ខេត្តកំពង់ស្ពឺ ៖ បុរស២នាក់ បានកើតមានជម្លោះពាក្យសម្តីតឹងសរសៃកដាក់គ្នាពីរឿង ទីតាំងបង់ត្រី ស្រាប់តែភាគីម្ខាងទប់កំហឹងមិនបានក៏ដើរទៅផ្ទះ ទាញយកកាំភ្លើងខ្យល់ (បាញ់ គ្រាប់កង់) មកភ្ជង់គំរាមបាញ់សម្លាប់គូទំនាស់របស់ខ្លួន លុះជនរងគ្រោះដាក់ពាក្យប្តឹង ក៏ត្រូវសមត្ថកិច្ចចាប់ឃាត់ខ្លួន កាលពីវេលាម៉ោង៨ និង២០នាទីព្រឹក ថ្ងៃទី០១ ខែធ្នូ ឆ្នាំ២០១៧ នៅចំណុចភូមិបន្ទាយរកា ឃុំក្រាំងដីវ៉ាយ ស្រុកភ្នំស្រួច។
បុរសរងគ្រោះ ដែលត្រូវគូទំនាស់គំរាមបាញ់សម្លាប់នោះ មានឈ្មោះអុន ស៊ីន អាយុ ៣៥ឆ្នាំ មានលំនៅក្នុងភូមិព្រៃកាហៀច ឃុំក្រាំងដីវ៉ាយ ស្រុកភ្នំស្រួច។ ចំណែកជនសង្ស័យមានឈ្មោះសាំង សេង អាយុ៤៦ឆ្នាំ មានលំនៅភូមិបន្ទាយរកា ឃុំក្រាំងដីវ៉ាយ ស្រុកភ្នំស្រួច។
តាមប្រភពពីសមត្ថកិច្ចបានឱ្យដឹងថា នៅមុនពេលកើតហេតុ កាលពីវេលាម៉ោង១០និង៣០នាទីយប់ ថ្ងៃទី៣០ ខែវិច្ឆិកា ឆ្នាំ២០១៧ ជនរងគ្រោះបានទាស់ពាក្យសម្តីតឹងសរសៃកដាក់គ្នា ជាមួយជនសង្ស័យនៅកន្លែងបង់ត្រី ក្នុងភូមិ១កន្លែង តែមិនទាន់ឈានដល់ប្រើអំពើហិង្សានៅឡើយទេ។ លុះក្រោយមក ជនសង្ស័យបានដើរត្រឡប់ទៅផ្ទះមុន រួចក៏កាន់កាំភ្លើងខ្យល់ (កាំភ្លើងបាញ់គ្រាប់កង់) ត្រឡប់មកកន្លែងបង់ត្រីវិញ រួចក៏លើកាំភ្លើងភ្ជង់ជនរងគ្រោះ និងថែមទាំងបានស្រែកគំរាមបាញ់សម្លាប់ជនរងគ្រោះទៀតផង។ លុះមកដល់វេលាព្រឹក ថ្ងៃទី០១ ខែធ្នូ ឆ្នាំ២០១៧ ជនរងគ្រោះក៏បាន មកដាក់ពាក្យបណ្តឹងឱ្យសមត្ថកិច្ចជួយអន្តរាគមន៍តែម្តង។
ប្រភពដដែលបន្តថា ក្រោយទទួលបានពាក្យបណ្តឹងពីជនរងគ្រោះរួចមក សមត្ថកិច្ចបានកោះហៅជនសង្ស័យមកសាកសួរ។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានយកកាំភ្លើងខ្យល់ភ្ជង់គំរាមប៉ងសម្លាប់ជនរងគ្រោះពិតមែន មូលហេតុដោយសារតែកើតមានទំនាស់ពាក្យសម្តីនៅកន្លែងបង់ត្រី។
ជនសង្ស័យខាងលើ ត្រូវបានសមត្ថកិច្ចរៀបចំកសាងសំណុំរឿង បញ្ជូនខ្លួនទៅកាន់ស្នងការដ្ឋាននគរបាលខេត្ត ដើម្បីចាត់ការបន្តតាម នីតិវិធី៕