ខេត្តកណ្តាល ៖ ស្ត្រីជាអាជីករលក់ដូរនៅក្នុងផ្សារតាខ្មៅចាស់ ចំនួន២នាក់ លក់ដូរតូបជាប់គ្នា ប៉ុន្តែខ្វះការយោគយល់អធ្យាស្រ័យគ្នា ក៏កើតជាជម្លោះចង់ឈ្នះចាញ់រៀងខ្លួនរហូត ក្លាយជាការប្រតាយប្រតប់គ្នា ទើបធ្វើឱ្យបុរសជាប្តីស្ត្រីទាំង២នាក់ឃើញ ក៏ស្ទុះចូលជួយប្រពន្ធរៀងៗខ្លួន ចំណែកបុរសជាប្តីភាគីម្ខាងទ្រាំមិនបានក៏ទាញដែកថ្នាំងអំពៅ វាយទៅលើស្ត្រីជាគូជម្លោះ បណ្តាលឱ្យរងរបួសធ្ងន់ដេកពេទ្យ។
ករណីហិង្សាខាងលើនេះ បានកើតឡើង កាលពីវេលាម៉ោង៨និង៣០នាទីយប់ ថ្ងៃទី២៨ ខែវិច្ឆិកា ឆ្នាំ២០១៧ នៅចំណុចផ្សារតាខ្មៅចាស់ ស្ថិតក្នុងភូមិតាខ្មៅ សង្កាត់តាខ្មៅ ក្រុងតាខ្មៅ។
ស្ត្រីរងគ្រោះដែលត្រូវគូទំនាស់វាយនឹងដែកថ្នាំងអំពៅ បណ្តាលឱ្យរងរបួសធ្ងន់នោះ មានឈ្មោះផេង បូរិន អាយុ៣០ឆ្នាំ មុខរបរលក់បន្លែ មានលំនៅក្នុងភូមិព្រែកតាពៅ សង្កាត់ដើមមៀន ក្រុងតាខ្មៅ រងរបួសត្រង់ថ្ពាល់ខាងឆ្វេង និងមេដៃខាងស្តាំ។ ចំណែកជនបង្កហេតុមានឈ្មោះយ៉េត ណារិន ភេទប្រុស អាយុ៣៦ឆ្នាំ មានប្រពន្ធឈ្មោះឌីន គឹមលី អាយុ២៧ឆ្នាំ មុខរបរលក់គ្រឿងសមុទ្រ មានលំនៅក្នុងភូមិស្ទឹងជ្រៅ សង្កាត់ដើមមៀន ក្រុងតាខ្មៅ។
តាមប្រភពពីកន្លែងកើតហេតុ បានរៀបរាប់ប្រាប់ថា ភាគីទាំងពីរខាងលើ មានតូបលក់ដូរនៅជាប់គ្នា ប៉ុន្តែមិនសូវចេះយោគយល់គ្នាប៉ុន្មានទេ ទើបធ្វើឱ្យកើតមានទំនាស់ រហូតមើលមុខគ្នាលែងចំមួយរយៈមកហើយ។ នៅមុនពេលកើតហេតុ ជនបង្កឈ្មោះយ៉េត ណារិន បានរៀបចំអីវ៉ាន់យកទៅផ្ទះ ដោយបានកាន់ដែកថ្នាំអំពៅយកទៅរុញទឹកក ដើម្បីដាក់គ្រឿងសមុទ្រចូលធុង ស្រាប់តែភ្លាមនោះ ប្តីរបស់ស្ត្រីរងគ្រោះឈ្មោះផេង បូរិន បានស្រែកថា ឯងយកដែកមកវាយសម្លាប់អញមែន? ទើបស្ត្រីជាប្រពន្ធជនបង្កហេតុ បានតបទៅវិញថា ប្តីខ្ញុំយកដែកថ្នាំអំពៅមករុញទឹកកកដាក់គ្រឿងសមុទ្រទេ មិនមែនមកវាយសម្លាប់ឯងនៅក្នុង ផ្សារទេ។
ប្រភពដដែលបន្តថា បន្ទាប់មក ស្ត្រីរងគ្រោះឈ្មោះផេង បូរិន ខឹងក៏ស្ទុះទៅវាយគ្នាជាមួយនឹងស្ត្រីឈ្មោះឌីន គឹមលី ទើបកើតជាការឈ្លោះប្រកែកប្រតាយប្រតប់គ្នាទៅវិញទៅមក ពេលនោះប្តីជនរងគ្រោះ និងជនបង្កបានឃើញក៏បាននាំគ្នាចូលទៅជួយប្រពន្ធរៀងខ្លួនៗ ហើយនៅអំឡុងពេលប្រតាយប្រតប់គ្នានោះ ជនបង្កហេតុបានកាន់ដែកថ្នាំអំពៅ ចូលទៅដែរ ទើបធ្វើឱ្យស្ត្រីរងគ្រោះមានស្នាមរបួសត្រង់ថ្ពាល់ និងមេដៃតែម្តង។
ក្រោយកើតហេតុ សមត្ថកិច្ចបានចុះអន្តរាគមន៍ និងឃាត់ខ្លួនជនបង្កហេតុឈ្មោះយ៉េត ណារិន បញ្ជូនមកកាន់អធិការដ្ឋាននគរបាលក្រុងតាខ្មៅ ដើម្បីធ្វើការសាកសួរ និងចាត់ការបន្តតាមនីតិវិធី៕