ប្តីប្រពន្ធ ថ្មីថ្មោង១គូនេះ បានខ្វែងគំនិតគ្នា រឿងចង់បានកូនបន្ត វង្សត្រកូល ខណៈភាគីខាងស្រីចង់ ទុកពោះឱ្យទំនេរដើម្បីរកស៊ី តែភាគីខាងប្រុសចង់បានកូនឆាប់ៗ។ ដល់ប្រពន្ធ មិនព្រមពពោះ ប្តីងោះនោះ ក៏រត់ចោលមួយរយៈ លុះប្រពន្ធអង្វរតាមទូរស័ព្ទ ក៏វិលមកវិញ យល់ព្រមពពោះតាមបំណងប្តី ទីបំផុត ប្តីនោះ បានត្រឹមនឿយរកស៊ីម្នាក់ឯង ព្រោះប្រពន្ធរវល់តែមើលកូន…។
នាងដេង សុផា អាយុ២០ឆ្នាំ រស់នៅភូមិផ្លោច ឃុំច្រាច់ ស្រុកជ័យសែន ខេត្តព្រះវិហារ បានរៀបរាប់ថា នាងជាកូនទី៤ ក្នុងចំណោមបងប្អូន៥នាក់ ឪពុកឈ្មោះ ជា ដេង អាយុ៥៧ឆ្នាំ ម្តាយឈ្មោះឡី រី អាយុ៥៥ឆ្នាំ។ នាងមានប្តីឈ្មោះចាយ រ៉ាវី អាយុ២៣ឆ្នាំ និងធ្លាប់ស្រលាញ់គ្នាតាំងពីនៅរៀនម៉្លេះ មុននឹងសម្រេចចិត្ត រៀបការតាមប្រពៃណី។ លុះចាប់ដៃគ្នាមិនបានប៉ុន្មាន ស្រាប់តែប្តីង៉ក់រត់ទៅ ប្រទេសថៃ បាត់មួយរយៈ ព្រោះតែគេខឹងនាងមិនព្រមពពោះ បង្កើតកូនឱ្យគេ។ នាងរំព្ញកថា កាលសាងស្នេហ៍ជាមួយគ្នាក្នុងវ័យកំលោះក្រមុំ នោះ មិនដែលមានបញ្ហាអ្វីទេ តែប្រុសស្នេហ៍ឧស្សាហ៍ទូរស័ព្ទប្រាប់នាងថា គេចង់បានកូនណាស់ និងចង់រៀបការឆាប់ៗ ដើម្បីឱ្យបំណង របស់គេបានសម្រេច។ កាលនោះ ពេលឮគេថា ចង់ បានកូន នាងខ្មាសអៀនខ្លាំងណាស់ និងពិចារណាថា បើរៀបការរួច យកកូនភ្លាមៗនោះ មិនចំណេញទេ ព្រោះនាងរវល់តែច្រៀងបំពេកូនគ្មានពេលចេញទៅ រកស៊ីអ្វីទេ តែបើទុកពោះឱ្យនៅទំនេរ អាចចេញទៅ ស៊ីឈ្នួលបេះផ្លែឈើនៅស្រុកថៃ បានផលកម្រៃជួយ ទប់ទល់ជីវភាពគ្រួសារ ពុំមែននាងមិនចង់បានកូន នោះទេ ព្រោះកូនជារស្មីជីវិត ចាំកាលណាជីវភាពធូរធារសេសសល់លុយកាក់ សឹមយកកូនប្រើក៏មិន ហួសពេលដែរ ព្រោះវ័យនាងនៅក្មេងណាស់។
នាងដេង សុផា ឱ្យដឹងបន្តទៀតថា លុះរៀបការរួចរាល់ មុនពេលផ្សំដំណេក នាងបានទៅទិញថ្នាំអូខេ សម្រាប់ពន្យារកំណើតមកទុកប្រើ ដោយមានការ ណែនាំពីមិត្តភក្តិ ដែលយកប្តីមុននាង។ រាត្រីផ្សំដំណេក ចូលមកដល់ ប្តីប្រាប់នាងតិចៗថា គេនឹងយកកូន១ឱ្យ ទាល់តែបាន និងសុំឱ្យនាងសហការផង បន្ទាប់មក