ខេត្តកណ្តាល ៖ ជារឿងគួរឱ្យរន្ធត់ចិត្ត និងសោកសង្រេងបំផុតមួយ សម្រាប់គូស្នេហ៍ស្មោះស្ម័គ្រមួយគូនេះ ខណៈដែលនៅសល់តែរយៈពេល១សប្តាហ៍ទៀតប៉ុណ្ណោះ ដល់ថ្ងៃចូលរោងការក្លាយជាប្តីប្រពន្ធនឹងគ្នាទៅហើយ ស្រាប់តែកម្មកាចតាមមកពង្រាត់ដោយនៅសុខៗកូនកំលោះ ធ្លាក់ខ្លួនឈឺធ្ងន់ចូលសង្គ្រោះបន្ទាន់ក្នុងមន្ទីរពេទ្យ ប៉ុន្តែដោយស្ថានភាពធ្ងន់ពេក ក្រុមគ្រូពេទ្យមិនអាចសង្គ្រោះបាន ក៏បណ្តាលឱ្យបុរសជាកូនកំលោះដាច់ខ្យល់ស្លាប់យ៉ាងអាណោចអាធ័ម ចោលនារីជាគូដណ្តឹងដោយគ្មានពាក្យលាសូម្បីមួយម៉ាត់។
បុរសរងគ្រោះដែលជិតដល់ថ្ងៃចូលរោងការ ស្រាប់តែជួបគ្រោះអកុសលឈឺស្លាប់ចោលគូដណ្តឹងនេះ ត្រូវបានគេស្គាល់ឈ្មោះញឿន ភ័ស្ត មានគណនីហ្វេសប៊ុកឈ្មោះ Phoas Love Veacha។ ចំណែកនារីអភ័ព្វដែលធ្លាក់ខ្លួនជា មេម៉ាយខាន់ស្លា មានឈ្មោះហួ វាចា មានគណនីហ្វេសប៊ុកឈ្មោះ Oun Veacha និងមានលំនៅក្នុងភូមិមនោរម្យ ឃុំបែកចាន ស្រុកអង្គស្នួល។
គូស្នេហ៍ខាងលើបានភ្ជាប់ពាក្យក្លាយជាគូដណ្តឹងនឹងគ្នា កាលពីថ្ងៃទី១៩ ខែឧសភា ឆ្នាំ២០១៧ កន្លងទៅ និងកំពុងត្រៀមដឹកដៃគ្នាចូលរោងការនៅថ្ងៃទី២៩ ខែធ្នូ ឆ្នាំ២០១៧ ខាងមុខ នៅឯគេហដ្ឋានកូនក្រមុំ ក្នុងភូមិមនោរម្យ ឃុំបែកចាន ស្រុកអង្គស្នួល ខេត្តកណ្តាល ស្រាប់តែកៀកដល់ថ្ងៃមង្គលទៅហើយ បែរជាមកជួបរឿងអកុសល ត្រូវព្រាត់និរាសគ្នា ដោយគ្មានថ្ងៃជួបបែបនេះទៅវិញ។
យោងតាមគណនីហ្វេសប៊ុករបស់នារីជាគូដណ្តឹង ឈ្មោះ Oun Veacha កាលពីយប់ថ្ងៃទី១៩ ខែធ្នូ ឆ្នាំ២០១៧ បានបង្ហោះរូបថតបុរសរងគ្រោះជាគូដណ្តឹងរបស់ខ្លួន១សន្លឹក ដែលកំពុងស្ថិតក្នុងស្ថានភាពដេកស្តូកស្តឹងនៅលើគ្រែពេទ្យក្នុងបន្ទប់សង្គ្រោះបន្ទាន់ ព្រមទាំងមានដាក់អុកស៊ីហ្ស៊ែនជំនួយដង្ហើមផង និងថែមទាំងបានសរសេរសារខ្លីមួយឃ្លាថា “ឆាប់ក្រោកឡើងបងសម្លាញ់ខំប្រឹងតស៊ូណាបងឆាប់ជា ណាបងសម្លាញ់…”។
