ភ្នំពេញ ៖ ជនសង្ស័យមេក្លោងគ្រឿងញៀនម្នាក់ ល្បីខាងជាប់គុកមិនដែលយូរមកដល់លើនេះត្រូវបានកម្លាំងមន្ទីរប្រឆាំងគ្រឿងញៀនក្រសួងមហាផ្ទៃ បង្ក្រាបចាប់ខ្លួនបានសារជាថ្មី កាលពីវេលាម៉ោង៣និង៣០នាទីរសៀល ថ្ងៃទី០៥ ខែធ្នូ ឆ្នាំ២០១៧ ស្ថិតនៅតាមផ្លូវដីវាល ខាងក្រោយភូមិព្រៃល្វា សង្កាត់ចោមចៅ២ ខណ្ឌពោធិសែនជ័យ ហើយបន្តនាំទៅឆែកឆេរដល់បន្ទប់ជួល លេខA71 ភូមិត្រពាំងថ្លឹង សង្កាត់ចោមចៅ១ ខណ្ឌពោធិសែនជ័យ ។
ជនសង្ស័យជាមុខសញ្ញាចាស់ ជួញដូរគ្រឿងញៀន ល្បីខាងជាប់គុកមិនដែលយូរខាងលើ មានឈ្មោះ ស៊ុន កាសុី ភេទប្រុស អាយុ៣៥ឆ្នាំ មុខរបរជួញដូរគ្រឿងញៀន ស្នាក់នៅបន្ទប់ជួលអា៧១ ភូមិត្រពាំងថ្លឹង សង្កាត់ចោមចៅ១ ខណ្ឌពោធិសែនជ័យ មានស្រុក កំណើតភូមិត្រពាំងធ្នង់ ឃុំម្កាក់ ស្រុកពញាឮ ខេត្កកណ្តាល ។
តាមប្រជាពលរដ្ឋក្នុងមូលដ្ឋាន ភាគច្រើនស្គាល់មុខ ជនសង្ស័យជាបងធំសកម្ម ខាងជួញដូរគ្រឿងញៀនទ្រង់ទ្រាយធំ កន្លងមកសមត្ថកិច្ចធ្លាប់ចាប់បង្ក្រាបច្រើនលើកច្រើនសារមកហើយ គ្រាន់តែមិនដែលបានយូរ យ៉ាងច្រើន៣ទៅ៤ថ្ងៃ នឹងចេញមកវិញ ជួញដូរគ្រឿងញៀនវិញដដែល ហើយរងចាំមើលលើកនេះ បានប៉ុន្មានថ្ងៃ ចេញមកវិញ រងចាំតាមដានទាំងអស់គ្នា។
តាមនគរបាលក្នុងប្រតិបត្តិការបង្ក្រាបគ្រឿងញៀនខាងលើបានឲ្យដឹងថា ក្រោយពីស្រាវជ្រាវ មុខសញ្ញាសកម្មខាងជួញដូរថ្នាំញៀន នៅនៅវេលាម៉ោងខាងលើ កម្លាំងជំនាញ ចាប់បានបក្ខពួក៥នាក់ ហើយឈានដល់ចាប់បានមេក្លោង នៅខាងក្រោយភូមិព្រៃល្វា សង្កាត់ចោមចៅ២ សរុបទាំងមេក្លោង ចំនួន៦នាក់ ហើយនាំមេក្លោងខាងលើ ទៅនាំឆែកបន្ទប់ជួល ដកហូតបានថ្នាំញៀន២៣កញ្ចប់ តូច១១កញ្ចប់ កណ្តាល១០កញ្ចប់ ខ្នាតធំ២កញ្ចប់ ដាវសាំម៉ូរ៉ៃ៣ដើម និងសម្ភារៈមួយចំនួនទៀត ។
ក្រោយពីចាប់ខ្លួនបានមេក្លោងជួញដូរគ្រឿងញៀន ប្រវត្តិជាប់គុកមិនដែលយូរ និងបក្ខពួក កូនចៅ៥នាក់ទៀត សរុប៦នាក់ រួមជាមួយវត្ថុតាង ត្រូវបាននគរបាលនាំទៅកាន់មន្ទីរប្រឆាំងគ្រឿងញៀនក្រសួងមហាផ្ទៃ ដើម្បីកសាងសំណុំរឿងសារជាថ្មី បញ្ជូនទៅតុលាការចាត់ការបន្តទៅតាមនីតិវិធី ៕