ក៏នាំគ្នាឆ្លងកាត់ភាពកំលោះក្រមុំ យ៉ាងផ្អែមត្រជាក់។ ប្តីប្រពន្ធនាងចេះតែបន្តល្អូកល្អិនជាមួយគ្នារាល់យប់ មិនសូវខានទេ លុះរំលងបានបួនប្រាំខែ ប្តីក៏សួរថា “អូនមានផ្ទៃពោះ ឬនៅ?” នាងក៏ឆ្លើយថា “មិនទាន់ ឱ្យមានទេ យើងកំពុងក្រ ចាំពីរបីឆ្នាំទៀតសិន ដើម្បី ទុកពេលរកស៊ី”។ ទោះជានាងប្រាប់យ៉ាងនេះក្តី ក៏ប្តី នៅតែរំអុកឱ្យនាងពពោះជាដាច់ខាត បានទាំងចោទ ប្រកាន់នាងថា មកពីនាងមានប្រុសផ្សេង បានជាមិន ចង់ឱ្យមានកូនជាប់សាច់ឈាមជាមួយគេ។ បន្ទាប់ពី ស្តីបន្ទោសនាងរួច ប្តីក៏ឱបបង្វេចបោលទៅប្រទេសថៃ ដោយមិនប្រាប់នាងសូម្បីតែមួយម៉ាត់ ធ្វើឱ្យនាង ភ័យស្លន់ស្លោ ខំដើររក ព្រោះគេផ្តាច់ទូរស័ព្ទ។ រំលង បានជាង១ខែ ស្រាប់តែគេទូរស័ព្ទមកនាងមុន ដោយប្រើប្រព័ន្ធថៃ ទើបនាងយំអង្វរឱ្យគេវិលវិញ ដោយសន្យាថា ឈប់ប្រើថ្នាំពន្យារកំណើតទៀតហើយ។
នាងដេង សុផា បន្ថែមទៀតថា លុះប្តីមកដល់ មានទាំងលុយកាក់ផ្ញើនាងផងនោះ ភាពផ្អែមល្ហែម ក៏ចាប់ផ្តើមសាជាថ្មី ហើយនាងក៏ឈប់លេបថ្នាំ ស្រាប់តែមានផ្ទៃពោះភ្លាមដែរ។ ឥឡូវនាងទើបតែឆ្លង ទន្លេបានកន្លះខែ ធ្វើការអ្វីក៏មិនកើត ចំណែកប្តីស្រលាញ់ កូន នៅតែដេកននៀលក្បែរកូន ដេញទៅរកស៊ីអ្វីក៏មិន ទៅ និងប្រចណ្ឌនាងធ្ងន់ជាងនៅក្រមុំទៅទៀត។ សម្រេចទៅ រូបនាងរវល់តែថែកូនខ្ចី សរសៃខ្ចី មិនដឹង ថ្ងៃណាចេញរកស៊ីកើត ឯប្តីងោះនេះបានត្រឹមទាត់ខ្យល់ ខាតទាំងអស់គ្នា ព្រោះបើកុំប្រញាប់យកកូន មិនយ៉ាប់ យ៉ាងនេះទេ ហ្នឹងហើយគំនិតប្តីល្ងង់ខ្វះការពិចារណា។
ដោយឡែក លោកចាយ រ៉ាវី អាយុ២៣ឆ្នាំ ជាប្តី បានឱ្យដឹងថា លោកមិនបានទៅប្រទេសថៃ មែន ក៏មិនអត់ការងារធ្វើនោះដែរ ដែលពេលនេះបានក្លាយជា កម្មករក្រុមហ៊ុនឯកជន នៅបឹងទន្លេម្រេច។ លោកប្រាប់តាមទូរស័ព្ទថា មូលហេតុដែលលោកយក ប្រពន្ធ គឺចង់បានកូនបន្តពូជ មិនមែនការហើយនៅម៉ង់ៗ តែពីរនាក់នោះទេ។ លោកក៏ទទួលស្គាល់ដែរថា ពេលកូនខ្ចី ប្រពន្ធចេញរកស៊ីអ្វីក៏មិនកើត តម្រូវឱ្យ រូបលោកជាប្តីចេញរកតែម្នាក់ឯង ឯមុខរបរជាកម្មករ អណ្តែត ក៏មិនឋិតថេរដែរ បើថៅកែអន់ចិត្ត គេដេញ ចេញ។ រឿងដែលប្រពន្ធថា លោកប្រចណ្ឌនោះ ក៏មិនមែនដែរ គឺមកពីលោកមិនចង់ឱ្យប្រពន្ធដើរលេងផ្ទះ គេតែម្តង ទើបចេះតែស្តីថាឱ្យទៅហេតុតែស្រលាញ់។
