ភ្នំពេញ ៖ បុរសម្នាក់បើករថយន្តដឹកទឹកបរិសុទ្ធឆ្លងផ្លូវ ស្រាប់តែមានរ៉ឺម៉កម៉ូតូ១គ្រឿង បើកឆាបពីខាងមុខ ធ្វើឱ្យអ្នកបើករថយន្តខឹង ក៏ហៅឈប់និយាយគ្នា រហូតទាស់សម្តីគ្នា ធ្វើឱ្យអ្នកជិះរ៉ឺម៉កម៉ូតូផ្ទុះកំហឹងវាយ បណ្តាលឱ្យប៉ោងមុខ។ ហេតុការណ៍នេះបានកើតឡើងកាលពីវេលាម៉ោង៦និង៣៥នាទីយប់ ថ្ងៃទី៣០ ខែមករា ឆ្នាំ២០១៨ ស្ថិតនៅចំណុចមុខផ្ទះសំណាក់ហុង លីហេង ភូមិត្រពាំងពោធិ៍ សង្កាត់ចោមចៅ៣ ខណ្ឌពោធិ៍សែនជ័យ។
ជនរងគ្រោះត្រូវគូទំនាស់វាយបណ្តាលឱ្យរងរបួសហើមមុខនេះ មានឈ្មោះឌួង ចាន់ឌឿន ភេទប្រុស អាយុ៣០ឆ្នាំ មុខរបរបើករថយន្តលក់ទឹកបរិសុទ្ធ ស្នាក់នៅផ្ទះជួលភូមិកើតហេតុខាងលើ មានស្រុកកំណើតនៅភូមិត្នោត ឃុំទួលសាលា ស្រុកបរសេដ្ឋ ខេត្តកំពង់ស្ពឺ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនកើតហេតុ គេឃើញបុរសម្នាក់ (ជនរងគ្រោះ) បើករថយន្តមួយគ្រឿងម៉ាកហ៊ីយ៉ាន់ដាយ ពណ៌សំបកឪឡឹក ដឹកទឹកបរិសុទ្ធ បើកបរក្នុងទិសដៅពីកើតទៅលិច លុះមកដល់ចំណុចកើតហេតុខាងលើ ទើបនឹងបត់ឆ្លងផ្លូវចូលផ្ទះ ស្រាប់តែមានបុរស២នាក់ បើករ៉ឺម៉កម៉ូតូមួយគ្រឿង ក្នុងទិសដៅជើងទៅត្បូង បានបើកឆាបពីមុខរថយន្ត ធ្វើឱ្យទាស់ពាក្យសម្តីគ្នា ឈានដល់ការវាយតប់គ្នា បណ្តាលឱ្យអ្នកបើករថយន្តរងរបួសហើមមុខ និងភ្នែកខាងឆ្វេង។
បន្ទាប់មកជនបង្ក និងជនរងគ្រោះបានជជែកគ្នាបន្តិច ទើបជនបង្កបើករ៉ឺម៉កម៉ូតូចេញទៅបាត់បន្សល់ទុកជនរងគ្រោះនៅកន្លែងកើតហេតុ និងកើតទុក្ខមិនសុខចិត្ត ក៏ធ្វើដំណើរទៅ ដាក់ពាក្យបណ្តឹងនៅប៉ុស្តិ៍នគរបាលចោមចៅ៣ ជួយអន្តរាគមន៍។
អ្នកឃើញហេតុការណ៍នាំគ្នាហួសចិត្តគ្រប់គ្នា ព្រោះតែរឿងបើកបរសោះ ទាំងមិនបានប៉ះពារគ្នាផង មិនគួរណាក្លាយជាករណីហិង្សា វាយតប់គ្នា ប៉ោងមុខ ហើមជាំបែបនេះសោះ។
ករណីនេះ មកពីជនរងគ្រោះជាអ្នកផ្តើមឡើងមុន ដោយគ្រាន់តែគេបើករ៉ឺម៉កកាត់ពីមុខសោះ ធ្វើឱ្យខឹងច្រឡោតហៅគេឈប់ រហូតទាស់ពាក្យសម្តីគ្នា ឈានដល់កើតហិង្សាហើយត្រូវភាគីរ៉ឺម៉កវាយប៉ោងមុខបែបនេះតែម្តង៕
