ខេត្តតាកែវ ៖ នារីវ័យក្មេងម្នាក់ នៅចាំផ្ទះតែម្នាក់ឯង ខណៈឪពុកម្តាយរវល់ការងារស្រែចម្ការ ស្រាប់តែត្រូវប្រុសព្រានល្មោភកាមម្នាក់ បានធ្វើសកម្មភាពចាប់រំលោភរហូតដល់បានសម្រេច លុះនារីរងគ្រោះយករឿងរ៉ាវប្រាប់ម្តាយឱ្យដឹង ក៏ដាក់ពាក្យបណ្តឹងឱ្យសមត្ថកិច្ចចាប់ខ្លួន ជនល្មោភកាមរូបនោះនាំយកមកចាត់ការតាមច្បាប់។
ករណីប្រុសព្រានរំលោភកូនស្រីគេនេះ បានកើតឡើងកាលពីថ្ងៃទី១១ ខែកក្កដា ឆ្នាំ២០១៨ នៅចំណុចផ្ទះរបស់នារីរងគ្រោះ ស្ថិតក្នុងភូមិចារ ឃុំរវៀង ស្រុកសំរោង។ លុះរឿងរ៉ាវបែកធ្លាយ ក៏ត្រូវសមត្ថកិច្ចចុះឃាត់ខ្លួនជនសង្ស័យបាន កាលពីវេលាម៉ោង៧ព្រឹក ថ្ងៃទី១៣ ខែកក្កដា ឆ្នាំ២០១៨។
ជនសង្ស័យល្មោភកាម ដែលត្រូវសមត្ថកិច្ចចាប់ឃាត់ខ្លួន មានឈ្មោះត្រេន ព្រេង ហៅវី អាយុ៣៣ឆ្នាំ មុខរបរកសិករ មានលំនៅក្នុងភូមិឃុំកើតហេតុខាងលើ។ ចំណែកនារីរងគ្រោះ មានអាយុ១៧ឆ្នាំ មានលំនៅក្នុងភូមិឃុំជាមួយគ្នា។
តាមសម្តីក្មេងនារីរងគ្រោះ បានរៀបរាប់ប្រាប់ថា ជនសង្ស័យមានផ្ទះនៅជិតគ្នានឹងផ្ទះរបស់នាង ហើយជនសង្ស័យបានចាប់នាងរំលោភសេពសន្ថវៈនៅលើផ្ទះ ពេលក្នុងផ្ទះមានសភាពស្ងាត់គ្មានមនុស្សចាស់នៅ ព្រោះឪពុកម្តាយនាងរវល់ចេញទៅធ្វើការងារស្រែចម្ការបាត់ៗ។ ក្រោយពីធ្វើសកម្មភាពបានសម្រេចហើយ ជនសង្ស័យបានគំរាមសម្លាប់នាងចោល ប្រសិនបើនាងហ៊ាននិយាយរឿងនេះប្រាប់ឪពុកម្តាយ។ យ៉ាងណាក្តី ក្រោយពីឪពុកម្តាយត្រឡប់មកផ្ទះវិញ នាងក៏ទម្លាយរឿងរ៉ាវប្រាប់ម្តាយឪពុកគ្មានសល់ និងត្រូវឪពុកម្តាយនាំនាងទៅដាក់ពាក្យបណ្តឹងឱ្យសមត្ថកិច្ច ចុះឃាត់ខ្លួន ជនសង្ស័យនាំយកមកចាត់ការតាមច្បាប់៕