោងចក្រ មានកូនចំនួន២នាក់ ប្រុសម្នាក់ ស្រីម្នាក់ក្នុងបន្ទុកគ្រួសារ មានទីលំនៅភូមិភ្លេីងឆេះរទេះកេីត សង្កាត់ភ្លើងឆេះរទេះ ។
តាមក្រុមគ្រួសារបានឲ្យដឹងថា ជនរងគ្រោះមានជម្ងឺប្រចាំកាយ ឧស្សាហ៍ប្រកាច់ជាញឹកញាប់ បើតាមជំនឿខ្មែរយើងហៅថាឆ្កួតជ្រូក មុនពេលកើតហេតុ ខណៈដែលបងប្អូនប្រជាពលរដ្ឋខ្មែរយើង ប្រុងប្រៀបរៀប ចំផ្ទះសម្បែង រៀបចំសុធម៌បាយសី ដាក់ផ្កាភ្ញី ដើម្បីទទួលទេវតាឆ្នាំថ្មី ទើបជនរងគ្រោះ កាលពីវេលាម៉ោង៣និង៣០នាទីល្ងាចថ្ងៃទី១៣ ខែមេសា បានទាំងប្រាប់អ្នកផ្ទះថា ដើរទៅរកបេះផ្កាឈូក យកមកសម្រាប់ដាក់ទទួលទេវតាឆ្នាំថ្មី ដែលចូលមកដល់នៅវេលាម៉ោង៣និង១២នាទីទើបភ្លឺចូលថ្ងៃទី១៤ ហើយក៏ជិះកង់ចាកចេញទៅបាត់ មិនដឹងថាដល់ទីណាដែរ បាត់រហូតដល់យប់ហើយនៅតែមិនឃើញវិលវិញ ក្រុមគ្រួសារ ដើរតាមស្វែងរកនៅតែមិនឃើញ រហូតដល់ ប្តឹងប៉ូលីសឲ្យជួយប្រកាសស្វែងរក ទៀតនៅតែមិនឃើញ មិនអស់ចិត្ត នៅព្រឹកថ្ងៃទី១៤ខែមេសាទាំងក្រុមគ្រួសារ ទាំងអ្នកភូមិតាមដើរស្វែងរក តាមស្រះត្រពាំងឈូក ជុំវិញភូមិ ស្រាប់តែនៅវេលាម៉ោង៩និង៣០នាទីដ្ថៃដដែល ទើបប្រះទះឃើញ សាកសពជនរងគ្រោះ អណ្តែតទឹកត្រពាំងឈូកមួយកន្លែង ខាងក្រោយរោងចក្រ ទើបរាយការណ៍ប្រាប់នគរបាលជំនាញឲ្យចុះមកពិនិត្យមើល ។
តែបើតាមប្រជាពលរដ្ឋបានឲ្យដឹងថា មុនកើតហេតុ កាលពីល្ងាចថ្ងៃទី១៣ គេឃើញជនរងគ្រោះ ជិះកង់ចូលផឹកស្រាជាមួយកម្មករសំណង់ រួចក៏ចាកចេញទៅបាត់ទៅ រហូតដល់ភ្ញាក់ផ្អើល ពៅព្រឹកថ្ងៃទី១៤ ថាលង់ទឹកស្លាប់ទៅវិញ ។
សាកសព ជនរងគ្រោះបើតាមការសន្និដ្ឋាន ផ្នែកទៅលើការបំភ្លឺពីក្រុមគ្រួសារ បានឲ្យដឹងថា ពេលដែល កំពុងចុះបេះផ្កាឈូក បែជាជម្ងឺរើធ្វើទុក្ខ ប្រកាច់ឈ្លក់ទឹកលង់ស្លាប់ គ្មានអ្នកដឹង ឃើញ ទើបអស់១យប់ ហើយពិតជាស្លាប់ដោយខ្លួនឯង ពុំមានពាក់ព័ន្ធបទល្មើសអ្វីឡើយ នាំគ្នាស្រង់ឡើងគោក ពិនិត្យរួច ប្រគល់ជូនក្រុមគ្រួសារយកទៅធ្វើបុណ្យតាមប្រណៃណី ។ បើតាមការយំរៀបរាប់ស្រណោះស្រណោក ពីស្រ្តីជាភរិយា បានឲ្យដឹងថា រាល់ថ្ងៃគាត់ ក្រុមគ្រួសារ ប្រុងប្រយ័ត្នដែរ ទៅលើជនរងគ្រោះ ខណៈដែលមានជម្ងឺប្រចាំកាយ ប្រកាច់ជាញឹកញាប់ មិនគួរឡើយណា ចូលឆ្នាំថ្មីជិតមកដល់ទៅហើយ កម្មឆ្នាំបាស់ គ្មានត្រប្រណី ចំពោះជីវិតលោកប្តីរបស់គាត់មួយមិនលើកលែង បន្ទាប់ពីដើរចាកចេញទៅរកបេះផ្កាឈូក ដើម្បីយកមកទទួលទេវតាតែជាអនិច្ចារ្យ បែជាទៅលង់ទឹកស្លាប់ទៅវិញ ៕