ខេត្តកំពង់ធំ ៖ ស្ត្រីម្នាក់បានដើរទៅដងទឹកអណ្តូងនៅខាងមុខផ្ទះ ទាំងមេឃកំពុងធ្លាក់ភ្លៀងរលឹមស្រិចៗ ស្រាប់តែអកុសល ត្រូវរន្ទះបាញ់ បណ្តាលឱ្យស្លាប់យ៉ាងអាណោចអាធ័មចោលប្តី និងកូន៤នាក់ បង្កឱ្យមានការភ្ញាក់ផ្អើលឡើង កាលពីវេលាម៉ោង៣និង៤០នាទីរសៀល ថ្ងៃទី២៩ ខែមករា ឆ្នាំ២០១៨ នៅចំណុចខាងមុខផ្ទះស្ត្រីរងគ្រោះ ស្ថិតក្នុងភូមិអន្លង់ជួរ ឃុំក្រយា ស្រុកប្រាសាទបល្ល័ង្គ។
ស្ត្រីរងគ្រោះដែលត្រូវរន្ទះបាញ់ស្លាប់ មានឈ្មោះសៅ រ៉ុន អាយុ៣៧ឆ្នាំ មានប្តីឈ្មោះហម ហយ អាយុ៤៨ឆ្នាំ មុខរបកសិករ មានកូនក្នុងបន្ទុក៤នាក់ (ប្រុស២ ស្រី២) សព្វថ្ងៃមានលំនៅក្នុងភូមិឃុំកើតហេតុខាងលើ។
តាមសម្តីបុរសជាប្តីស្ត្រីរងគ្រោះ បានរៀបរាប់ប្រាប់ថា នៅមុនពេលកើតហេតុ មេឃចាប់ផ្តើមខ្មៅងងឹត និងមានភ្លៀងរលឹមស្រិចៗផង ភ្លាមនោះប្រពន្ធរបស់គាត់បានដើរចេញពីផ្ទះ ទៅដងទឹកអណ្តូងនៅខាងមុខផ្ទះ ស្រាប់តែភ្លាមនោះមានផ្លេកបន្ទោរឆ្វាចឡើង លាយមកជាមួយ នឹងសម្លេងរន្ទះបាញ់លាន់ឮកក្រើក លុះពេលគាត់ក្រឡេកទៅមើលប្រពន្ធ ស្រាប់តែឃើញដេកដួលលើដីក្បែរមាត់អណ្តូង ធ្វើឱ្យគាត់ភ័យស្លន់ស្លោ ស្រែកហៅអ្នកភូមិជួយ និងនាំគ្នាស្ទុះទៅមើល ទើបដឹងថា ប្រពន្ធរបស់គាត់ត្រូវបានរន្ទះបាញ់ចំបណ្តាលឱ្យស្លាប់យ៉ាងអាណោចអាធ័មបាត់ទៅហើយ។
ក្រោយកើតហេតុ សមត្ថកិច្ចជំនាញបានចុះពិនិត្យ និងធ្វើកោសល្យវិច័យ រួចបញ្ជាក់ថា ស្ត្រីរងគ្រោះពិតជាស្លាប់ដោយសាររន្ទះបាញ់ប្រាកដមែន។
សាកសពស្ត្រីរងគ្រោះ ត្រូវបានសមត្ថកិច្ចប្រគល់ទៅឱ្យក្រុមគ្រួសារ ដើម្បីរៀបចំធ្វើបុណ្យតាមប្រពៃណី៕