ខឹងប្រពន្ធលាក់ម៉ូតូមិនឱ្យជិះទៅជួបស្រីថ្មី! ចាក់សាំងដុតផ្ទះ រួចលេបថ្នាំសម្លាប់ខ្លួន

ខេត្តព្រៃវែង ៖ បុរសម្នាក់មានប្រពន្ធកូនរួចទៅហើយ តែបែរជាបែកគំនិតលួចទាក់ទងស្នេហាជាមួយស្រីថ្មី លុះប្រពន្ធដឹង ក៏ចេះតែព្យាយាមរារាំងមិនឱ្យប្តីទៅជួបជាមួយនឹងស្រីស្នេហ៍ ដោយយកម៉ូតូលាក់មិនឱ្យប្តីជិះ ទើបធ្វើឱ្យប្តីខឹង ក៏យកសាំងមកចាក់នៅក្រោមផ្ទះ ប៉ុនប៉ងដុតផ្ទះ លុះសមត្ថកិច្ចចុះអន្តរាគមន៍ទាន់ បុរសជាប្តីស្រាប់តែស្ទុះរត់ឡើងទៅលើផ្ទះសម្ងំ លេបថ្នាំសម្លាប់ខ្លួន តែសំណាងល្អត្រូវបានសមត្ថកិច្ចជួយដឹកបញ្ជូនទៅមន្ទីរពេទ្យទាន់ពេល។

ហេតុការណ៍បុរសតូចចិត្តប្រពន្ធមិនឱ្យទៅជួបស្រីថ្មី បែរជាប៉ងដុតផ្ទះ រួចលេបថ្នាំសម្លាប់ខ្លួននេះ បានកើតមានការភ្ញាក់ផ្អើលឡើង កាលពីវេលាម៉ោង៧និង១០នាទីយប់ ថ្ងៃទី១៥ ខែធ្នូ ឆ្នាំ២០១៧ នៅចំណុចភូមិស្លា ឃុំកំពង់ឫស្សី ស្រុកពោធិ៍រៀង។

បុរសដែលប៉ុនប៉ងដុតផ្ទះខ្លួនឯង រួចព្យាយាមលេបថ្នាំធ្វើអត្តឃាតទៀតនេះ មានឈ្មោះជា សារ៉ុន អាយុ៤១ឆ្នាំ មុខរបរកសិករ មានប្រពន្ធឈ្មោះសួន នួន អាយុ៤០ឆ្នាំ មុខរបរកសិករ មានលំនៅក្នុងភូមិឃុំកើតហេតុខាងលើ។

តាមសម្តីស្ត្រីជាប្រពន្ធ បានរៀបរាប់ប្រាប់ថា ប្តីរបស់គាត់នេះ គឺជាមនុស្សប្រុសខូចខិលខ្លាំងណាស់ មានប្រពន្ធកូនរួចទៅហើយ បែរជាមានគំនិតក្បត់ផិតប្រពន្ធ លួចលាក់ទាក់ទងស្នេហាជាមួយស្រីថ្មីម្នាក់ទៀត និងចេះតែស្កាត់ទៅជួបស្រីស្នេហ៍ម្នាក់នោះជាញឹកញាប់ ហើយទោះជាគាត់ខំលួងលោមអូសទាញផង រករឿងឈ្លោះគំរាមផងយ៉ាងណា ក៏ប្តីនៅតែមិនដាច់អាល័យពីស្រីថ្មីនោះឡើយ។

ស្ត្រីជាប្រពន្ធបន្តថា ដោយសារតែអូសទាញប្តីមិនបាន ទើបគាត់បានសម្រេចចិត្តយកម៉ូតូទៅលាក់ទុក ដើម្បីកុំឱ្យប្តីមានមធ្យោបាយ ជិះទៅរកស្រីស្នេហ៍នោះទៀត លុះប្តីសួររកម៉ូតូ គាត់ក៏ប្រាប់ប្តីថា ម៉ូតូនោះគាត់បានយកទៅលក់បាត់ហើយ ធ្វើឱ្យប្តីរបស់គាត់ខឹងច្រឡោត ទាមទារយកប្រាក់ថ្លៃម៉ូតូចំនួន៤០០ដុល្លារ តែគាត់មិនព្រមឱ្យ។

