ខេត្តឧត្តរមានជ័យ ៖ ស្ត្រីម្នាក់បានទៅចងការលុយពីអង្គការ ចំនួន១លានរៀល បំណងយកមកទុកជួលត្រាក់ទ័រកាយគល់ឈើ ធ្វើចម្ការ តែមិនទាន់ប្រាប់ប្តីឱ្យដឹងនៅឡើយ ស្រាប់តែបុរសជាប្តីដឹងរឿងមុន ក៏ផ្ទុះកំហឹងរករឿងឈ្លោះប្រកែក វាយដំ ចាប់បោកក្បាលប្រពន្ធផ្ទប់នឹងជញ្ជាំង បណ្តាលឱ្យរងរបួសធ្ងន់។
ករណីអំពើហិង្សាក្នុងគ្រួសារខាងលើនេះ កើតឡើងកាលពីវេលាម៉ោង៧យប់ ថ្ងៃទី២៤ ខែមីនា ឆ្នាំ២០១៨ នៅចំណុចភូមិតាដេវ ឃុំត្រពាំងតាវ ស្រុកអន្លង់វែង។ លុះមកដល់ព្រឹកថ្ងៃទី២៦ ខែមីនា ឆ្នាំ២០១៨ សមត្ថកិច្ចក៏បានចុះឃាត់ខ្លួនជនបង្កហេតុជាប្តីនាំយកមកសាកសួរ។
ជនបង្កហេតុជាប្តី មានឈ្មោះល្ហឿ ថុល អាយុ៣៧ឆ្នាំ មុខរបរកសិករ។ ចំណែកស្ត្រីរងគ្រោះជាប្រពន្ធ មានឈ្មោះរឿន សល់ អាយុ៣៤ឆ្នាំ មុខរបរកសិករ។ ប្តីប្រពន្ធអ្នកទាំងពីរ មានលំនៅក្នុងភូមិឃុំកើតហេតុខាងលើ។
តាមសម្តីស្ត្រីរងគ្រោះជាប្រពន្ធ បានឱ្យដឹងថា នៅមុនពេលកើតហេតុ កាលពីវេលាម៉ោង៧យប់ ថ្ងៃទី២៤ ខែមីនា ឆ្នាំ២០១៨ប្តីប្រពន្ធ របស់នាងបានកើតមានជំលោះពាក្យសម្តីគ្នាយ៉ាងខ្លាំង បន្ទាប់មកបុរសជាប្តីក៏បានវាយដំនាងបណ្តាលឱ្យរងរបួសធ្ងន់តែម្តង។
ស្ត្រីរងគ្រោះបន្តថា មូលហេតុ បណ្តាលមកពីនាងបានទៅខ្ចីលុយពីអង្គការចំនួន១លានរៀល ក្នុងគោលបំណង ទុកជួលត្រាក់ទ័រគេឱ្យកាយគល់ឈើលើដីរបស់នាង ចំនួនកន្លះហិកតារ និងដីរបស់ម្តាយចំនួន១ហិកតារ។ ប៉ុន្តែពេលដែលខ្ចីលុយអង្គការនោះ នាងពុំទាន់បានប្រាប់ប្តីឱ្យដឹងនៅឡើយ ស្រាប់តែមកដល់វេលាម៉ោងកើតហេតុខាងលើ ប្តីបានដឹងរឿងរ៉ាវ ក៏មករករឿងឈ្លោះប្រកែក និងបាននាងត្រូវខ្នង ត្រូវក្បាលជាច្រើនដៃ បន្ទាប់មកក៏បានចាប់ក្បាលរបស់នាងបោកផ្ទប់ទៅនឹងជញ្ជាំង បណ្តាលឱ្យត្រូវថ្ពាសចំហៀងខាងស្តាំហើមជាំខៀវ។
សមត្ថកិច្ចមូលដ្ឋាន បានបញ្ជាក់ថា ករណីនេះដោយពិនិត្យឃើញថា ជនសង្ស័យតែងតែប្រព្រឹត្តហិង្សាជាញឹកញាប់មកលើប្រពន្ធ និងត្រូវបានសមត្ថកិច្ចហៅណែនាំធ្វើកិច្ចសន្យាជាច្រើនលើកមិនរៀងចាល ទើបសមត្ថកិច្ចសំរេចធ្វើការឃាត់ខ្លួនបញ្ជូនទៅតុលាការចាត់ការតាមនីតិវិធី៕