ខេត្តស្វាយរៀង ៖ បុរស២នាក់បងប្អូនបង្កើតបានអង្គុយផឹកស្រាជុំគ្នា លុះចាប់ផ្តើមស្រវឹងធ្លាក់ភ្នែក ក៏កើតមានទំនាស់ពាក្យសម្តី តឹងសរសៃកដាក់គ្នា រហូតដល់ភាគីប្អូនប្រុសស្ទុះទៅទាញដំបងមែកដើមប្រេងខ្យល់វាយបងប្រុសបង្កើតរបស់ខ្លួន បណ្តាលឱ្យបែកភ្នែក សន្លប់ស្តូកស្តឹង លុះព្រឹកឡើង ជនរងគ្រោះជាបងប្រុសក្រោកដើរទៅប្តឹងប៉ូលិស ស្រាប់តែដើរចេញពីផ្ទះបានប្រមាណ៦០ម៉ែត្រ ក៏ដួលស្លាប់នៅលើដីគួរឱ្យសង្វេគ បង្កឱ្យមានការភ្ញាក់ផ្អើលឡើង កាលពីព្រឹកថ្ងៃទី០៨ ខែវិច្ឆិកា ឆ្នាំ២០១៧ នៅចំណុចភូមិកណ្តាល ឃុំក្រួស ស្រុកស្វាយជ្រំ។
ជនសង្ស័យដែលវាយបងប្រុសបង្កើត បណ្តាលឱ្យស្លាប់ មានឈ្មោះសឹង អុល អាយុ ៣២ឆ្នាំ មុខរបរកសិករ រស់នៅភូមិកើតហេតុខាងលើ។ ចំណែកជនរងគ្រោះជាបងប្រុស មាន ឈ្មោះសឹង អុន អាយុ៣៥ឆ្នាំ មុខរបរកសិករ មានលំនៅក្នុងភូមិជាមួយគ្នា។
តាមប្រភពពីកន្លែងកើតហេតុបានឱ្យដឹងថា នៅមុនពេលកើតហេតុ កាលពីវេលាម៉ោង ៦និង៣០នាទីព្រលប់ ថ្ងៃទី០៧ ខែវិច្ឆិកា ឆ្នាំ២០១៧ គេឃើញជនសង្ស័យឈ្មោះសឹង អុល បានអង្គុយផឹកស្រាជាមួយនឹងបងប្រុសបង្កើតរបស់ខ្លួនឈ្មោះសឹង អុន យ៉ាងសប្បាយក្អាកក្អាយ ដោយនាំគ្នាផឹកស៊ីបណ្តើរជជែកគ្នាលេងពីនេះពីនោះបណ្តើរ។
ប្រភពដដែលបន្តថា លុះក្រោយពីផឹកស៊ីស្រវឹងធ្លាក់ភ្នែករៀងខ្លួន ជនរងគ្រោះបានកើត មានទំនាស់ពាក្យសម្តីតឹងសរសៃកដាក់គ្នាជាមួយជនសង្ស័យ លុះជនសង្ស័យដែលកំពុង ស្រវឹងជោកផង ទប់កំហឹងមិនបាន ក៏ស្ទុះទៅទាញដំបងមែកដើមប្រេងខ្យល់មកវាយទៅលើបងប្រុសបង្កើតរបស់ខ្លួន១ដំបង ចំលើចុងភ្នែកខាងឆ្វេង បណ្តាលឱ្យបែកភ្នែក រងរបួសធ្ងន់ សន្លប់ស្តូកស្តឹងនៅនឹងកន្លែង។ លុះមកដល់ព្រឹក ថ្ងៃទី០៨ ខែវិច្ឆិកា ឆ្នាំ២០១៧ ជនរងគ្រោះបានក្រោកដើរចេញពីផ្ទះ បំណងទៅដាក់ពាក្យបណ្តឹងនៅផ្ទះលោកមេភូមិ ស្រាប់តែពេលដើរចេញពីផ្ទះបានតែប្រមាណ៦០ម៉ែត្រ ជនរងគ្រោះក៏ទន់ជង្គង់ដួលទៅលើដីស្លាប់យ៉ាងអាណោចអាធ័មតែម្តង។
តាមសម្តីលោកមេភូមិឈ្មោះយិន មាន បានរៀបរាប់ប្រាប់ថា កាលពីព្រលប់ថ្ងៃទី០៧ វិច្ឆិកា ជនរងគ្រោះ និងជនសង្ស័យត្រូវជាបងប្អូនបង្កើតនឹងគ្នាបានកើតមានជម្លោះនឹងគ្នា ដោយសារតែម្ខាងៗសុទ្ធតែស្រវឹងដាបរៀងខ្លួន ទើបធ្វើឱ្យភាគីប្អូនប្រុសទប់កំហឹងមិនបាន ក៏វាយបងប្រុស១ដំបង បណ្តាលឱ្យសន្លប់ស្តូក លុះព្រឹកឡើង ថ្ងៃទី០៨ វិច្ឆិកា ជនរងគ្រោះ បានក្រោកដើរសំដៅមកដាក់ពាក្យបណ្តឹងនៅផ្ទះរបស់គាត់ជាមេភូមិ ប៉ុន្គែខណៈដើរចេញពីផ្ទះបានចម្ងាយប្រហែល៦០ម៉ែត្រ ស្រាប់តែដួលស្លាប់តែម្តង ទើបគាត់ប្រញាប់រាយការណ៍ប្រាប់សមត្ថកិច្ចចុះមកជួយអន្តរាគមន៍។
ក្រោយកើតហេតុ សមត្ថកិច្ចនគរបាលស្រុក និងនគរបាលប៉ុស្តិ៍រដ្ឋបាល បានចុះពិនិត្យ និងធ្វើកោសល្យវិច័យសព រួចបញ្ជាក់ថា ជនរងគ្រោះមានស្នាមរបួសត្រង់ចុងភ្នែកខាងឆ្វេង ដោយទទួលរងការវាយដំពីសំណាក់ប្អូនប្រុសបង្កើត (ជនសង្ស័យ) នៅអំឡុងពេលផឹកស៊ីស្រវឹងជាមួយគ្នា លុះព្រឹកឡើងជនរងគ្រោះក៏ដាច់ខ្យល់ស្លាប់តែម្តង។
ជុំវិញករណីខាងលើនេះ សមត្ថកិច្ចបានចាប់ឃាត់ខ្លួនជនសង្ស័យជាប្អូនប្រុសមកធ្វើការសាកសួរនៅអធិការដ្ឋាននគរបាលស្រុកស្វាយជ្រំ ដើម្បីរៀបចំកសាងសំណុំរឿង បញ្ជូនទៅចាត់ការបន្តតាមច្បាប់៕