ភ្នំពេញ ៖ យុវជនម្នាក់បានបើករថយន្តដឹកបង្កងពីខេត្តកណ្តាល យកមកលក់នៅភ្នំពេញ លុះដាក់បង្កងចុះអស់ នឿយហត់ពេក ក៏ឡើងទៅប្រះខ្លួនដេកក្នុងរថយន្តមួយភាំង ស្រាប់តែមានអ្នកមកដាស់ ក៏ប្រទះឃើញជនរងគ្រោះដេកស្លាប់បាត់ទៅហើយ បង្កឱ្យមានការភ្ញាក់ផ្អើលឡើង កាលពីវេលាម៉ោង៦ និង១០នាទីព្រឹក ថ្ងៃទី២៣ ខែវិច្ឆិកា ឆ្នាំ២០១៧ នៅចំណុចមុខឃ្លាំងសាំងស៊ូគីមិច តាមបណ្តោយផ្លូវជាតិលេខ៥ ស្ថិតក្នុងភូមិពោធិមង្គល សង្កាត់ព្រែកព្នៅ ខណ្ឌព្រែកព្នៅ។
យុវជនរងគ្រោះដែលដេកស្លាប់ក្នុងរថយន្ត មានឈ្មោះវ៉ាត សុវណ្ណ អាយុ២៣ឆ្នាំ មុខរបរបើកបររថយន្ត មានលំនៅភូមិព្រែកសែន ឃុំសំពៅពូន ស្រុកកោះធំ ខេត្តកណ្តាល។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ ជនរងគ្រោះ និងឈ្មោះង្វៀង ហុងផាត់ បានដឹកបង្កងពីស្រុកកោះធំ យកមកលក់នៅយឿត្រី ស្ថិតក្នុងភូមិពោធិមង្គល សង្កាត់ព្រែកព្នៅ ខណ្ឌព្រែកព្នៅ។ លុះក្រោយពេលមកដល់គោលដៅ លើកដាក់បង្កងពីលើ រថយន្តចុះអស់ហើយ ដោយនឿយហត់អស់កម្លាំងពេក ទើបជនរងគ្រោះបានបើករថយន្តទៅសម្រាកនៅចំណុចកើតហេតុខាងលើតែម្នាក់ឯង។
ប្រភពដដែលបន្តថា លុះមកដល់វេលាម៉ោងកើតហេតុខាងលើ បុរសឈ្មោះង្វៀង ហុងផាត់ បានឱ្យឈ្មោះឃុត បូរិន ទៅហៅជនរងគ្រោះ ដើម្បីដឹកឥវ៉ានត្រលប់ទៅផ្ទះវិញ ស្រាប់តែប្រហែល៥នាទីក្រោយមក ឈ្មោះបូរិន បានរត់មកប្រាប់ឈ្មោះង្វៀង ហុងផាត់ វិញិថា ជនរងគ្រោះបានដេកស្លាប់នៅក្នុងរថយន្តបាត់ទៅហើយ ទើបធ្វើឱ្យកើតមានការភ្ញាក់ផ្អើល និងរាយការណ៍ប្រាប់សមត្ថកិច្ចឱ្យចុះមកពិនិត្យតែម្តង។
ក្រោយទទួលបានព័ត៌មានខាងលើភ្លាម កម្លាំងជំនាញបានចុះត្រួតពិនិត្យ និងធ្វើកោសល្យវិច័យសពជនរងគ្រោះ រួចបញ្ជាក់ថា ជនរងគ្រោះបានស្លាប់ដោយសារគាំងបេះដូង ពោលគឺមិនពាក់ព័ន្ធទៅនឹងករណីអ្វីផ្សេងនោះឡើយ។
សាកសពជនរងគ្រោះ ត្រូវបានសមត្ថកិច្ចប្រគល់ទៅឱ្យក្រុមគ្រួសារដឹកទៅកាន់លំនៅដ្ឋានឯខេត្តកណ្តាល ដើម្បីរៀបចំធ្វើបុណ្យតាម ប្រពៃណី៕