បន្ទាប់ពីឃើញការបង្ហោះរូបថតព្រមជាមួយសារក្រៀមក្រំបែបនេះ គេឃើញមិត្តភក្តិនៅក្នុងបណ្តាញសង្គមហ្វេសប៊ុកជាច្រើន បានសាកសួរពីស្ថានភាពជំងឺរបស់បុរសរងគ្រោះជាគូដណ្តឹង និងត្រូវបាននារីជាគូដណ្តឹងឈ្មោះហួ វាចា បានឆ្លើយតបវិញថា គូដណ្តឹងរបស់នាងដំបូងឡើយនៅមានកម្លាំង និងសុខភាពល្អ មាំមួនធម្មតា ប៉ុន្តែនៅមុនពេលកើតហេតុ គាត់បានកើតមានអាការក្តៅខ្លួន និងរួយក រួចក៏សន្លប់លែងដឹងខ្លួន លុះពេលបញ្ជូនមកដល់មន្ទីរពេទ្យជោរ៉ៃ បឹងស្នោ ស្ថិតក្នុងខណ្ឌច្បារអំពៅ ក្រុមគ្រូពេទ្យជំនាញពិិនិត្យិរួច ក៏បានបញ្ចាក់ប្រាប់ថា គាត់បានកើតមានជំងឺរលាកសួតធ្ងន់ ធ្វើឱ្យក្រុមគ្រួសារ ពិសេសនាងជាគូដណ្តឹងមានអារម្មណ៍តក់ស្លុតយ៉ាងខ្លាំង មិនគួរនៅសុខៗ និងជិតដល់ថ្ងៃចូលរោងការទៅហើយ បែរជាបុរសជាគូដណ្តឹងរបស់នាងធ្លាក់ខ្លួនឈឺធ្ងន់បែបនេះសោះ។
ដោយឡែក តាមប្រភពពីមិត្តភក្តិបុរសរងគ្រោះ បានបង្ហើបប្រាប់ថា ជនរងគ្រោះឈ្មោះ ញឿន ភ័ស្ត បានកើតអាការសន្លប់នៅពេលដែលកំពុងបំពេញការងារនៅខេត្តសៀមរាប និងត្រូវបានក្រុមគ្រួសារបញ្ជូនមកព្យាបាលនៅភ្នំពេញ និងត្រូវក្រុមគ្រូពេទ្យប្រាប់ថា ជនរងគ្រោះមានជំងឺឈាមសស៊ីឈាមក្រហម និងរលាកសួតធ្ងន់។ ទីបំផុតក្រោយពីដេកសម្រាកព្យាបាលក្នុងមន្ទីរពេទ្យអស់រយៈពេលប៉ុន្មានថ្ងៃ ដោយសារតែមិនអាចទ្រាំទ្រនឹងស្ថានភាពជំងឺបាន ជនរងគ្រោះក៏បានដាច់ខ្យល់ស្លាប់យ៉ាងអាណោចអាធ័ម នៅវេលាម៉ោង៣និង១៥នាទី រំលងអធ្រាត្រ ឈានចូលថ្ងៃទី២២ ខែធ្នូ ឆ្នាំ ២០១៧ និងត្រូវបានក្រុមគ្រួសារដឹកសពទៅកាន់លំនៅឋាន ដើម្បីរៀបចំធ្វើបុណ្យតាមប្រពៃណី។
បន្ទាប់ពីទទួលដំណឹងដ៏ក្រៀមក្រំ និងរន្ធត់ខាងលើនេះ អ្នកប្រើប្រាស់បណ្តាញសង្គមហ្វេសប៊ុក ពិសេសមិត្តភក្តិរបស់គូស្នេហ៍អភ័ព្វខាងលើ បានសម្តែងនូវអារម្មណ៍រន្ធត់ចិត្តយ៉ាងខ្លាំង ដែលមិនគួរណាគូស្នេហ៍ដែលស្រលាញ់គ្នាល្អិតល្មួត ផ្អែមល្អែមដូចស្ករ បែរជាមកត្រូវព្រាត់និរាសគ្នាទាំងជិតដល់ពេលវេលាត្រូវចូលរោងការបែបនេះសោះ។ ជាមួយនេះ ក៏មានអ្នកជួយលើកម្លាំងចិត្តដល់នារីជាគូដណ្តឹងដែលក្លាយជាមេម៉ាយខាន់ស្លាឱ្យរឹងមាំ និងប្រឹងតស៊ូបន្តដំណើរទៅមុខទៀត។
ជុំវិញរឿងរ៉ាវដ៏សោកសង្រេងខាងលើនេះ “នគរធំ” មិនអាចទាក់ទងសុំការបំភ្លឺពីសាច់ញាតិ ពិសេសសាមីខ្លួននារីជាគូដណ្តឹងដែលទើបនឹងបាត់បង់បុរសជាទីស្រលាញ់ និងជាអនាគតស្វាមី របស់ខ្លួនទៅបាននៅឡើយទេ កាលពីម្សិលមិញ។ យ៉ាងណា យើងរង់ចាំការបកស្រាយបំភ្លឺពីគ្រប់ ភាគីពាក់ព័ន្ធទាំងអស់៕