ភ្នំពេញ ៖ ជនសង្ស័យម្នាក់ក្រោយពីបក្ខពួកឌុបយកមកទម្លាក់ ហើយធ្វើសកម្មភាពលួចកាច់ សោកម៉ូតូ មិនទាន់បានសម្រេចផង ចំថ្ងៃស៊យប៉ះចំម៉ូតូមានតេឡេ កំពុងធ្វើសកម្មភាព ស្រាប់តែម៉ូតូរោទ៍សំឡេង ម្ចាស់ចេញមកចាប់ក្របួចជាប់ភ្លាម បានទាំងសោ ឧបករណ៍សម្រាប់កាច់សោទៀត នាំប្រគល់ទៅឲ្យប៉ូលិស កាលពីវេលាម៉ោង១២និង៣០នាទីរសៀល ថ្ងៃទី០៣ ខែធ្នូ ឆ្នាំ២០១៧ ស្ថិតនៅភូមិថ្មគោល១ សង្កាត់ចោមចៅ២ ខណ្ឌពោធិសែនជ័យ ។
ជនសង្ស័យឃាត់ខ្លួនឈ្មោះ ជួប សុភា ភេទប្រុស អាយុ២១ឆ្នាំ មុខរបរមិនពិតប្រាកដ ស្នាក់នៅផ្ទះជួល ភូមិគោកចំបក់ សង្កាត់ចោមចៅ២ ខណ្ឌពោធិសែនជ័យ មានស្រុកកំណើតភូមិបុរីកម្មករ សង្កាត់ភ្នំពេញថ្មី ខណ្ឌសែនសុខ ។ ចំណែកម៉ូតូដែលជនសង្ស័យប៉ុនប៉ងលួច ម៉ាកហុងដា សេ១២៥ សេរី២០១១ ពណ៌ខ្មៅ ពាក់ស្លាកលេខ ក្រចេះ 1B-0723 មានម្ចាស់ ជាជនរងគ្រោះឈ្មោះ សុខ ម៉ាន ភេទប្រុស អាយុ៤៩ឆ្នាំ មុខរបរជាមន្រ្តីយោធា មានទីលំនៅកន្លែងកើតហេតុ មានស្រុកកំណើតភូមិកោះទ្រមូង ឃុំបឹងសាលាខាងជើង ស្រុកកំពង់ត្រាច ខេត្តកំពត ។
តាមការរៀបរាប់ពីម្ចាស់ម៉ូតូបានឲ្យដឹងថា មុនកើតហេតុ ម៉ូតូចតទុកដាក់មុខផ្ទះ រវល់តែនៅខាងក្នុង ស្រាប់តែឮសូរសម្លេងតេឡេម៉ូតូរោទ៍ឡើង ក្រឡេកមើលតាមកញ្ចក់ទ្វារឃើញជនសង្ស័យកំពុងធ្វើសកម្មភាពរត់ចេញមកស្រែកចាប់ជាប់ ផ្អើលទាំងមេភូមិនៅក្បែរនោះស្រាប់ មកជួយឃាត់ចាប់ជាប់ រកឃើញទាំងឧបករណ៍ ចាប់ដឹក នាំខ្លួនទៅប្រគល់ឲ្យប៉ូលីសប៉ុស្តិ៍ចោមចៅ២ តែម្តង ។
តាមសម្តីជនសង្ស័យវិញបានឲ្យដឹងថា ខ្លួនធ្លាប់ធ្វើសកម្មភាពលួចម៉ូតូបានម្តង លុះលើកទី២នេះ បន្ទាប់ពីបក្ខពួកឌុបមកទម្លាក់ឲ្យធ្វើសកម្មភាពកាច់ម៉ូតូខាងលើ ម្ចាស់មកទាន់ចាប់ខ្លួនជាប់ ។
ជនសង្ស័យក្រោយពីចាប់ឃាត់ខ្លួនបាន រួមជាមួយវត្ថុតាង សមត្ថកិច្ចកសាងសំណុំរឿងបញ្ជូនទៅផ្នែកជំនាញអធិការដ្ឋានខណ្ឌចាត់ការបន្តតាមនីតិវិធី ៕