ខេត្តបាត់ដំបង ៖ ជនសង្ស័យម្នាក់ ដែលបានធ្វើសកម្មភាពទាញដំបងវាយទៅលើគូស្នេហ៍វ័យក្មេងមួយគូ ដែលកំពុងអង្គុយសាសងស្នេហ៍កណ្តាលវាលស្រែ បណ្តាលឱ្យយុវជនជាប្រុសស្នេហ៍សន្លប់ស្តូក ចំណែកខាងស្រីសំណាងល្អរត់គេចទាន់ រួចបានប្លន់យកម៉ូតូ ទូរស័ព្ទ កុំព្យូទ័រ កាលពីយប់ថ្ងៃទី២៣ ខែកក្កដា ឆ្នាំ២០១៨ នៅចំណុចបឹងស្នោ ស្ថិតក្នុងភូមិសំរោងតាកុក ឃុំសំរោងក្នុង ស្រុកឯកភ្នំ ត្រូវបានសមត្ថកិច្ចស្រាវជ្រាវ ឃាត់ ខ្លួនបានកាលពីវេលាម៉ោង១២ និង៥០នាទីថ្ងៃត្រង់ ថ្ងៃទី២៥ ខែកក្កដា ឆ្នាំ២០១៨ នៅចំណុចភូមិបាសែត ឃុំតាប៉ុន ស្រុកសង្កែ។
ជនសង្ស័យដែលត្រូវសមត្ថកិច្ចចាប់ខ្លួន មានឈ្មោះស៊ីន ពិសិដ្ឋ អាយុ៣០ឆ្នាំ មានលំនៅភូមិ បាសែត ឃុំតាប៉ុន ស្រុកសង្កែ។ ចំណែកជន រងគ្រោះ ដែលត្រូវជនសង្ស័យសំពងនឹងដំបង បណ្តាលឱ្យសន្លប់ មានឈ្មោះថៃ ធៀង អាយុ២២ឆ្នាំ រស់នៅភូមិសម្តេច ឃុំតាប៉ុន ស្រុកសង្កែ។
តាមប្រភពពីសមត្ថកិច្ច បានឱ្យដឹងថា ដោយអនុវត្តន៍តាមការណែនាំបញ្ជាផ្ទាល់ពី លោកឧត្តមសេនីយ៍ទោ អ៊ុច សុខុន ស្នងការនគរបាល ខេត្តបាត់ដំបង ក៏ដូចជាលោកឧត្តមសេនីយ៍ត្រី ជេត វណ្ណនី ស្នងការរងទទួលបន្ទុកផែនព្រហ្មទណ្ឌ សមត្ថកិច្ចបានស្រាវជ្រាវ ឃាត់ខ្លួនជនសង្ស័យឈ្មោះស៊ីន ពិសិដ្ឋ ដែលបានធ្វើសកម្មភាព (ប្លន់) វាយយកម៉ូតូ កាលពីថ្ងៃទី ២៣ ខែកក្កដា ឆ្នាំ២០១៨ នៅចំណុចភូមិសំរោងតាកុក ឃុំសំរោងក្នុង ស្រុកឯកភ្នំ។
ជាមួយនឹងការចាប់ខ្លួនជនសង្ស័យ សមត្ថកិច្ចបានដកហូតវត្ថុតាងរួមមាន ម៉ូតូ១គ្រឿង ម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៤ ពាក់ស្លាកលេខ បាត់ដំបង 1S-0318 កុំព្យូទ័រឡេបថប ពណ៌ខ្មៅ ១គ្រឿង ទូរស័ព្ទដៃម៉ាក iPhone ១គ្រឿង ទូរស័ព្ទដៃ ម៉ាក camfone ១គ្រឿង និងពូថៅចំនួន១។ ជនសង្ស័យ រួមនឹងវត្ថុតាងត្រូវបានសមត្ថកិច្ចប្រគល់ទៅឱ្យការិយាល័យជំនាញដើម្បីចាត់ការតាមនីតិវិធី។
គួររំលឹកថា កាលពីវេលាម៉ោង៨យប់ ថ្ងៃទី២៣ ខែកក្កដា ឆ្នាំ២០១៨ មានករណីប្លន់មួយបានកើតឡើង នៅចំណុចបឹងស្នោ ស្ថិតក្នុងភូមិសំរោងតាកុក ឃុំសំរោងក្នុង ស្រុកឯកភ្នំ ដោយគូស្នេហ៍វ័យក្មេងមួយគូ បានជិះម៉ូតូដឹកគ្នាទៅអង្គុយសាសងបង្កាត់ភ្លើងស្នេហ៍នៅកណ្តាលវាលស្រែស្ងាត់ ទាំងយប់អធ្រាត្រ ស្រាប់តែត្រូវជនសង្ស័យទាញដំបងសំពងភាគីយុវជនជាប្រុសស្នេហ៍ បណ្តាលឱ្យសន្លប់ស្តូក ចំណែកខាងស្រីសំណាងល្អ រត់គេចទាន់ ទើបជនសង្ស័យបានប្លន់យកម៉ូតូ ទូរស័ព្ទ កុំព្យូទ័រ រួចគេចខ្លួនបាត់ដោយសុវត្ថិភាព។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញគូស្នេហ៍វ័យក្មេងខាងលើ បានជិះម៉ូតូ១គ្រឿង ម៉ាកហុងដា ឌ្រីម សេ១២៥ ពណ៌ខ្មៅ ស៊េរីឆ្នាំ២០១៤ ពាក់ស្លាកលេខ បាត់ដំបង 1S-0318 ដឹកគ្នាទៅឈប់នៅចំណុចកើតហេតុខាងលើ ដើម្បីសាសងស្នេហ៍ជាមួយគ្នា។
លុះមួយសន្ទុះក្រោយមក ខណៈដែលគូស្នេហ៍កំពុងល្អូកល្អិននឹងគ្នា ក៏ស្រាប់តែលេចមុខជនសង្ស័យម្នាក់ បានកាន់ដំបងចូលទៅ វាយសំពងភាគីខាងប្រុស បណ្តាលឱ្យបែកក្បាល និងរងរបួសស្មា សន្លប់ស្តូកស្តឹងនៅនឹងកន្លែងតែម្តង។ ចំណែកភាគីខាងស្រី សំណាងល្អ បានរត់គេចខ្លួនចេញពីកន្លែងកើតហេតុទាន់ពេល និងបានព្យាយាមរត់កាត់វាលស្រែ ព្រមទាំងស្រែកហៅគេឱ្យជួយផងដែរ៕