អ្នកបើកតាក់ស៊ីម៉ែត្រក្រហម ត្រូវចោរកាប់ប្លន់យករថយន្ត

ភ្នំពេញ ៖ បុរសជាអ្នកបើករថយន្តតាក់ស៊ីម៉ែត្រក្រហមម្នាក់ ត្រូវជនសង្ស័យម្នាក់ប្រើល្បិចហៅឱ្យដឹកទៅរង់ចាំទទួល ប្រពន្ធចេញពីធ្វើការ តែបែរជាធ្វើសកម្មភាពរឹតក និងកាប់បណ្តាលឱ្យរងរបួសធ្ងន់ រួចច្រានទម្លាក់ពីលើរថយន្ត ដើម្បីប្លន់យករថយន្ត ដោយព្យាយាមបើករត់ គេចខ្លួន លុះពេលដឹងថារថយន្តតាក់ស៊ី មានភ្ជាប់ប្រព័ន្ធជីភីអេស និងមានអ្នកប្រដេញតាមពីក្រោយ ក៏បើករថយន្តទៅប្លុងចោល ហើយរត់គេចខ្លួនបាត់ស្រមោល។

ករណីរឹតក និងកាប់ប្លន់អ្នកបើករថយន្តតាក់ស៊ីម៉ែត្រយ៉ាងសាហាវឃោរឃៅខាងលើនេះ បានកើតមានការភ្ញាក់ផ្អើលឡើង កាលពីវេលាម៉ោង១១និង៣០នាទីយប់ ថ្ងៃទី១៧ ខែកុម្ភៈ ឆ្នាំ២០១៨ នៅតាមបណ្តោយផ្លូវបេតុង កែងផ្លូវរថភ្លើង ស្ថិតក្នុងភូមិក្រោលគោ សង្កាត់គីឡូម៉ែត្រលេខ៦ ខណ្ឌឬស្សីកែវ។

បុរសរងគ្រោះ ដែលត្រូវជនសង្ស័យកាប់បណ្តាលឱ្យរងរបួសធ្ងន់ មានឈ្មោះញាញ់ សុខគា អាយុ២១ឆ្នាំ មុខរបរបើកតាក់ស៊ីម៉ែត្រ ក្រហម ស្នាក់នៅផ្ទះជួល ភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ និងមានស្រុកកំណើតនៅភូមិទួលទទឹង ឃុំទួលទទឹង ស្រុក ព្រៃនប់ ខេត្តព្រះសីហនុ។ ចំណែករថយន្តដែលជនសង្ស័យប្លន់យកទៅម៉ាកកាមរីបាឡែន ពណ៌ក្រហម ជារថយន្តតាក់ស៊ីម៉ែត្រ ពាក់ស្លាកលេខ ភ្នំពេញ 2AF-6237។

តាមប្រភពព័ត៌មានពីបងប្រុសរបស់ជនរងគ្រោះ បានរៀបរាប់ប្រាប់ថា នៅមុនកើតហេតុ នៅវេលាម៉ោង១០យប់ រូបគាត់បានទូរស័ព្ទទំនាក់ទំនងជាមួយប្អូនប្រុស (ជនរងគ្រោះ) ហើយបានទូរស័ព្ទហៅប្អូនឱ្យមកដឹកម៉ូយម្នាក់នៅម្តុំផ្សាររាត្រី តែប្អូនបានប្រាប់មកវិញថា ជាប់រវល់ដឹកម៉ូយយកទៅឬស្សីកែវ ស្រាប់តែមួយសន្ទុះក្រោយមក ប្អូនប្រុសរបស់គាត់បានទូរស័ព្ទមកប្រាប់វិញថា ជនសង្ស័យបានឱ្យនៅរង់ចាំយកប្រពន្ធរបស់គេ (ជនសង្ស័យ) ទៀត។ លុះដល់ម៉ោងជាង១១យប់ គាត់បានទូរស័ព្ទទៅប្អូនប្រុសទៀត តែអត់មានអ្នកលើក ទើបមានភ្ញាក់ផ្អើលតែម្តង។

