ភ្នំពេញ ៖ បុរសម្នាក់ បាត់អស់ម៉ូតូអូសរុឺម៉កដឹកបន្លែមួយគ្រឿង ខណៈដែលទិញបន្លែបានហើយ រវល់តែចូលទៅយកសាច់ជ្រូក ចេញមកវិញចោរលួចម៉ូតូរុឺម៉កទៅបាត់ ទាំងបន្លែ។ អស់សង្ឃឹមពេករត់ទៅប្តឹងប៉ូលិស កាលពីវេលាម៉ោង៦ព្រឹក ថ្ងៃទី០៤ ខែធ្នូ ឆ្នាំ២០១៧ ស្ថិតនៅខាងក្រោយផ្សារសុិនជូរី លើផ្លូវ២០០៤ ភូមិតាងួន សង្កាត់កាកាប១ ខណ្ឌពោធិសែនជ័យ ។
ជនរងគ្រោះឈ្មោះ គ្រិច ម៉ៅ ភេទប្រុស អាយុ៤០ឆ្នាំ មុខរបរ លក់បន្លែ នៅផ្ទះសហគមន៍ ភូមិអណ្ដូង សង្កាត់គោករកា ខណ្ឌព្រែកព្នៅ មានប្រពន្ធឈ្មោះ កែវ ស្រីអូន អាយុ៣០ឆ្នាំ លក់បន្លែ មានកូនស្រីចំនួន៣នាក់ក្នុងបន្ទុក ។ ចំណែកម៉ូតូដែលជនសង្ស័យលួចយកទៅបាត់ ម៉ាក ហុងដា វ៉េវ សណ្តោងរុឺម៉ក ដឹកបន្លែពេញ ។
តាមការរៀបរាប់ពីបុរសរងគ្រោះបានឲ្យដឹងទាំងក្តីអស់សង្ឃឹមថា ខណៈដែលជីវភាពកំពុងតែក្រផង ក្នុងរបរលក់បន្លែនៅផ្ទះ រាល់ថ្ងៃ រាល់ព្រឹក មកទទួលទិញបន្លែយកទៅលក់បន្ត ស្រាប់តែនៅព្រឹកថ្ងៃទី០៤ ខែធ្នូនេះ ខណៈដែលទិញបន្លែនៅផ្សារសុិនជូរី ដាក់បានពេញរុឺម៉កអស់ហើយ ចូលទៅយកសាច់ជ្រូកមួយភ្លែត ស្រាប់តែចេញមកវិញ ចោរលួចម៉ូតូរុឺម៉កទៅបាត់ កាន់តែថង់សាច់ជ្រូក ដើរស្វែងរកអស់សង្ឃឹមឃើញ មានតែដើរទៅប្តឹងប៉ូលិសប៉ុស្តិ៍កាកាប១ ដើម្បីឲ្យជួយអន្តរាគមន៍ ស្រាវជ្រាវ ។
ជនរងគ្រោះត្អូញត្អែថា រស់រាល់ថ្ងៃ បានរុឺម៉កម៉ូតូខាងលើ គ្រាន់ជាមធ្យោបាយឌុប ដឹក បន្លែ លក់គ្រាន់បានកម្រៃ មកដល់ពេលនេះអស់ហើយ ដឹងបានអ្វីពឹងទៀត មានតែប៉ូលិស មេត្តាជួយរកឲ្យគាត់ផង ៕