ភ្នំពេញ ៖ រថយន្តដឹកស្រាបៀរអង្គរមួយគ្រឿង បានបើកជ្រុលចង្កូតទៅបុកម៉ូតូ១គ្រឿង ជិះដោយស្ត្រីម្នាក់ បណ្តាលឱ្យស្ត្រីរងគ្រោះ បាក់ជើងរងរបួសធ្ងន់ កាលពីវេលាម៉ោង៣និង១០នាទីរសៀល ថ្ងៃទី១០ ខែមេសា ឆ្នាំ២០១៨ នៅតាមផ្លូវវេងស្រេង នៅក្នុងភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ។
ស្ត្រីរងគ្រោះដែលត្រូវរថយន្តដឹកស្រាបៀរអង្គរ បុកបាក់ជើងនេះ មិនត្រូវបានស្គាល់ពីអត្តសញ្ញាណនោះទេ ពិនិត្យតាមភិនភាគ មានវ័យជាង៣០ឆ្នាំ ជិះម៉ូតូ១គ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ 1FZ-5797។ ចំណែករថយន្តបង្កម៉ាក ហ៊ីយ៉ាន់ដាយ ពណ៌ក្រហម ពាក់ស្លាកលេខ ភ្នំពេញ 3C-4956 ជារថយន្តដឹកស្រាបៀរអង្គរ បើកបរដោយបុរសមិនស្គាល់អត្តសញ្ញាណ ក្រោយកើតហេតុ បានរត់គេចខ្លួនបាត់ស្រមោល។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញរថយន្តបង្ក បានបើកបរតាមបណ្តោយផ្លូវវេងស្រេង ក្នុងទិសដៅពីកើតទៅលិច លុះមកដល់ចំណុចកើតហេតុខាងលើ រថយន្តបង្កបានបើកគេចពីរថយន្តនៅខាងមុខ ធ្វើឱ្យជ្រុលទៅបុកម៉ូតស្ត្រីរងគ្រោះ បណ្តាលឱ្យរបួសធ្ងន់បាក់ជើងតែម្តង។
ក្រោយកើតហេតុ ស្ត្រីរងគ្រោះត្រូវបានរថយន្តសង្គ្រោះបន្ទាន់ ដឹកបញ្ជូនទៅសង្គ្រោះនៅឯមន្ទីរពេទ្យ។ ចំណែករថយន្តដឹកស្រាបៀរអង្គរ ជារថយន្តបង្ក និងម៉ូតូត្រូវបានសមត្ថកិច្ចចុះវាស់វែង រួចអូសយកទៅរក្សាទុកនៅផ្នែកជំនាញអធិការដ្ឋានខណ្ឌ រង់ចាំដោះស្រាយពេលក្រោយ៕
