ខេត្តកណ្តាល ៖ បុរសចិត្តកំណាចម្នាក់ ព្រោះតែកើតមានចិត្តប្រចណ្ឌស្រីស្នេហ៍ខ្លាំងពេក ក៏រករឿងឈ្លោះប្រកែក ប្រើអំពើហិង្សា ចាប់បោចសក់វ៉ៃដំស្រីស្នេហ៍បណ្តាលឱ្យហើមប៉ោងមុខ លុះសមត្ថកិច្ចចុះមកអន្តរាគមន៍ ស្រាប់តែមានអ្នកខលចូលទូរស័ព្ទជនសង្ស័យរកទិញថ្នាំញៀន ទើបធ្វើឱ្យបែកធ្លាយរឿងរ៉ាវដឹងថា ជនសង្ស័យរូបនេះ ជាមុខសញ្ញាជួញដូរគ្រឿងញៀន ក៏ត្រូវសមត្ថកិច្ចចាប់ឃាត់ខ្លួនតែម្តង។
ហេតុការណ៍ហិង្សាវ៉ៃស្រីស្នេហ៍ បែរជាបែកធ្លាយរឿងជួញដូរគ្រឿងញៀននេះ បានកើតមានការភ្ញាក់ផ្អើលឡើង កាលពីវេលាយប់ ថ្ងៃទី១១ ខែកុម្ភៈ ឆ្នាំ២០១៨ នៅចំណុចភូមិព្រៃបាំង ឃុំស៊ីធរ ស្រុកខ្សាច់កណ្តាល។
ជនដៃដល់ដែលប្រើហិង្សាវាយដំស្រីស្នេហ៍បណ្តាលឱ្យប៉ោងមុខ មានឈ្មោះសឺម សើ អាយុ២៤ឆ្នាំ មានលំនៅក្នុងភូមិឃុំកើតហេតុខាងលើ។ ចំណែកស្ត្រីរងគ្រោះជាស្រីស្នេហ៍ មានឈ្មោះសេង សំអាង អាយុ៣៣ឆ្នាំ មានលំនៅក្នុងភូមិទួលពង្រ ឃុំស៊ីធរ ស្រុកខ្សាច់កណ្តាល ប៉ុន្តែសព្វថ្ងៃបានមកស្នាក់នៅរកស៊ីជាមួយប្រុសកំណាន់ចិត្តនៅភូមិកើតហេតុខាងលើ។
តាមសម្តីនារីរងគ្រោះជាស្រីស្នេហ៍ បានរៀបរាប់ប្រាប់ថា រវាងនាង និងជនសង្ស័យត្រូវជាគូស្នេហ៍នឹងគ្នា តែរួមរស់ដូចប្តីប្រពន្ធ ដោយមិនបានរៀបការ ឬសែនព្រេនអ្វីទាំងអស់ ហើយនាងបានចេញមករួមរស់នឹងប្រុសស្នេហ៍ហេងស៊យនេះ បានមួយរយៈមកហើយ។ តាំងពីរស់នៅជុំគ្នាមក នាងទទួលរងទឹកភ្នែកមិនឈប់ ព្រោះតែត្រូវប្រុសស្នេហ៍ធ្វើបាបទាំងផ្លូវចិត្តផ្លូវកាយ ពោលគឺមិនដែលស្គាល់សេចក្តីសុខនោះទេ។
នារីរងគ្រោះបន្តថា នៅមុនពេលកើតហេតុ ជនសង្ស័យបានដើរបាត់ពីផ្ទះ លុះនាងខឹងក៏បានទូរស័ព្ទទៅប្រាប់ជនសង្ស័យឱ្យយកទូរស័ព្ទមកឱ្យនាង រួចហើយទៅណាក៏ទៅៗ។ លុះមួយសន្ទុះក្រោយមក ជនសង្ស័យក៏មកដល់ និងបានរករឿងឈ្លោះប្រកែកជាមួយនាងរហូតដល់ផ្ទុះ កំហឹងខ្លាំង ក៏ស្ទុះមកចាប់បោចសក់ច្របាច់ក វ៉ៃដំនាងទាំងកំរោល បណ្តាលឱ្យប៉ោងមុខមាត់តែម្តង។
ក្រោយកើតហេតុ ដោយសារតែទ្រាំនឹងការធ្វើទារុណកម្ម វាយដំពីសំណាក់ប្រុសស្នេហ៍ហេងស៊យនេះលែងបាន ទើបនារីរងគ្រោះ បានសម្រេចចិត្ត ប្តឹងរាយការណ៍ប្រាប់សមត្ថកិច្ចប៉ុស្តិ៍ស៊ីធរ ដើម្បីឱ្យជួយអន្តរាគមន៍ និងឈានដល់ការឃាត់ខ្លួនជនសង្ស័យតែម្តង។
សមត្ថកិច្ចប៉ុស្តិ៍ស៊ីធរ បានបញ្ជាក់ប្រាប់ថា បន្ទាប់ពីទទួលបានសេចក្តីរាយការណ៍ពីនារីរងគ្រោះរួចមក សមត្ថកិច្ចបានចុះទៅដល់ទីតាំងកើតហេតុ និងបានឃាត់ខ្លួនជនសង្ស័យបំណងនាំយកមកសាកសួរ លុះពេលកំពុងឃាត់ខ្លួនជនសង្ស័យ ក៏ស្រាប់តែមានអ្នកប្រើប្រាស់ថ្នាំញៀន ២នាក់ បានទូរស័ព្ទមករកទិញថ្នាំញៀនពីជនសង្ស័យ ព្រមទាំងបានប្រាប់ថា ពួកគេធ្លាប់ទិញថ្នាំញៀនពីជនសង្ស័យឈ្មោះសឺម សើ នេះចំនួន ១៥លើកមកហើយ។
ជនសង្ស័យខាងលើ ត្រូវបានសមត្ថកិច្ចចាប់ឃាត់ខ្លួនបញ្ជូនទៅកាន់អធិការដ្ឋានស្រុកខ្សាច់កណ្តាល ដើម្បីចាត់ការបន្តតាមនីតិវិធី៕