ខេត្តក្រចេះ ៖ បុរសម្នាក់បានស្ពាយឧបករណ៍ឆក់ដើរចេញទៅឆក់ត្រីនៅក្នុងបឹង ស្រាប់តែអកុសល ភ្លាត់ស្នៀតឆក់ខ្លួនឯងស្លាប់យ៉ាងអាណោចអាធ័ម កាលពីព្រឹកថ្ងៃទី១៣ ខែធ្នូ ឆ្នាំ២០១៧ នៅចំណុចមាត់បឹងមួយកន្លែង ស្ថិតក្នុងភូមិថ្មរៀប ឃុំព្រែកប្រសព្វ ស្រុកព្រែកប្រសព្វ។
បុរសរងគ្រោះ ដែលបាត់បង់ជីវិតនោះ មានឈ្មោះតី ណា អាយុ៥០ឆ្នាំ មុខរបរកសិករ មានលំនៅក្នុងភូមិកើតហេតុខាងលើ។
តាមប្រភពពីក្រុមគ្រួសារជនរងគ្រោះបានរៀបរាប់ប្រាប់ថា នៅមុនពេលកើតហេតុ កាលពីព្រឹកថ្ងៃទី១៣ ខែធ្នូ ឆ្នាំ២០១៧ ដោយសារតែឃើញនៅផ្ទះអត់មានម្ហូបសម្រាប់ស្លហូប ជនរងគ្រោះក៏បានស្ពាយឧបករណ៍ឆក់ដើរចេញពីផ្ទះសំដៅទៅបឹង ទីតាំងកើតហេតុខាងលើ បំណងឆក់ត្រីយកមកធ្វើម្ហូប។ ស្រាប់តែអកុសល ពេលកំពុងដើរឆក់ត្រីសុខៗ ក៏ភ្លាត់ស្នៀត ធ្វើឱ្យឧបករណ៍ឆក់មកឆក់ខ្លួនឯង បណ្តាលឱ្យស្លាប់យ៉ាងអាណោចអាធ័មនៅមាត់បឹង និងត្រូវបាន អ្នកភូមិប្រទះឃើញ រត់មកប្រាប់ក្រុមគ្រួសារ ធ្វើឱ្យមានការតក់ស្លុតយ៉ាងខ្លាំង និងបានរាយការណ៍ទៅនគរបាលមូលដ្ឋានឱ្យចុះពិតនិត្យ។
បន្ទាប់ពីទទួលបានសេចក្តីរាយការណ៍ខាងលើរួចមក កម្លាំងនគរបាលជំនាញ បានចុះពិនិត្យ និងធ្វើកោសល្យវិច័យសព រួចបញ្ជាក់ថា ជនរងគ្រោះពិតជាស្លាប់ដោយសារឧបករណ៍ឆក់ត្រីស្លាប់ប្រាកដមែន។
សពជនរងគ្រោះត្រូវបានសមត្ថកិច្ចប្រគល់ឱ្យក្រុមគ្រួសារ ដើម្បីរៀបចំធ្វើបុណ្យតាមប្រពៃណី៕