ខេត្តកំពង់ស្ពឺ ៖ បុរសមានសតិមិនប្រក្រតីម្នាក់ ត្រូវបានគេប្រទះឃើញដេកស្លាប់ទាំងអាក្រាតកាយ នៅលើចិញ្ចើមផ្លូវជាតិ ដោយមានស្នាមរបួសបែកក្បាល បង្កឱ្យមានការភ្ញាក់ផ្អើលឡើងកាលពីវេលាម៉ោង៥និង៣០នាទីទៀបភ្លឺ ថ្ងៃទី១៩ ខែមិថុនា ឆ្នាំ២០១៨ តាមបណ្តោយផ្លូវជាតិលេខ៤ ចន្លោះគីឡូម៉ែត្រ៤០-៤១ ស្ថិតក្នុងភូមិរំលោង ឃុំវល្លិ៍ស ស្រុកសំរោងទង។
សមត្ថកិច្ចបានបញ្ជាក់ថា ជនរងគ្រោះខាងលើមិនបានត្រូវបានស្គាល់អត្តសញ្ញាណនោះទេ ព្រោះទំនងជាអ្នកក្រៅតំបន់ ហើយនៅលើខ្លួនសពមានស្នាមចាក់សាក់ជាច្រើនកន្លែង ។
តាមប្រភពពីប្រជាពលរដ្ឋរស់នៅក្បែរកន្លែងកើតហេតុ បានឱ្យដឹងថា នៅមុនពេលកើតហេតុ ប្រហែល១សប្តាហ៍ គេបានឃើញមនុស្ស១ក្រុមដឹកជនរងគ្រោះតាមរថយន្តមិនស្គាល់ម៉ាក១គ្រឿង មកទម្លាក់ចោលនៅភូមិសាស្ត្រកើតហេតុខាងលើ ហើយក៏ចេញបាត់ទៅ។ ចាប់តាំងពីពេលនោះមក ជនរងគ្រោះក៏ចេះតែដើរនៅតំបន់ខាងលើរើសរបស់របរគេចោលយកមកហូប ហើយដោះសម្លៀកបំពាក់ចោលទៀតផង តែជនរងគ្រោះមិនដែលបង្កការលំបាកដល់អ្នករស់នៅទីនោះឬធ្វើឱ្យគេខ្លាចឡើយ។
ប្រភពដដែលបន្តថា នៅពេលឃើញជនរងគ្រោះចេះតែដើរស្រាតខោអាវននលគកបែបនេះ អ្នកនៅក្បែរនោះក៏ចាប់ស្លៀកពាក់ឱ្យ តែចុងក្រោយគាត់ដោះចោលដដែល ទើបម្នាក់ៗយល់ថា គាត់គឺជាមនុស្សវិកលចរិត ឬបែកថ្នាំ ទើបត្រូវយកមកប្លុងចោលបែបនេះ។ ហើយនៅមុនកើតហេតុ គេឮសំឡេងបុកយ៉ាងខ្លាំង តែមិនស្មានថារថយន្តបុកជនរងគ្រោះនោះទេ រហូតដល់ភ្លឺចេញទៅរកមើល ស្រាប់តែឃើញជនរងគ្រោះ មានស្នាមបុកបែកក្បាលស្លាប់បាត់ទៅហើយ បន្ទាប់មកក៏មានបុរសម្នាក់កាច់ស្លឹកឈើគ្របពីលើ ដើម្បីកុំឱ្យឃើញសាកសពអាក្រាតកាយននលគក បែបនេះ។ យ៉ាងណា មិនមានអ្នកណាម្នាក់បានដឹងថា តើរថយន្តប្រភេទអីដែលបុកជនរងគ្រោះនោះទេ។
ក្រោយកើតហេតុ សមត្ថកិច្ចបានចុះពិនិត្យសព និងធ្វើកំណត់ហេតុ ហើយហៅរថយន្តរបស់មន្ទីរពេទ្យខេត្តដឹកយកទៅបូជានៅវត្តសំបួរ នាក្រុងច្បារមនតែម្តង។ ជាមួយនេះសមត្ថកិច្ចក៏បានអំពាវនាវដល់បងប្អូនប្រជាពលរដ្ឋអ្នកដែលបាត់សមាជិកដែលមានស្នាមសាក់ពេញខ្លួន និងសតិមិនប្រក្រតី សូមទាក់ទងមកសមត្ថកិច្ចនគរបាលខេត្ត ដើម្បីទទួលយកធាតុទៅធ្វើបុណ្យតាមប្រពៃណី៕