ភ្នំពេញ៖ បុរសម្នាក់បើកបររថយន្តកាមរីបាឡែន មួយគ្រឿង សង្ស័យស្រវឹងរេចង្កូតទៅបុកនារីម្នាក់ដែលកំពុងតែឈរនិយាយទូរស័ព្ទ បណ្តាលឲ្យរងរបួសស្រាល ហើយរថយន្តមិនទាន់អស់ល្បឿនបានជ្រុលទៅបុកចូលផ្ទះវីងវេរលុយ ធ្វើឲ្យបាក់របងហ៊ុមព័ទ្ធតូបវីងវេរលុយ បង្កឲ្យមានការភ្ញាក់ផ្អើលកាលពីវេលាម៉ោង១និង២០នាទីរំលងអធ្រាត្រ ឈានចូលថ្ងៃទី១០ ខែមិថុនា ឆ្នាំ២០១៧ ត្រង់ចំណុចមុខផ្ទះវីងវេរលុយ យីហោសុខ បញ្ញា ដែលមានផ្ទះ២៥B ផ្លូវ២៧៣ សង្កាត់បឹងកក់ទី១ ខណ្ឌទួលគោក។
រថយន្តបង្ក ម៉ាកកាមរីបាឡែន ពណ៌ស្ករ ពាក់ស្លាកលេខ ភ្នំពេញ ២AG-៧៨៦៣ បើកបរដោយបុរសម្នាក់មិនស្គាល់ឈ្មោះ វ័យ២៥ឆ្នាំ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញនារីម្នាក់កំពុងតែឈរនិយាយទូរស័ព្ទនៅខាងមុខផ្ទះកើតហេតុខាងលើ ខណៈពេលនោះ ស្រាប់តែមានរថយន្តមួយគ្រឿង ម៉ាកកាមរីបាឡែន ពណ៌ស្ករ ដែលបើកបរដោយបុរសម្នាក់តាមបណ្តោយផ្លូវលេខVI១៣ ក្នុងទិសដៅពីជើងទៅត្បូង លុះមកដល់ផ្លូវកែង និងផ្លូវ២៧៣ ក៏បានបួងចង្កូតបត់ឆ្វេងឡើងទៅផ្លូវ២៧៣ ហើយក៏ជ្រុលទៅបុកនារីខាងលើ បណ្តាលឲ្យរងរបួសស្រាល តែរថយន្តនៅមិនទាន់អស់ល្បឿន ក៏ជ្រុលទៅបុកចូលតូបវីងវេរលុយ បណ្តាលឲ្យបាក់ និងវៀចទ្វារអស់ពីរផ្ទាំង រថយន្តក្រពឹតកាងផ្នែកខាងមុខចំហៀងខាងស្តាំ និងជ្រុះស្លាកលេខខាងមុខ នៅនឹងកន្លែងកើតហេតុ ហើយភ្លាមៗនោះរ ថយន្តបង្កបានព្យាយាមបើករត់គេចបានបន្តិចមិនដាច់ចិត្ត ក៏បានបើកត្រលប់មកយកស្លាកលេខរថយន្តវិញ ហើយបានអះអាងថា ខ្លួនជាប្តីរបស់នារីរងគ្រោះ និងព្យាយាមលើកនារីរងគ្រោះដាក់លើរថយន្តបង្ក ដើម្បីយកទៅព្យាបាល តែត្រូវនារីរងគ្រោះបដិសេធមិនព្រមទៅជាមួយ។
ក្រោយពេលកើត ហេតុនារីរងគ្រោះបានទាក់ទងហៅសាច់ញាតិមកដឹកទៅព្យាបាលនៅមន្ទីរពេទ្យ ចំណែកឯរថយន្ត ត្រូវបានសមត្ថកិច្ចជំនាញចុះធ្វើការវាស់វែង និងយកទៅរក្សាទុកនៅអធិការដ្ឋាននគរបាលខណ្ឌទួលគោក រង់ចាំធ្វើការដោះស្រាយគ្នា ជាមួយម្ចាស់ផ្ទះខាងលើនៅពេលក្រោយ៕