ភ្នំពេញ ៖ ជនសង្ស័យពីរនាក់ ត្រូវសមត្ថកិច្ចប៉ុស្តិ៍នគរបាលរដ្ឋបាលបឹងរាំង ឃាត់ខ្លួនជាក់ស្ដែងបន្ទាប់ពីធ្វើសកម្មភាពឆក់កាបូបដៃពីជនរងគ្រោះ រួចជ្រុលទៅបុកម៉ូតូមួយគ្រឿងទៀត ត្រូវប្រជាពលរដ្ឋស្វាគមន៍ម្នាក់មួយដៃមួយជើង សន្លប់ធំ កាលពីវេលាម៉ោង៣និង៥០នាទីរសៀល ថ្ងៃ១១ ខែធ្នូ ឆ្នាំ២០១៧ ត្រង់ចំណុចផ្លូវលេខ២០៨ កែងផ្លូវលេខ៥១ សង្កាត់បឹងរាំង ខណ្ឌដូនពេញ ។
ជនសង្ស័យទាំង២នាក់ដែលសមត្ថកិច្ចឃាត់ខ្លួនបានមានឈ្មោះ ទី១-ឈ្មោះ ម៉ាន ម៉េងហួរ អាយុ១៧ឆ្នាំ មុខរបរមិនពិតប្រាកដ ស្នាក់នៅផ្ទះគ្មានលេខ ផ្លូវលំ សង្កាត់ច្បារអំពៅ ខណ្ឌច្បារអំពៅ ទី២-ឈ្មោះ យ៉ យ៉ាំងត្រៅ ភេទប្រុស អាយុ១៦ឆ្នាំ មុខរបរធ្វើសំណង់ ស្នាក់នៅផ្លូវលំ សង្កាត់ច្បារអំពៅ ខណ្ឌច្បារអំពៅ ។ ចំណែកជនរងគ្រោះឈ្មោះ សឿន ស្រីល័ក្ខ ភេទស្រី អាយុ២៨ឆ្នាំ មុខរបរជាងអ៊ុតសក់ ស្នាក់នៅផ្ទះលេខ៥ ផ្លូវលេខ៥០៨ សង្កាត់ផ្សារដើមថ្កូវ ខណ្ឌចំការមន ។
បើតាមសំដីរបស់ជនរងគ្រោះបានប្រាប់អោយដឹងថា មុនពេលកើតហេតុគាត់ជិះរ៉ឺម៉កម៉ូតូមានគ្នាបីនាក់ បម្រុងទៅបើកតូបអ៊ុតសក់ នៅតាមផ្លូវលេខ៥១ ខណៈពេលមកដល់កន្លែងកើតហេតុខាងលើមានជនសង្ស័យពីរនាក់ ជិះម៉ូតូម៉ាកហុងដាឌ្រីម ពណ៌ខ្មៅ ស្លាក់លេខ បាត់ដំបង 1B-7537 ជិះមកពីក្រោយជនរងគ្រោះបានធ្វើសកម្មភាពឆក់កាបូបពីជនរងគ្រោះបានសំរេច តែត្រូវជនរងគ្រោះស្រែកថា ចោរៗ ក៏ត្រូវសមត្ថកិច្ចជិះម៉ូតូបុកដួល ត្រូវប្រជាពលរដ្ឋវ៉ៃម្នាក់មួយដៃម្នាក់ជើងសន្លប់ធំ ។
ក្រោយពេលកើតហេតុជនរងគ្រោះបានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលបឹងរាំងដើម្បីអោយសមត្ថិកិច្ចធ្វើតាមផ្លូវច្បាប់ ។ ចំណែកជនសង្ស័យទាំងពីរនាក់ត្រូវសមត្ថកិច្ចនគរបាលប៉ុស្តិ៍ធ្វើការសាកសួរ និងបានកសាងសំណុំរឿងបញ្ជូនទៅអធិការដ្ឋានខណ្ឌដូនពេញដើម្បីបន្តនីតិវិធី ៕
