ស្គាល់គ្នា១ថ្ងៃ ហៅមកលេងបន្ទប់ជួល រួចអូនខ្ចីម៉ូតូទៅទិញម្ហូប ស៊ីដាច់ម៉ូតូបងបាត់

ភ្នំពេញ ៖ យុវជនម្នាក់ ត្រូវស្រីក្មេងដែលទើបនឹងស្គាល់គ្នាមិនទាន់បាន១ថ្ងៃស្រួលបួលផង ណាត់ឱ្យទៅលេងដល់បន្ទប់របស់នាង នឹកថា ខាងស្រីស្រលាញ់ពេញចិត្តខ្លួន ហើយអាចឈានដល់ផ្អែមមាត់ផ្អែមកផង ក៏ខំស្កាត់ទៅជួបស្រី ចោលទាំងការងារ ដឹងអី ទៅដល់បន្ទប់ជួល ក៏ត្រូវស្រីក្មេងជើងល្អ សុំខ្ចីម៉ូតូទៅទិញបាយមួយភ្លែត ស្រាប់តែទៅបាត់រហូត មិនឃើញត្រឡប់មកវិញសោះ ទីបំផុត ទើបភ្ញាក់ខ្លួនដឹងថាស្រីបោក ក៏រត់ទៅប្តឹងសមត្ថកិច្ចឱ្យជួយអន្តរាគមន៍។

ករណីប្រុសស្ទាវ ចាញ់ល្បិចស្រីក្មេងអស់ម៉ូតូ១គ្រឿងនេះ បានកើតឡើង កាលពីវេលាម៉ោង១ និង៣០នាទីរសៀល ថ្ងៃទី២៤ ខែមីនា ឆ្នាំ២០១៨ នៅចំណុចបន្ទប់ជួលភូមិរោងចក្រ សង្កាត់គោកឃ្លាង ខណ្ឌសែនសុខ។

យុវជនរងគ្រោះមានឈ្មោះមឿន សុធារិ អាយុ១៨ឆ្នាំ មុខរបរជាងជួសជុលរថយន្ត ស្នាក់នៅផ្ទះជួលភូមិត្រពាំងពោធិ សង្កាត់ចោមចៅ៣ ខណ្ឌពោធិ៍សែនជ័យ។ ចំណែកនារីវ័យក្មេងជើងល្អ ជាជនឆបោកយកម៉ូតូ គ្រាន់តែស្គាល់ឈ្មោះអូននិច អាយុ១៨ឆ្នាំ មុខរបរមិនពិតប្រាកដ ទើបតែជួលបន្ទប់ស្នាក់នៅកន្លែងកើតហេតុខាងលើ បាន១ថ្ងៃប៉ុណ្ណោះ។ ដោយឡែកម៉ូតូដែលចាញ់ល្បិចនារីឆបោក ម៉ាកហុងដាឌ្រីម សេ១១០ ស៊េរី ឆ្នាំ២០១២ ពណ៌ខ្មៅ ពាក់ស្លាកលេខ ភ្នំពេញ 1BF-1668។

តាមសម្តីយុវជនរងគ្រោះ បានឱ្យដឹងថា នៅមុនពេលកើតហេតុ រូបគេទើបនឹងបានស្គាល់នារីខាងលើតាមរយៈមិត្តភក្តិតៗគ្នា មិនស្គាល់សាវតាច្បាស់ផង ស្រាប់តែនៅវេលាម៉ោង១និង៣០នាទីរសៀល ថ្ងៃទី២៤ ខែមីនា ឆ្នាំ២០១៨ ខណៈដែលរូបគេកំពុងធ្វើការងារ នារីខាងលើ ទូរស័ព្ទហៅឱ្យទៅលេងខ្លួន នៅបន្ទប់ជួលកន្លែងកើតហេតុ លុះទៅដល់ហើយ មិនទាន់ទាំងបានអង្គុយផង ត្រូវបាននារីខាងលើខ្ចីម៉ូតូជិះទៅរកទិញបាយម្ហូប មកហូបជុំគ្នា២នាក់។

យុវជនរងគ្រោះបន្តថា ដោយលង់នឹងសម្តីដ៏ផ្អែមរបស់ខាងស្រី ទើបរូបគេបានប្រគល់សោរម៉ូតូទៅឱ្យអូននិច ជិះទៅទិញបាយយកមកហូប២នាក់ ស្រាប់តែខាងស្រីជិះម៉ូតូចេញទៅបាត់រហូត មិនឃើញត្រឡប់មកវិញសោះ លុះពេលដែលរូបគេពិនិត្យមើលនៅក្នុងបន្ទប់ជួល មិនឃើញមានសម្ភារៈអ្វីគួរឱ្យចាប់អារម្មណ៍សោះ លុះសួរអ្នកជិតខាង ទើបដឹងថា នារីជើងល្អរូបនេះ ទើបនឹងមកជួលបន្ទប់ស្នាក់នៅមិនទាន់បានមួយថ្ងៃស្រួលបួលផង ទើបធ្វើឱ្យរូបគេ ភ្ញាក់ខ្លួនថា ច្បាស់ជាចាញ់ល្បិចស្រីក្មេងតែម្តង។ រហូតដល់វេលាម៉ោង៩យប់ ថ្ងៃដដែល នៅមិនឃើញអូននិច វិលវិញ ទើបរូបគេក៏សម្រេចរត់ទៅប្តឹងប៉ូលិស ឱ្យជួយស្រាវជ្រាវរកមុខស្រីក្មេងខាងលើតែម្តង៕