នៅព្រឹកថ្ងៃទី១៨ ខែសីហា ឆ្នាំ២០១៧ កន្លងទៅនេះ ក្រុមហ៊ុនទទួលចែកចាយភាពយន្តខ្មែរ ទៅកាន់ទីផ្សារភាពយន្តក្រៅប្រទេស មានឈ្មោះថា «ពូព្រហ្ម» បានបើកសិក្ខាសាលាមួយ ក្នុងគោលបំណងសំខាន់ ជជែកវែកញែកពីក្ដីកង្វល់ ចំណុចខ្វះខាត និងការបំពេញឲ្យបានគ្រប់ជ្រុងជ្រោយ របស់ផលិតករខ្មែរ មុននឹងភាពយន្តរបស់ខ្លួន ត្រូវបានទទួលស្គាល់ជាលក្ខណៈស្ដង់ដារ ហើយនាំចេញទៅកាន់ទីផ្សារក្រៅប្រទេស។ កិច្ចពិភាក្សាគ្នានេះ ក៏មានការអញ្ជើញចូលរួម ពីភាគីអ្នកជំនាញភាពយន្តមកពីបរទេស ដែលធ្លាប់ជោគជ័យក្នុងការចែកចាយកុនហូលីវូដដើម្បីធ្វើបទបង្ហាញ ចែករំលែកបទពិសោធ គ្នាទៅវិញទៅមក ស្វែងរកគន្លិះសំខាន់ៗ ដើម្បីអភិវឌ្ឍវិស័យភាពយន្តខ្មែរ ឲ្យកាន់តែប្រសើរឡើងផងដែរ។
លោកស្កុត នីសុន ដែលមានបទពិសោធន៍ជោគជ័យលើការចែកចាយកុនហូលីវូដ បានចែករំលែកបទពិសោធន៍នៅក្នុងកម្មវិធីពិភាក្សានោះថា ការផលិតភាពយន្តគួរតែផ្ដោតទៅលើគុណភាពជាចំបងនិងគិតថាកុនដែលខ្លួនផលិតត្រូវតែអាចនាំចេញយកទៅចែកចាយនៅក្រៅប្រទេសបាន។លោកថា បើទោះបីសម័យនេះជឿនលឿនមានស្មាតហ្វូនគ្រប់ដៃ ប៉ុន្តែបើផលិតកុនបានល្អមានគុណភាពខ្ពស់នៅតែជោគជ័យ។លោកចង់ឲ្យផលិតករខ្មែរប្រឹងប្រែងផលិតភាពយន្តដែលមានគុណភាពខ្ពស់ដើម្បីមានឱកាសយកទៅចែកចាយនៅក្រៅប្រទេសនិងដើម្បីជួយលើកស្ទួយវិស័យភាពយន្តខ្មែរ។
អ្នកចាត់ការទូទៅ របស់ ក្រុមហ៊ុន «ពូព្រហ្ម» លោក ស៊ុ ស៊ីថែន បានថ្លែងឲ្យដឹងថា កម្មវិធីនៅថ្ងៃនេះ យើងឲ្យឈ្មោះថា ជាសិក្ខាសាលាស្ដីពីការធ្វីទីផ្សារ និងចែកចាយភាពយន្តខ្នាតអន្តរជាតិ ដោយកម្មវិធីនេះ ធ្វើឡើងក្នុងគោលបំណង ចែករំលែកបទពិសោធ រវាងអ្នកមានជំនាញភាពយន្ត នៅក្រៅប្រទេស ជាមួយនឹងផលិតករក្នុងស្រុក និងចង់ដកស្រង់នូវបទពិសោធល្អៗ ពីអ្នកជំនាញបរទេស ដើម្បីយកមកអនុវត្តន៍ជាមួយនឹងផលិតកក្នុងស្រុក។ ក្នុងនោះក៏ចង់ឲ្យមានការផ្សាភ្ជាប់ទំនាក់ទំនង រវាងផលិតករបរទេស និងផលិតករក្នុងស្រុក ដើម្បីស្វែងរកដំណោះស្រាយ ទៅលើបញ្ហាប្រឈមក្នុងការផលិតភាពយន្តខ្មែរ។
លោកស៊ីថែន បន្តទៀតថា ជាមួយគ្នានេះ ជាគោលដៅរបស់ «ពូព្រហ្ម» ក៏ចង់លើកកម្ពស់ស្ដង់ដារផលិតរបស់ភាពយន្តខ្មែរ ឲ្យកាន់តែប្រសើរឡើងបន្ថែមទៀត ដូចបណ្ដាប្រទេសជិតខាង ខណៈដែលតាមរយៈកិច្ចពិភាក្សាគ្នានេះ លោករំពឹងថា នឹងទទួលបានលទ្ធផលផ្លែផ្កាជាច្រើន សម្រាប់វិស័យភាពយន្តខ្មែរ។ កិច្ចពិភាក្សាគ្នាថ្ងៃនេះ យើងនឹងទទួលបាននូវគោលគំនិតថ្មីៗ ដូចជាផែនការ និងរបៀបរបប នៃការផ្សព្វផ្សាយរឿង ដោយសារតែកន្លងមក យើងមិនទាន់បានគិតឲ្យទូលំទូលាយ ឬគ្រប់ជ្រុងជ្រោយ នៅពេលផលិតរឿងនីមួយៗរបស់ផលិតករខ្មែរ ហើយមានគោលបំណងចង់ឲ្យរឿងរបស់ខ្លួន ចូលទៅកាន់ទីផ្សារបរទេស។
អ្នកចាត់ការទូទៅក្រុមហ៊ុន”ពូព្រហ្ម”រូបនេះ បានសង្កត់ធ្ងន់ថា បច្ចុប្បន្ននេះ ផលិតករខ្មែរមួយចំនួន ពេលផលិតរឿងនីមួយៗ ហើយដាក់បញ្ចាំងនៅក្នុងរោងភាពយន្ត គឺច្រើនតែសំឡឹងឃើញ តែប្រាក់ចំណូល និងការចំណេញបានឆាប់រហ័ស ដោយមិនបានគិតឲ្យបានទូលំទូលាយ ពីគុណភាពភាពយន្ត ឬលក្ខណៈស្ដង់ដារបច្ចេកទេស ដើម្បីឲ្យភាពយន្តរបស់ខ្លួន សមស្របទៅនឹងអ្វី ដែលទីផ្សារក្រៅស្រុកចង់បាន ព្រោះតែភាពយន្តខ្លះ នៅមានកម្រិត និងខ្លះទៀតក៏អាចទទួលយកបាន។
យ៉ាងណាមិញ ក្នុងនាមជាអ្នកចែកចាយ លោកមើលឃើញថា ផលិតកររបស់ខ្មែរ នៅមានចន្លោះប្រហោងខ្វះខាតច្រើនទៀត ដែលត្រូវបំពេញ ដូចជាការគោរពពេលវេលា ទំនួលខុសត្រូវ ដែលត្រូវធ្វើការកែតម្រូវបន្តិចម្ដងៗ ខណៈដែលរហូតមកដល់ពេលនេះ ភាពយន្តខ្មែរមានការរីកចម្រើនតែផ្នែកបរិមាណ ចំណែកគុណភាព នៅមានកម្រិតនៅឡើយ។ កិច្ចពិភាក្សានេះ ក៏មានការចូលរួមពីសំណាក់មន្រ្តីក្រសួងវប្បធម៌ និងវិចិត្រសិល្បៈ ក្នុងន័យជួយជំរុញលើកទឹកចិត្តដល់ផលិតករទាំងអស់ ដែលបានចូលរួមផងដែរ៕