ភ្នំពេញ ៖ ជនសង្ស័យមួយក្រុម បានធ្វើសកម្មភាពបើករថយន្តកូរ៉េ១គ្រឿង ចូលទៅលួចយកឥដ្ឋ និងស៊ីម៉ង់ត៍នៅក្នុងវត្តភ្នៀតសម្ពលី ប៉ុន្តែក្រោយពេលលួចបាន បើករថយន្តចេញមកវិញ ស្រាប់តែជាប់ផុងទៅមុខមិនរួច បន្ទាប់មកគេចខ្លួនបាត់អស់ ក្រោយមកសមត្ថកិច្ចបានឃាត់ ខ្លួនបុរសម្នាក់ ដែលសង្ស័យថាជាបក្សពួកចោររួច នាំយកទៅសាកសួរ និងថែមទាំងបានរកឃើញថ្នាំញៀននៅជាប់ខ្លួន១កញ្ចប់ទៀតផង។
ករណីជនសង្ស័យបើករថយន្តចូលលួចគ្រឿងសំណង់ក្នុងវត្តនេះ បានកើតឡើងកាលពីវេលារំលងអធ្រាត្រ ឈានចូលថ្ងៃទី២៣ ខែមីនា ឆ្នាំ២០១៨ នៅចំណូចក្នុងវត្តភ្នៀតសម្ពលី ស្ថិតក្នុងភូមិស្រែអំពិល សង្កាត់ស្នោរ ខណ្ឌពោធិ៍សែនសែនជ័យ។
ជនសង្ស័យម្នាក់ ដែលត្រូវសមត្ថកិច្ចចាប់ឃាត់ខ្លួន មានឈ្មោះជួប ផល្លា អាយុ២៨ឆ្នាំ មានលំនៅក្នុងភូមិប្រយុទ្ធ ឃុំបាសែត ស្រុកប៉ាលហាល ខេត្តព្រះវិហារ។ គេមិនទាន់ដឹងថា ជននេះមានការពាក់ព័ន្ធទៅនិងបទល្មើសចោរកម្មខាងលើ ឬអត់នៅឡើយ។ ដោយឡែក ក្រុមចោរក៏មិនទាន់ដឹងថា មានគ្នាប៉ុន្មាននាក់នៅឡើយ រីឯរថយន្តដែលពួកចោរបើកយកទៅធ្វើសកម្មភាពនោះ ម៉ាកហ៊ីយ៉ាន់ដាយ ពណ៌ស ចំណុះ ២តោន ពាក់ស្លាកលេខ ទ-០២៣១ ភព៣។
តាមប្រភពពីកន្លែងកើតហេតុ បានឱ្យដឹងថា ជនសង្ស័យបានបើករថយន្តកូរ៉េ ចូលទៅលួចឥដ្ឋពីការដ្ឋានសំណង់ចេតីយ៍នៅក្នុងវត្តខាងលើ ដែលតាមការសន្និដ្ឋាន ពេលចូលទៅមេឃមិនទាន់ភ្លៀងទេ។ លុះពេលពួកចោរលើកឥដ្ឋ និងស៊ីម៉ង់ត៍ដាក់ក្នុងរថយន្ត រួចមេឃបានចាប់ផ្តើម ធ្លាក់ភ្លៀង លុះពេលបើកចេញមកវិញប្រុងគេចខ្លួន ដោយសារផ្លូវទើបចាក់ដីថ្មី បណ្តាលឱ្យជាប់ផុងទៅមុខលែងរួចទើបបែកការណ៍តែម្តង។
ប្រភពដដែលបន្តថា នៅលើរថយន្តនោះមានឥដ្ឋប្រមាណ៧០០០ដុំ និងស៊ីម៉ង់ត៍ជិត២តោន ក្រោយពីប្រជាពលរដ្ឋប្រទះឃើញហើយ រាយការណ៍ជូនកម្លាំងនគរបាលប៉ុស្តិ៍ស្នោរ បានចុះទៅកាន់កន្លែងកើតហេតុ។ ពេលនោះបានឃាត់ខ្លួនបុរសម្នាក់ ដែលជនសង្ស័យថាជាបក្សពួកចោរ ប៉ុន្តែក្រោយសាកសួរជននេះបានបដិសេធរហូត ហើយនៅជាប់ខ្លួនជននេះមានថ្នាំញៀន១កញ្ចប់ ពេលនេះនគរបាលប៉ុស្តិ៍បានកសាងសំណុំរឿងបញ្ជូនជននេះទៅសួរនាំបន្ត នៅផ្នែកនគរបាលព្រហ្មទណ្ឌខណ្ឌពោធិ៍សែនជ័យ៕