ភ្នំពេញ ៖ ២នាក់បងប្អូនជិះម៉ូតូមួយគ្រឿង មកពីញ៉ាំអាហារ ត្រូវជនសង្ស័យមួយក្រុមជិះម៉ូតូ៤គ្រឿង ធ្វើសកម្មភាពឆក់កាបូបបានសម្រេច ហើយជិះគេចខ្លួនបាត់ស្រមោល កាលពីវេលាម៉ោង១១និង៤០នាទីយប់ ថ្ងៃទី២២ ខែវិច្ឆិកា ឆ្នាំ២០១៧ ត្រង់ចំណុចក្បែរវិទ្យាស្ថានអាស៊ីអឺរ៉ុប តាមបណ្តោយផ្លូវលេខ២៥៧ ស្ថិតក្នុងសង្កាត់ទឹកល្អក់ទី២ ខណ្ឌទួលគោក។
ជនរងគ្រោះទី១ មានឈ្មោះ រៀល សនវិច្ជនា ភេទស្រី អាយុ២២ឆ្នាំ ជាបុគ្គលិកក្រុមហ៊ុនឯកជនស្នាក់នៅផ្ទះលខ១៤៣ ផ្លូវលេខ១៦៣ សង្កាត់សង្កាត់ទឹកល្អក់ទី២ ខណ្ឌទួលគោក ។ ជនរងគ្រោះទី២ ជាប្អូន អង្គុយពីក្រោយ មានឈ្មោះ រៀល សាវតា ភេទស្រី អាយុ១៩ឆ្នាំ មុខរបរនិស្សិតឆ្នាំទី១ ស្នាក់នៅជាមួយគ្នា។
យោងតាមប្រភពពីជនរងគ្រោះប្រាប់ឲ្យដឹងថា មុនកើតហេតុរូបគាត់ទាំងពីរនាក់ជិះម៉ូតូ១គ្រឿង ម៉ាកហុងដាឌ្រីម ស៊េរីឆ្នាំ២០១៣ ពណ៌ខ្មៅ ទើបនិងចេញមកពីហូបអីនៅម្តុំស្ពានអាកាស៧មករា បំណងជិះត្រឡប់មកផ្ទះវិញនៅម្តុំកន្លែងកើតហេតុ បានជិះតាមបណ្តោយផ្លូវ២៥៧ ក្នុងទិសដៅពីជើងទៅត្បូង។ លុះមកដល់ចំណុចកើតហេតុខាងលើបម្រុងជិះចូលផ្ទះស្រាប់តែលេចមុខជនសង្ស័យប្រមាណជា៨នាក់ ជិះម៉ូតូ៤គ្រឿង មិនចាំម៉ាកបានជិះមកពីក្រោយ ហើយធ្វើសកម្មភាពឆក់កាបូបស្ពាយពីជនរងគ្រោះឈ្មោះរៀល សនវិជ្ជនា ស្ពាយនៅខាងមុខបានសម្រេច ហើយក្រុមជនសង្ស័យបានជិះរត់គេចខ្លួនបាត់ស្រមោលដោយសុវត្ថិភាព។ នៅក្នុងកាបូបស្ពាយរបស់ជនរងគ្រោះដែលក្រុមជនសង្ស័យឆក់យកទៅបាត់ មានលុយចំនួន២៥០០ដុល្លារ ទូរស័ព្ទIPHONE 6 ១គ្រឿង កុំទ្យូទ័រDELL១គ្រឿង និងសម្ភារះមួយចំនួនទៀត។
ក្រោយពេលជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលទឹកល្អក់ទី២ ដើម្បីឲ្យសមត្ថកិច្ចធ្វើការស្រាវជ្រាវចាប់ជនសង្ស័យយកមកដាក់ទោសទៅតាមផ្លូវច្បាប់៕