លោកជា ដេង និងអ្នកស្រីឡី រី ជាឪពុកម្តាយ ខាងស្រី បានឱ្យដឹងស្របគ្នាថា កូនប្រសាពួកគាត់ស្លូត បូតទេ តែខ្វះការពិចារណាដែលភាសាសាមញ្ញថា ឆោត ព្រោះបើកុំប្រញាប់យកកូននោះ ពួកគេអាច នាំគ្នាទៅប្រទេសថៃ ស៊ីឈ្នួលបេះផ្លែឈើ បានកម្រៃ ខ្ពស់ជាងក្នុងស្រុក។ គេខឹងប្រពន្ធមិនព្រមពពោះ ក៏បោលក្បាលទៅថៃម្នាក់ឯង ដល់ប្រពន្ធអង្វរក៏វិលមកវិញ ទើបចាស់ៗសម្របសម្រួលឱ្យចុះសម្រុងគ្នាទៅ។
លោកអ៊ុង ខេន មេភូមិរងភូមិផ្លោច បានឱ្យដឹង ថា គ្រួសារមួយនេះ គ្មានបញ្ហាអ្វីធំដុំទេ គ្រាន់តែប្តីចង់ បានកូន បង្ខំប្រពន្ធឱ្យពពោះ លុះប្រពន្ធលេបថ្នាំពន្យារ ធ្វើឱ្យប្តីខឹងរត់ចោល។ ឥឡូវលែងអីហើយ គ្រាន់តែ ប្តីយ៉ាប់បន្តិច ព្រោះរកស៊ីម្នាក់ឯង បើទុកប្រពន្ធឱ្យ ទំនេរពោះសិន ជួយរកគ្នាមិនខាតទេ។
សូមបញ្ជាក់ថា យុវវ័យសម័យនេះ បន្ទាប់ពី រៀបការរួចរាល់ បើគេអាងមានម្តាយ ឬជីដូននៅ ជាមួយ ក៏នាំគ្នាយកកូនភ្លាម លុះកូនកើតមករឹងដៃ ជើង ក៏ផ្ញើយាយថែទាំ រួចពួកគេនាំគ្នាទៅធ្វើការរោងចក្រ ឬឆ្លងដែនទៅថៃ។ មួយចំនួនទៀតគ្មានអីអាង ក៏ស្រុះស្រួលគ្នាឱ្យប្រពន្ធប្រើពិធីពន្យារកំណើត ដើម្បី មានឱកាសចេញរកស៊ីទាំងពីរនាក់ លុះសេសសល់ លុយធួនល្មមហើយ ទើបគេយកកូន។ ដោយឡែក បុរសខាងលើដែលប្រញាប់យកកូនភ្លាមៗ ដោយគ្មាន អីអាងនោះ ត្រូវអ្នកស្រុកហៅងោះ មិនខុសប៉ុន្មានទេ ព្រោះងោះមិនចេះពិចារណាវែងឆ្ងាយ បើទុកប្រពន្ធ ឱ្យចេញរកស៊ីជាមួយគ្នា ឃើញថា ចំណេញជាង។ ធម្មតាកូន អ្នកណាក៏ចង់បានដែរ តែសម័យនេះ ការចង់បាន ឬមិនទាន់ចង់បាន ស្រេចតែចិត្តសាមីខ្លួន ដូច្នេះ រឿងរ៉ាវខាងលើនេះ ចាត់ទុកជាមេរៀនជីវិតសម្រាប់ គូស្រករថ្មោងថ្មីពិចារណា បើខ្លួនក្រ និងគ្មានយាយ ចាប់ចៅ កុំទាន់អាលឱ្យប្រពន្ធពពោះ ដើម្បីទុកពេល សន្សំលុយសិន លុះសល់លុយក្រែល ចាំឱ្យប្រពន្ធ សម្រាករក្សាគភ៍ចុះ មិនខុសបំណងឡើយ…”៕