កូនស្រី៣ឆ្នាំ ដើរឆ្លងផ្លូវឡានបុកស្លាប់ ម្តាយយំបោកខ្លួន

ពោធិ៍សាត់ ៖ ក្មេងស្រីតូចម្នាក់ ទើបនឹងចេញពីសាលារៀន ក៏ដើរឆ្លងផ្លូវបំណងត្រឡប់ទៅផ្ទះវិញ ស្រាប់តែអកុសល ត្រូវរថយន្តមួយគ្រឿង បើកក្នុងល្បឿនលឿនដូចហោះ បោះពួយមកបុកក្មេងស្រីរងគ្រោះយ៉ាងពេញទំហឹង បណ្តាលឱ្យប៉ើងខ្ទាតបោកទៅនឹងផ្លូវ រងរបួសធ្ងន់ និងដាច់ខ្យល់ស្លាប់ក្រោយពេលបញ្ជូនទៅដល់មន្ទីរពេទ្យ ធ្វើឱ្យស្ត្រីជាម្តាយស្រែកទ្រហោយំសោកបោកខ្លួន ព្រោះតែស្តាយស្រណោះជីវិតកូនស្រី។

ហេតុការណ៍រថយន្តបើកបុកក្មេងស្រីដើរឆ្លងផ្លូវចេញពីសាលារៀនបណ្តាលឱ្យស្លាប់យ៉ាងអាណោចអាធ័មនេះ បានកើតឡើងកាលពីវេលាម៉ោង១០ និង៤៥នាទីព្រឹក ថ្ងៃទី១៩ ខែមីនា ឆ្នាំ២០១៨ នៅចំណុចភូមិអង្ក្រង ឃុំសំរោង ស្រុកភ្នំក្រវាញ។

ក្មេងស្រីរងគ្រោះដែលត្រូវរថយន្តបុកស្លាប់ មានឈ្មោះញ៉ាន ទិតកក្កដា អាយុ៣ឆ្នាំ មុខរបរសិស្សសាលាមត្តេយ្យ មានលំនៅក្នុងភូមិឃុំ កើតហេតុខាងលើ។ ចំណែករថយន្តបង្ក ម៉ាកកាមរីចង្កូតស្តាំ ពណ៌ស្លែចាស់ ពាក់ស្លាកលេខ បាត់ដំបង 2A-1778 បើកបរដោយបុរសមិនស្គាល់អត្តសញ្ញាណ ក្រោយកើតហេតុ បានរត់គេចខ្លួនបាត់ស្រមោល។

តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញក្មេងស្រីរងគ្រោះ ទើបនឹងចេញពីសាលារៀន ដើរសំដៅត្រឡប់មកផ្ទះវិញ ដោយដើរតាមបណ្តោយចិញ្ចើមផ្លូវក្នុងទិសដៅពីលិចទៅកើត លុះពេលដើរទៅមុខបានប្រមាណ៤៥ម៉ែត្រ ក្មេងស្រីរងគ្រោះក៏បានដើរឆ្លងផ្លូវទៅខាងស្តាំដៃ ស្រាប់តែភ្លាមនោះ មានរថយន្តមួយគ្រឿងម៉ាកកាមរី ចង្កូតស្តាំខាងលើ បើកបរក្នុងល្បឿនយ៉ាងលឿន បោះពួយក្នុងទិសដៅពីកើតទៅលិច រួចក៏ជ្រុលចង្កូតមកបុកក្មេងស្រីរងគ្រោះយ៉ាងពេញទំហឹង បណ្តាលឱ្យក្មេងស្រីប៉ើងខ្ទាតបោកទៅនឹងថ្នល់ រងរបួសធ្ងន់។

ចំណែកអ្នកបើកបររថយន្ត បានចុះរត់គេចខ្លួនបាត់ស្រមោលភ្លាមៗដែរ។
ក្រោយកើតហេតុ ក្មេងស្រីរងគ្រោះត្រូវបានដឹកបញ្ជូនទៅកាន់មន្ទីរពេទ្យដើម្បីសង្គ្រោះជីវិតភ្លាមៗដែរ តែអកុសលដោយសារតែស្ថានភាពរបួសធ្ងន់ធ្ងរពេក ទើបក្មេងស្រីរងគ្រោះបានដាច់ខ្យល់ស្លាប់យ៉ាងអាណោចអាធ័ម ធ្វើឱ្យស្ត្រីជាម្តាយ បានមកស្រែកទ្រហោយំសោកបោកខ្លួន ស្តាយជីវិតកូនស្រី។

បន្ទាប់ពីធ្វើការវាស់វែងនៅកន្លែងកើតហេតុរួចរាល់ សមត្ថកិច្ចបានអូសយករថយន្តបង្កទៅរក្សាទុកនៅអធិការដ្ឋាននគរបាលស្រុកភ្នំក្រវាញ ដើម្បីរង់ចាំធ្វើការដោះស្រាយតាមនីតិវិធី។

ចំណែកសាកសពក្មេងស្រីរងគ្រោះ ត្រូវបានសមត្ថកិច្ចប្រគល់ទៅឱ្យក្រុមគ្រួសារ ដើម្បីរៀបចំធ្វើបុណ្យតាមប្រពៃណី៕