ភ្នំពេញ ៖ រថយន្តសណ្តោងធុនយក្ស ដឹកថ្មលើសចំណុះមួយគ្រឿង បានបើកចុះស្ពានស្ទឹងមានជ័យក្នុងល្បឿនលឿន លុះដល់ចំណុចផ្លូវកោងមិនបានបន្ថយល្បឿន ធ្វើឲ្យរថយន្តក្រឡាប់ផ្ងារជើងមួយចំហៀង សង្កត់លើបង្កាន់ដៃស្ពាន បណ្តាលឲ្យរងការខូចខាត តែសំណាងល្អមិនមានគ្រោះថ្នាក់ដល់មនុស្ស ហេតុការណ៍នេះបានកើតឡើងនៅវេលាម៉ោង១០យប់ ថ្ងៃទី២៩ ខែវិច្ឆិកា ឆ្នាំ២០១៧ ចំណុចក្រោមស្ពានស្ទឹងមានជ័យចាស់ សង្កាត់ស្ទឹងមានជ័យ២ ខណ្ឌមានជ័យ ។
តាមប្រភពព័ត៌មានពីកន្លែងកើតបានឲ្យដឹងថា មុនពេលកើតហេតុ គេបានឃើញរថយន្តសណ្តោងធុនយក្សមួយគ្រឿង ម៉ាក HINO ពណ៌ខៀវលាយទឹកប្រាក់ ពាក់ស្លាកលេខភ្នំពេញ 3A- 2252 ជិះគ្នា២នាក់ ទាំងអ្នកបើកបរ បានធ្វើដំណើរតាមផ្លូវ២៧១ ក្នុងទិសដៅពីជើងទៅត្បូងមកដល់ស្ពានអាកាសស្ទឹងមានជ័យ បានវៀងចុះតាមផ្លូវមាត់ប្រឡាយក្រោមស្ពានស្ទឹងមានជ័យចាស់ ក្នុងល្បឿនលឿន លុះដល់ចំណុចកើតហេតុដែលជាផ្លូវកោង ហើយណាមួយរថយន្តដឹកធ្ងន់និងសំពីងសំពោងផងនោះ ធ្វើឲ្យរថយន្តក្រឡាប់ផ្ងារជើងមួយចំហៀង សង្កត់លើបង្កាន់ដៃស្ពាន បណ្តាលឲ្យរងការខូចខាតអស់ប្រមាណ៥០ម៉ែត្រ និងធ្វើឲ្យរថយន្តរងការខូចខាតអស់មួយចំហៀងខាងស្តាំ ហើយភ្លាមៗនោះដែរ គេបានឃើញអ្នកបើករថយន្ត និងជំនួយការរថយន្ត បាននាំគ្នាវាចេញមកក្រៅតាមកញ្ចក់ ដែលបែកស្រាប់ រួចហើយបានរត់គេចខ្លួនបាត់អស់ ។
ក្រោយពេលកើតហេតុ ឃើញមានសមត្ថកិច្ចមូលដ្ឋាន និងជំនាញបានចុះទៅដល់កន្លែងកើតហេតុរួចហើយ បានទំនាក់ទំនងទៅខាងជំនាញចរាចរណ៍រាជធានី ឲ្យមកធ្វើការស្ទូចយករថយន្តបង្កទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ដើម្បីឲ្យម្ចាស់រថយន្តចូលខ្លួនដោះស្រាយ ៕