តាមប្រភពព័ត៌មានពីប្រជាពលរដ្ឋនៅកន្លែងកើតហេតុ បានប្រាប់ឱ្យដឹងថា នៅមុនពេលកើតហេតុ គេឃើញរថយន្ត១គ្រឿង ឈប់នៅកន្លែងកើតហេតុ អស់រយៈពេលជាង១ម៉ោង ដោយជនរងគ្រោះ ត្រូវជនសង្ស័យប្រើល្បិចឱ្យឈប់រថយន្តចាំប្រពន្ធរបស់គេ (ជនសង្ស័យ) ដែលនេះជាគំរោងរៀបទុកជាមុន លុះពេលឃើញឱកាសល្អ ជនសង្ស័យក៏បានយកខ្សែហ្វ្រាំងម៉ូតូ រឹតកជនរងគ្រោះ ផ្ទប់ជាប់ជាមួយកៅអីរថយន្ត ធ្វើឱ្យជនរងគ្រោះមានការរើបំរាស់រហូតចេញក្រៅរថយន្ត និងកើតជាការប្រតាយប្រតប់គ្នា ហើយត្រូវជនសង្ស័យដកកាំបិតប៉័ងតោ ដែលបានលាក់ទុកជាប់នឹងខ្លួន កាប់ប្រហារទៅលើជនរងគ្រោះ ជាច្រើនកាំបិតត្រូវចំក្បាល និងដៃ បណ្តាលឱ្យជនរងគ្រោះប្រកាច់នៅក្នុងថ្លុកឈាម ចំណែកជនសង្ស័យមានឱកាស បានឡើងបើករថយន្តគេចខ្លួនបាត់ស្រមោលតែម្តង។

ប្រភពដដែលបន្តថា ភ្លាមៗនោះ ប្រជាពលរដ្ឋដែលឃើញហេតុការណ៍ បានទំនាក់ទំនងទៅសមត្ថកិច្ច ឱ្យចុះមកកន្លែងកើតហេតុ ហើយសមត្ថកិច្ចបានចុះមកដល់ ហៅរថយន្តសង្គ្រោះបន្ទាន់របស់គ្លីនីកពន្លឺ ដឹកយកជនរងគ្រោះទៅសង្គ្រោះភ្លាមៗ និងបោះដៃតាមវិទ្យុទាក់ទងឱ្យ សមត្ថកិច្ចគ្រប់ខណ្ឌ ចេញជួយអន្តរាគមន៍ផង។ ភ្លាមៗនោះកម្លាំងសមត្ថកិច្ចខណ្ឌដូនពេញ បានចេញអន្តរាគមន៍ និងល្បាតក៏បានប្រទះឃើញរថយន្តរបស់ជនរងគ្រោះ ត្រូវបានជនសង្ស័យបើកយកទៅប្លុងចោល នៅម្តុំផ្លូវលេខ៦១ សង្កាត់ផ្សារថ្មីទី១ ខណ្ឌដូនពេញ ចំណែកជនសង្ស័យ បានរត់គេចខ្លួនបាត់ ក្រោយពីដឹងថារថយន្តនោះមានភ្ជាប់ប្រព័ន្ធជីភីអេស និងមានប្រព័ន្ធវិទ្យុទាក់ទងរបស់ក្រុមតាក់ស៊ីបំពាក់នៅក្នុងរថយន្ត ស្រែកប្រកូកប្រកាសផ្តល់ព័ត៌មានឱ្យគ្នាជួយចេញតាមស្ទាក់ផង ទើបជនសង្ស័យដឹងខ្លួនថារត់មិនរួច ក៏ប្លុងរថយន្តចោល ហើយគេចខ្លួនតែម្តង។

ក្រោយពេលកើតហេតុ សមត្ថកិច្ចខណ្ឌដូនពេញបានទាក់ទងទៅខណ្ឌឬស្សីកែវ ឱ្យមកយករថយន្តទៅរក្សាទុក និងធ្វើកំណត់ហេតុ ដាក់ពាក្យបណ្តឹង ដើម្បីឱ្យសមត្ថកិច្ចស្រាវជ្រាវកំណត់មុខសញ្ញាឈានដល់ការចាប់ខ្លួនមកដាក់ទោសទៅតាមច្បាប់៕