ខេត្ដកំពង់ចាម៖ នៅវេលាម៉ោង០៩ និង៤០នាទីយប់ថ្ងៃទី៨ ខែសីហា ឆ្នាំ២០១៦នេះ ផ្ទះប្រជាពលរដ្ឋចំនួន៤ខ្នង ស្ថិតនៅភូមិព្រៃសង្កែ ឃុំពាមកោះស្នា ស្រុកស្ទឹងត្រង់ ខេត្តកំពង់ចាម ត្រូវបានអគ្គិភ័យលេបត្របាក់បំផ្លាញទាំងស្រុង ។
បើតាមលោកឧត្តមសេនីយ៍ បែន រ័ត្ន ស្នងការនគរបាលខេត្តកំពង់ចាម បានឲ្យដឹងថា ក្រោយកើតហេតុរថយន្តពន្លត់អគ្គិភ័យរបស់អធិការស្រុក មួយគ្រឿង បានចេញទៅជួយអន្តរាគមន៍ សហការជាមួយរដ្ឋអំណាចមូលដ្ឋាន និងប្រជាពលរដ្ឋ រហូតគ្រប់គ្រងស្ថានការបានទាំងស្រុង នៅវេលាម៉ោង ប្រមាណ១០:៣០នាទី យប់ថ្ងៃដដែលនេះ។
គ្រោះអគ្គិភ័យខាងលើនេះ បានបំផ្លាញផ្ទះទាំង៤ខ្នង ខ្ទេចទាំងស្រុង និងទ្រព្យសម្បត្តិមួយចំនួនរបស់ប្រជាពលរដ្ឋ ដែលយកចេញមិនទាន់ ក៏ត្រូវព្រះអគ្គីឆាបឆេះក្លាយជាផេសផង់ តែមិនបណ្ដាលឲ្យមនុស្សណាម្នាក់រងគ្រោះឡើយ ។ ចំណែកមូលហេតុ ដែលបណ្ដាលឲ្យមានអគ្គិភ័យនេះ ក៏មិនទាន់ដឹងច្បាស់នៅឡើយដែរ ៕
សុភ័ណ្ឌ