ស្ត្រីជាប្រពន្ធ បានឱ្យដឹងទៀតថា លុះមកដល់ថ្ងៃកើតហេតុ គាត់និងប្តី ក៏បានឈ្លោះប្រកែកគ្នាពីរឿងម៉ូតូ ដោយប្តីមិនដឹងថា គាត់យកម៉ូតូទៅលាក់ ស្មានថា គាត់លក់ម៉ូតូមែន ក៏តាមទារលុយចំនួន៤០០ដុល្លារ តែគាត់មិនឱ្យ ទើបធ្វើឱ្យប្តីខឹង ក៏ទៅយកសាំងមកចាក់ពីក្រោមផ្ទះ រួចក៏យកអង្ករចាក់ពីលើ បំរ៉ុងធ្វើសកម្មភាពដុតផ្ទះកំទេចចោល តែគាត់បានរាយការណ៍សុំអន្តរាគមន៍ទាន់ពេល ដោយកម្លាំងនគរបាលស្រុក និងប៉ុស្តិ៍កំពង់ឫស្សី ព្រមទាំង​ប្រជាការពារដឹកនាំដោយលោកអធិការ បានទៅដល់ទាន់ពេលវេលា ស្រាប់តែប្តីបានស្ទុះរត់ឡើងទៅសម្ងំលើផ្ទះលេបថ្នាំសម្លាប់ខ្លួនវិញម្តង តែសំណាងល្អសមត្ថកិច្ចបានដឹងទាន់ ក៏ជួយអន្តរាគមន៍ទាន់ពេល។

តាមប្រភពពីសមត្ថកិច្ច បានឱ្យដឹងថា ក្រោយពីទទួលបានសេចក្តីរាយការណ៍ថា មានករណីបុរសម្នាក់ប៉ុនប៉ងដុតផ្ទះចោល សមត្ថកិច្ចបានចុះអន្តរាគមន៍ដល់ទីតាំងកើតហេតុ លុះគ្រាន់តែឃើញសមត្ថកិច្ចទៅដល់ជនបង្កហេតុ ឈ្មោះជា សារ៉ុន ក៏បានស្ទុះរត់ឡើងទៅលើផ្ទះ បិទទ្វារចាក់គន្លឹះ សម្ងំតែម្នាក់ឯង បានប្រហែលជិតមួយម៉ោង ស្រាប់តែឮសំឡេងជនបង្កហេតុ ស្រែកហៅឱ្យជួយថា ខ្ញុំពុលថ្នាំហើយជួយផង។ នៅពេលឃើញសភាពការណ៍មិនស្រួលណាមួយ ឮសំឡេងជនបង្កហេតុក្អួតផង ទើបលោកអធិការបានឱ្យកំលាំងឡើងតាមបង្អួចមើល ក៏ប្រទះឃើញជនបង្កហេតុ ក្រាបក្អួតលុតជង្គង់នឹងរនាប ដោយសារតែជនបង្កហេតុបានលេបថ្នាំក្រពះ ជាច្រើនគ្រាប់ដើម្បីសម្លាប់ខ្លួន។ ភ្លាមនោះ សមត្ថកិច្ចក៏បានចូលទៅជួយសង្គ្រោះជនបង្កហេតុទាន់ពេលវេលា។

ក្រោយកើតហេតុ សមត្ថកិច្ចបានទាក់ទងហៅរថយន្តសង្គ្រោះ មកដឹកបញ្ជូនជនរងគ្រោះ ទៅកាន់មន្ទីរពេទ្យបង្អែកស្រុកពារាំង។

ចំណែកម៉ូតូម៉ាកហុងដាឌ្រីម សេ១២៥ ស៊េរីឆ្នាំ២០១៧ ពណ៌ខ្មៅ ពាក់ស្លាកលេខភ្នំពេញ 1GD-7083 ត្រូវបានសមត្ថកិច្ចអូសយកទៅរក្សាទុកនៅប៉ុស្តិ៍នគរបាល រង់ចាំម្ចាស់ ត្រឡប់មកពីព្យាបាលពីមន្ទីពេទ្យ ទើបប្រគល់ឱ្យវិញ៕