ខេត្តកណ្តាល ៖ បុរសម្នាក់បានតចរន្តអគ្គិសនីចេញពីផ្ទះ ដើម្បីឆក់ត្រីនៅរានទេវតាខាងមុខផ្ទះ ស្រាប់តែអកុសល ឆ្លងចរន្តបណ្តាលឱ្យឆក់ ខ្លួនឯងស្លាប់យ៉ាងអាណោចអាធ័ម កាលពីវេលារសៀលថ្ងៃទី២២ ខែមីនា ឆ្នាំ២០១៨ នៅចំណុចខាងមុខផ្ទះរបស់ជនរងគ្រោះ ស្ថិតក្នុងភូមិថ្មស ឃុំភ្នំបាត ស្រុកពញាឮ។
បុរសរងគ្រោះដែលត្រូវចរន្តអគ្គិសនីឆក់ស្លាប់ មានឈ្មោះជិន ឌិច អាយុ២៨ឆ្នាំ មុខរបរកសិករ មានលំនៅក្នុងភូមិឃុំកើតហេតុខាងលើ។
តាមប្រភពពីកន្លែងកើតហេតុ បានឱ្យដឹងថា នៅថ្ងៃកើតហេតុ នៅខាងមុខផ្ទះរបស់ជនរងគ្រោះមានដក់ទឹក នៅរានទេវតា ដោយមានទាំងត្រីនៅក្នុងនោះទៀតផង។ បន្ទាប់មក ជនរងគ្រោះចង់ចាប់យកត្រីនោះ មកធ្វើម្ហូប តែដោយមិនដឹងធ្វើយ៉ាងម៉េចបាន ក៏បែកគំនិតរាយខ្សែ ភ្លើងចេញពីផ្ទះ ដើម្បីយកទៅឆក់ត្រីនោះ ស្រាប់តែអកុសល នៅពេលដែលជនរងគ្រោះកំពុងតែឆក់ត្រីសុខ ស្រាប់តែឆ្លងចរន្តអគ្គិសនី បណ្តាលឱ្យឆក់ជនរងគ្រោះដួលក្នុងទឹកស្លាប់ភ្លាមៗដោយគ្មានអ្នកណាអាចជួយសង្គ្រោះទាន់។
ក្រោយកើតហេតុ នៅពេលប្រទះឃើញជនរងគ្រោះដេកដួលក្នុងទឹកបែបនេះ ក្រុមគ្រួសារក៏ប្រញាប់រត់ទៅដកឌុយភ្លើងចេញ និងជួយធ្វើចលនាសង្គ្រោះបឋមដែរ តែអកុសលជនរងគ្រោះ បានដាច់ខ្យល់ស្លាប់បាត់ទៅហើយ ទើបរាយការណ៍សុំអន្តរាគមន៍ពីសមត្ថកិច្ច។
បន្ទាប់ពីទទួលបានសេចក្តីរាយការណ៍ខាងលើ សមត្ថកិច្ចបានចុះមកពិនិត្យ និងធ្វើកោសល្យវិច័យសព រួចបញ្ជាក់ថា ជនរងគ្រោះពិត ចាស្លាប់ដោយសារតែឆក់ត្រីភ្លាត់ស្នៀត បណ្តាលឱ្យឆក់ខ្លួនឯងស្លាប់ប្រាកដមែន។
សាកសពជនរងគ្រោះត្រូវបានសមត្ថកិច្ច ប្រគល់ទៅឱ្យក្រុមគ្រួសារ ដើម្បីរៀបចំធ្វើបុណ្យតាមប្រពៃណី៕